នាយករដ្ឋមន្ត្រី ថា រាជរដ្ឋាភិបាលមិនត្រូវការសារព័ត៌មាននិយាយបំភ្លៃការពិត មានចរិតបំពុលសង្គមឡើយ

នាយករដ្ឋមន្ត្រីកម្ពុជា បានបញ្ជាក់ទៅកាន់ស្ថាប័នសារព័ត៌មាន ថា រាជរដ្ឋាភិបាលមិនត្រូវការសារព័ត៌មានដែលនិយាយបំភ្លៃការពិត បំប៉ោងព័ត៌មាន ឬផ្សាយព័ត៌មានតែមួយជ្រុងបង្គប់ចរិតបំពុលសង្គមឡើយ។ ផ្ទុយទៅវិញ រាជរដ្ឋាភិបាល គឺត្រូវការសារព័ត៌មានដែលហ៊ាននិយាយរិះគន់ក្នុងន័យស្ថាបនាពីតថភាពពិតក្នុងសង្គម។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានទទួលស្គាល់ពីចំណែកពីការចូលរួមយ៉ាងសកម្ម និងមិនអាចកាត់ផ្តាច់បានពីស្ថាប័នសារព័ត៌មាន និងអ្នកសារព័ត៌មាន ក្នុងដំណើរការអភិវឌ្ឍជាតិ ដែលនេះ បង្ហាញពីភាពជាដៃគូមិនអាចខ្វះបានរវាងរាជរដ្ឋាភិបាលកម្ពុជា និងស្ថាប័នសារព័ត៌មាន។ សម្ដេចធិបតី អះអាងថា ក្នុងដំណាក់កាលណាក៏ដោយ រាជរដ្ឋាភិបាលកម្ពុជាតែងតែយកចិត្តទុកដាក់ ក្នុងការលើកតម្កើងសិទ្ធិសេរីភាពសារព័ត៌មាន និងសេរីភាពខាងការបញ្ចេញមតិ ស្របតាមរដ្ឋធម្មនុញ្ញកម្ពុជា និងច្បាប់ស្តីពីរបបសារព័ត៌មាន។

ក៏ប៉ុន្តែ «រាជរដ្ឋាភិបាលកម្ពុជា ត្រូវការសារព័ត៌មាន ដែលមានថាមពលប្រកបដោយការទទួលខុសត្រូវ និងមានភាពស្មោះត្រង់ចំពោះវិជ្ជាជីវៈ និងអ្នកសារព័ត៌មាន ដែលហ៊ាននិយាយការពិត​ និងហ៊ានរិះគន់ក្នុងន័យស្ថាបនា ដើម្បីឆ្លុះបញ្ចាំងឱ្យឃើញគ្រប់តថភាពសង្គម សំដៅជៀសវាងការផ្សព្វផ្សាយព័ត៌មានតែមួយជ្រុង ឬព័ត៌មានក្លែងក្លាយ»។ នេះគឺជាខ្លឹមសារ គូសបញ្ជាក់របស់សម្ដេចធិបតី ហ៊ុន ម៉ាណែត ក្នុងសារលិខិតផ្ញើជូនវេទិកានិពន្ធនាយកសារព័ត៌មានកម្ពុជាលើកទី២១ ឆ្នាំ២០២៤នេះ។  

សម្ដេចធិបតី ថា ការផ្សាយនូវព័ត៌មានពិត ដោយគោរពតាមក្រមសីលធម៌វិជ្ជាជីវៈអ្នកសារព័ត៌មាន គឺបានរួមចំណែកយ៉ាងសំខាន់ជាមួយរាជរដ្ឋាភិបាល ដើម្បីប្រឆាំងអំពើពុករលួយ ការកែទម្រង់ច្បាប់ និងប្រព័ន្ធយុត្តិធម៌សង្គម ការកែទម្រង់រដ្ឋបាលសាធារណៈ ការលើកស្ទួយលទ្ធិប្រជាធិបតេយ្យ ការគោរពសិទ្ធិមនុស្ស ការកសាងសង្គមមួយប្រកបដោយភាពយុត្តិធម៌ សុខសន្តិភាព និងការអភិវឌ្ឍយូរអង្វែង ដែលជាបំណងប្រាថ្នា និងជាចក្ខុវិស័យរបស់រាជរដ្ឋាភិបាលកម្ពុជា។

ជាការអះអាងជាថ្មី សម្ដេចធិបតី ថា អនុលោមតាមច្បាប់ និងបទប្បញ្ញត្តិរបស់កម្ពុជា សិទ្ធិនៃការបញ្ចេញមតិ សេរីភាពសារព័ត៌មាន និងការបោះពុម្ពផ្សាយ ត្រូវបានធានាយ៉ាងពេញលេញ ប៉ុន្តែអ្នកសារព័ត៌មានខ្លួនឯង មិនត្រូវប្រើប្រាស់សិទ្ធិទាំងនោះធ្វើឱ្យប៉ះពាល់ដល់សេចក្តីថ្លៃថ្នូររបស់អ្នកដទៃ និងប៉ះពាល់ដល់ទំនៀមទម្លាប់សង្គម សណ្តាប់ធ្នាប់សាធារណៈ រួមទាំងសន្តិសុខជាតិនោះទេ។ ក្នុងន័យនេះ សម្ដេចប្រមុខរាជរដ្ឋាភិបាល បានណែនាំឱ្យគ្រប់ភាគីពាក់ព័ន្ធបន្តដោះស្រាយរាល់បញ្ហាប្រឈមពាក់ព័ន្ធនឹងការបំពានក្រមសីលធម៌វិជ្ជាជីវៈ ការផ្សព្វផ្សាយព័ត៌មានក្លែងក្លាយ បំភ្លៃការពិត រួមទាំងការបញ្ចេញមតិ ដែលមានចរិតបំពុលសង្គម ការជេរប្រមាថ និងការញុះញង់បង្កឱ្យកើតមានអរិភាព និងការបែកបាក់ សាមគ្គីភាពជាតិ។

សម្ដេចធិបតី ក៏ទទូចឱ្យស្ថាប័នសារព័ត៌មាន ក៏ដូចជាអ្នកសារព័ត៌មានទាំងអស់ចូលរួមថែរក្សាសុខសន្តិភាព ការអភិវឌ្ឍប្រទេសជាតិ តាមរយៈការផ្ដល់ព័ត៌មានពិត និងទាន់ហេតុការណ៍អំពីសភាពការណ៍ពិតនៅកម្ពុជា និងផ្សព្វផ្សាយគោលនយោបាយរបស់រាជរដ្ឋាភិបាលទៅកាន់ប្រជាពលរដ្ឋ និងនាំយកព័ត៌មានពីប្រជាពលរដ្ឋមកកាន់រាជរដ្ឋាភិបាល ពោលគឺត្រូវធ្វើជាកញ្ចក់ឆ្លុះបញ្ចាំងអំពីភាពពិតជាក់ស្តែង និងភាពអសកម្មនៅក្នុងសង្គម ដើម្បីរាជរដ្ឋាភិបាលមានមូលដ្ឋានដោះស្រាយ និងចាត់វិធានការចំគោលដៅ ទាន់ពេលវេលា ប្រកបដោយប្រសិទ្ធភាព។

សម្ដេចធិបតី ប្រាប់ឱ្យអ្នកសារព័ត៌មានប្រកាន់ខ្ជាប់ក្រមសីលធម៌វិជ្ជាជីវៈក្នុងការផ្សាយព័ត៌មាន ដោយត្រូវឈរលើមូលដ្ឋាននៃតុល្យភាព និងភាពគ្រប់ជ្រុងជ្រោយនៃព័ត៌មាន ជៀសវាងការផ្សព្វផ្សាយដែលធ្វើឱ្យខូចផលប្រយោជន៍ជាតិ ជាពិសេសរួមគ្នាលុបបំបាត់ជនឱកាសនិយមជ្រកក្រោមស្លាកសារព័ត៌មាន៕

អត្ថបទ៖ ធឿន វ៉ាន់សុង