ព័ត៌មានអន្ដរជាតិ

[វិភាគ] សង្គ្រាមរុស្ស៊ី-អ៊ុយក្រែនអាចផ្តើមបញ្ចប់ចន្លោះត្រាំឡើងកាន់អំណាចនិងខួប៣ឆ្នាំនៃសង្គ្រាម

បានផុស

៧ ថ្ងៃ មុន

នៅ

ថ្ងៃសុក្រ ២០ ធ្នូ ២០២៤

ដោយ

ខួប៣ឆ្នាំនៃសង្គ្រាមរុស្ស៊ី-អ៊ុយក្រែននឹងកើតឡើងត្រឹមប្រហែល១ខែប៉ុណ្ណោះ ក្រោយការឡើងកាន់អំណាចជាថ្មីរបស់លោក ដូណាល់ ត្រាំ ជាប្រធានាធិបតីសហរដ្ឋអាមេរិកទី៤៧ ដែលធ្លាប់បានសន្យានាំភាគីជម្លោះបញ្ចប់សង្គ្រាមឲ្យបានឆាប់បំផុតតាមដែលអាចធ្វើទៅបាន។

លោក ពូទីន លោក ហ្សេលេនស្គី និង លោក ដូណាល់ ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ដូណាល់ ត្រាំ ដែលនឹងឡើងកាន់អំណាចជាផ្លូវការនៅថ្ងៃទី២០ខែមករា ២០២៥ ខណៈដែលសង្គ្រាមរុស្ស៊ីនិងអ៊ុយក្រែនក៏នឹងដល់ខួប៣ឆ្នាំនៅនៅថ្ងៃទី២៤ខែកុម្ភៈឆ្នាំ២០២៥ដែរ។ ចន្លោះពេល លោក ត្រាំ ឡើងកាន់អំណាចផ្លូវការ និងខួបសង្គ្រាមដែលមើលទៅភាគីជម្លោះហាក់ខ្សោះខ្យល់ដើម្បីបន្តទៅមុខ ដូចនេះបទឈប់បាញ់ទំនងកើតឡើងចន្លោះពេលនោះ ហើយការចរចារកដំណោះស្រាយសង្គ្រាមនឹងបន្តទៅមុខ។

ចាប់តាំងពីដឹងថា លោក ដូណាល់ ត្រាំ ជាប់ឆ្នោតដឹកនាំសេតវិមានជាថ្មីក្នុងការបោះឆ្នោតកាលថ្ងៃទី៥ខែវិច្ឆិកា សង្គ្រាមនៅអ៊ុយក្រែនបានផ្ទុះកក្រើកខ្លាំងខុសពីធម្មតា រួមជាមួយគោលជំហរឈានទៅរកការចរចារបស់ភាគីជម្លោះក្នុងសង្គ្រាម និងភាគីដែលមានឥទ្ធិពលលើសង្គ្រាមនេះ។

ខណៈភាគីរុស្ស៊ី និងបស្ចឹមប្រទេសដែលគាំទ្រអ៊ុយក្រែន បានសម្ញែងអានុភាពសព្វាវុធរបស់ពួកគេរៀងៗខ្លួន ចាប់តាំងពីខែវិច្ឆិកាមក ប្រមុខមេដឹកនាំប្រទេសក្នុងសង្គ្រាមនេះ ក៏បានបង្ហាញជំហរឆ្ពោះទៅរកការចរចាជាបន្តបន្ទាប់ ដែលអាចនិយាយបានថា ពួកគេបានត្រៀមខ្លួនចរចាដូចគ្នា ដោយគ្រាន់តែរង់ចាំពេលវេលា ទីកន្លែងនិងអ្នកសម្របសម្រួលដ៏ខ្លាំងពូកែប៉ុណ្ណោះ។

អនាគតរដ្ឋបាលរបស់ប្រធានាធិបតី លោក ដូណាល់ ត្រាំ ទំនងក្លាយជាអ្នកសម្រួបម្រួលដ៏មានឥទ្ធិពលបំផុតក្នុងការទាញរុស្ស៊ីឲ្យចូលតុចរចា និងសង្កត់ភាគីអ៊ុយក្រែនឲ្យទទួលយកលក្ខខណ្ឌជាថ្នូរនឹងការការពារសន្តិសុខពីមហាអំណាចសហរដ្ឋអាមេរិក និងមហាអំណាចអឺរ៉ុប។

ក្នុងសង្គ្រាមជិត៣ឆ្នាំកន្លងមកនេះ លោក ពូទីន និងមន្ត្រីជាន់ខ្ពស់វិមានក្រឹមឡាំងរបស់លោក តែងតែបរិហារសហរដ្ឋអាមេរិកក្រោមការដឹកនាំ របស់ប្រធានាធីបតី ចូ បៃដិន ដែលជាអ្នកផ្គត់ផ្គង់ដ៏សំខាន់ដល់ប្រទេសអ៊ុយក្រែនសម្រាប់ធ្វើសង្គ្រាម។ បើតាមរដ្ឋមន្ត្រីការបរទេស លោក Antony Blinken ក្នុងសង្គ្រាមជិត៣ឆ្នាំមកនេះ សហរដ្ឋអាមេរិក បានផ្តល់ជំនួយដល់អ៊ុយក្រែនមានតម្លៃជាទឹកប្រាក់ប្រហាក់ប្រហែល១០០ពាន់លានដុល្លារ។

រៀងរាល់លើកនៃការប្រកាសផ្តល់ជំនួយដល់ភាគីអ៊ុយក្រែន រុស្ស៊ីតែងតែប្រតិកម្មតបតដោយវោហារស័ព្ទការទូតខ្លាំងៗ និងបរិហារគោលជំហររបស់សហរដ្ឋក្នុងការបញ្ឆេះសង្គ្រាមឲ្យកាន់តែធ្ងន់ធ្ងរឡើងៗ។

ប៉ុន្តែនៅថ្ងៃទី១៩ខែធ្នូនេះ វាជារឿងកម្របំផុតដែលប្រធានាធិបតីរុស្ស៊ី លោក វ៉ា្លឌីមៀ ពូទីន បាននិយាយដោយបើកចំហទៅរកការចរចាដោយត្រង់ៗជាមួយលោក ដូណាល់ ត្រាំ ដែលតែងតែបញ្ចេញវោហារស័ព្ទថា លោកមានសមត្ថភាព ក្នុងការបញ្ចប់សង្គ្រាមរុស្ស៊ីនិងអ៊ុយក្រែន។

លោក ពូទីន បានរំឭកដល់ប្រវត្តិនៃការមិនបាននិយាយគ្នាអស់រយៈពេលជាង៤ឆ្នាំដែលលោក ដូណាល់ ត្រាំ មិននៅក្នុងអំណាច និង ក៏បានលើកថា លោក បានត្រៀមខ្លួនជាស្រេចក្នុងការជួបចរចាជាលោក ត្រាំ ពេលណាដ៏គាត់ចង់បាន។

ងាកទៅមើល ប្រធានាធិបតីអ៊ុយក្រែន លោក វ៉ុលឌីមៀ ហ្សេលេនស្គីវិញ ក៏បានបង្ហាញជំហរងាកទៅរកការចរចាក្រោមរដ្ឋបាលលោក ដូណាល់ ត្រាំ ដែរ ប៉ុន្តែកត្តាសំខាន់គឺ ការធានាសន្តិសុខពីសហរដ្ឋអាមេរិក និងសហភាពអឺរ៉ុប ដោយសារលោកពុំជឿលោកពូទីន ឬប្រទេសរុស្ស៊ីដែលនឹងផ្តល់ឲ្យអ៊ុយក្រែននូវសន្តិភាពពិតឡើយ។

លោក ហ្សេលេនស្គី បាននិយាយកាលថ្ងៃទី១៩ធ្នូថា ក្នុងករណីមានបទឈប់បាញ់ណាមួយកើតឡើង នោះការដាក់ពង្រាយកងទ័ពពីសហភាពអឺរ៉ុបដែលស្នើដោយភាគីបារាំងគឺជារឿងចំបាច់។

ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា ចាប់តាំងពីជម្លោះកើតឡើង សហភាពអឺរ៉ុបបានផ្តល់ជំនួយយោធា និងជំនួយសង្គមដល់អ៊ុយក្រែនមានតម្លៃប្រមាណ១៣០ពាន់លានដុល្លារ។ ចំនួនកញ្ចប់ទឹកប្រាក់នេះគឺច្រើនជាងជំនួយរបស់សហរដ្ឋអាមេរិកសម្រាប់ប្រទេសអ៊ុយក្រែន។

អង្គការណាតូដែលប្រទេសជាសមាជិកភាគច្រើនលើសលប់ស្ថិតនៅតំបន់អឺរ៉ុប បានព្យាយាមផ្គត់ផ្គង់អ៊ុយក្រែនដើម្បីឲ្យមានប្រៀបក្នុងការប្រយុទ្ធនៅក្នុងសមរភូមិ។ អគ្គលេខាធិការអង្គការណាតូ លោក Mark Rutte ក៏បានព្យាយាមបញ្ចុះបញ្ចូលអ៊ុយក្រែនឲ្យចូលរួមជាមួយរុស្ស៊ី ក្នុងការសន្ទនាសំដៅទៅរកសន្តិភាពផងដែរ ប៉ុន្តែបានស្នើឲ្យប្រទេសនេះធ្វើវា នៅពេលដែលខ្លួនស្ថិតក្នុងទីតាំងមានប្រៀបជាងនៅលើសមរភូមិ៕

ដោយ រ៉ាន់ រើយ