តម្លៃហាងឆេងមាសបានធ្លាក់ចុះ នៅចំពេលដែលសេដ្ឋកិច្ចអាមេរិកមានកំណើនល្អ

តម្លៃមាសបានធ្លាក់ចុះចាប់តាំងពីថ្ងៃពុធ បន្ទាប់ពីធនាគារកណ្ដាលសហរដ្ឋអាមេរិក បាន​​​កាត់​បន្ថយ​​​​​អត្រាការ​ប្រាក់​ជាថ្មី​ប្រមាណ​ ២៥ ពិន្ទុ ឬ ០,២៥ ភាគរយ​ ដែល​ធ្វើ​ឱ្យ​អត្រាគោល​ធ្លាក់មក​ត្រឹម​ចន្លោះ​ ៤,២៥-៤,៥០ ភាគរយ​។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities​ បាន​ឱ្យដឹងថា តម្លៃមាសបានធ្លាក់ចុះរហូតដល់ ៦៦ ដុល្លារ ក្នុងមួយអោន ចាប់តាំងពីយប់ថ្ងៃទី ១៨​ ពាក់ព័ន្ធនឹងការកាត់បន្ថយការប្រាក់អាមេរិក។

លោក ឡុង សំណាងយល់ឃើញថា៖ «ចាប់តាំងពីដើមឆ្នាំ ២០២៤ កំណើនសេដ្ឋកិច្ច​អាមេរិក​បាន​ងើបឡើងវិញ ក្នុងនោះអតិផរណា ២ ភាគរយ ទៅតាមគោលដៅ​របស់ធនាគារ​កណ្ដាល និងកំណើនការងារកើនឡើង ចំណុចមួយចំនួន​មានភាពល្អប្រសើរ ដូច្នេះការកាត់​បន្ថយ​អត្រា​ការ​​​ប្រាក់​អាចទាញឱ្យវិនិយោគិនធំៗនៅក្រៅស្រុក បង្កើនការវិនិយោគនៅអាមេរិកវិញ»។

លោក ដូណាល់ ត្រាំ បានលើកឡើងថាក្នុងដំណែងរបស់លោក នឹងដាក់ពន្ធទៅលើវិនិយោគិន និង​ក្រុមហ៊ុនអាមេរិមួយចំនួន ដែលនៅក្រៅប្រទេស ត្រង់ចំណុចនេះ លោក ឡុង សំណាង អះ​អាង​ថា ការនេះនឹងទាញឱ្យវិនិយោគិនជនជាតិអាមេរិកវិលចូលស្រុកវិញ ចៀសវាងសម្ពាធដាក់​ពន្ធរបស់​លោកដូណាល់ ត្រាំ។

ហាងឆេងមាសកំពុងជួញដូរក្នុងតម្លៃ ២ ៦៩៦ ដុល្លារក្នុងមួយអោន នៅលើទីផ្សារអន្តរជាតិ ឬស្មើ​នឹង​ ៣ ១២៧ ដុល្លារ ក្នុងមួយតម្លឹងនៅកម្ពុជា។

បើតាមអាជីវករលក់មាសនៅផ្សារធំថ្មី អ្នកស្រី ជុត គីមសែ ប្រាប់ថា សកម្មភាពអតិថិជនទិញ-លក់មាស មាន​ភាព​ស្ងប់ស្ងាត់មួយរយៈកាលកន្លងមកនេះ ដោយសារតម្លៃហាងឆេងមាសមានការប្រែប្រួលឡើងចុះខ្លាំង ធ្វើឱ្យ​អតិថិជន​ព្រួយបារម្ភបាត់​ទំនុកចិត្ត។

នៅថ្ងៃទី ២០ ខែធ្នូ ឆ្នាំ ២០២៤ តម្លៃហាងឆេងមាសកំពុងជួញដូរក្នុងតម្លៃ ២ ៦៩៦ ដុល្លារក្នុងមួយអោន នៅលើទីផ្សារអន្តរជាតិ ឬស្មើ​នឹង​ ៣ ១២៧ ដុល្លារ ក្នុងមួយតម្លឹងនៅកម្ពុជា។

សម្រាប់តម្លៃមាសនៅតាមបណ្ដាហាងនានាក្នុងរាជធានីភ្នំពេញលក់ចេញនៅថ្ងៃទី ២០ ខែធ្នូនេះ ក្នុងតម្លៃ ៣១៦ ដុល្លារ​ក្នុងមួយជី៕

អត្ថបទ៖ ឡេង ដេត