ឆ្លៀតពេលដ៏មមាញឹក! ឯកឧត្ដម ហ៊ុន ម៉ានី អញ្ជើញសួរសុខទុក្ខ ផ្ដល់អាហារ កាដូ ជូនកុមារនៅ អង្គការផ្ទះបាយកុមារ

ឆ្លៀតពេលដ៏មមាញឹក ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាកម្ពុជា នៅព្រឹកថ្ងៃអាទិត្យ ទី២២ ខែធ្នូ ឆ្នាំ២០២៤  នេះ  បានអញ្ជើញចែកកាដូដល់កុមារដែលមានជីវភាពខ្វះខាតនៅអង្គការផ្ទះបាយកុមារ ស្ថិតក្នុងបរិវេណសាលាបឋមសិក្សាជ័យជំនះ ភូមិសាស្ត្រសង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ  ក្នុងឱកាសបុណ្យណូអែល។អញ្ជើញអមដំណើរវត្តមានឯកឧត្ដម ហ៊ុន ម៉ានី រួមមានលោក លោកស្រីសមាជិក សមាជិកា សហភាពសហព័ន្ធយុវជនកម្ពុជាជាច្រើនរូប។

ក្នុងឱកាសសំណេះសំណាលជាមួយកុមារ ឯកឧត្ដមប្រធានសហភាពសហព័ន្ធយុវជនកម្ពុជា ក៏បានណែនាំផ្ដាំផ្ញើកុមារា កុមារី ត្រូវខិតខំប្រឹងប្រែងរៀនសូត្រ  និងត្រូវចៀសចាកឆ្ងាយពីអំពើអបាយមុខផ្សេងៗដែលសង្គមស្អប់ខ្ពើម។

ឯកឧត្ដម ហ៊ុន​ ម៉ានី បាននាំយកអំណោយជាថវិកា១០២៩១ដុល្លារអាមេរិក និងអង្ករ១តោន ដែលបានមកពីការបរិច្ចាគរបស់លោក លោកស្រី សមាជិក សមាជិកា​ សហភាពសហព័ន្ធយុវជនកម្ពុជា ជូនដល់អង្គការផ្ទះបាយកុមារ ដើម្បីឱ្យអង្គការបានបន្តបេសកម្មជួយកុមារខ្វះខាតបន្តទៅទៀត។

ឯកឧត្ដមប្រធានសហភាពសហព័ន្ធយុវជនកម្ពុជា  ក៏បានកោតសរសើរ និងថ្លែងអំណរគុណដល់ លោក ង៉ូវ ឈីវ ប្រធានអង្គការផ្ទះបាយកុមារ ដែលបានបន្តឆន្ទៈ ក្នុងការប្រឹងប្រែងជួយគាំទ្រដល់កុមារទាំងអស់។ឯកឧត្ដម ហ៊ុន ម៉ានី បានចាត់ទុកបេសកម្មរបស់អង្គការផ្ទះបាយកុមារថាជាបេសកម្មមួយដ៏អស្ចារ្យ ព្រោះបានផ្ដល់ភាពកក់ក្ដៅ និងជំនឿចិត្តដល់កុមារជាច្រើនរូប។

សម្រាប់កុមារជាសមាជិកនៃអង្គការផ្ទះកុមារជាង៦រយនាក់ គឺទទួលបានតុក្កតាចំនួន១ និងចំណែកកុមារជាង៥រយនាក់ទទួលបានតុក្កតាមួយផង និងរូបថតអនុស្សាវរីយ៍ជាមួយឯកឧត្ដម ហ៊ុន ម៉ានី មួយទៀត ដែលជារូបថតកាលពីពេលកន្លងទៅ។

គួរឱ្យដឹងថា ជារៀងរាល់ឆ្នាំ ឯកឧត្ដម ហ៊ុន ម៉ានី តែងតែឆ្លៀតពេលដ៏មមាញឹកជួបជាមួយកុមារនៅអង្គការផ្ទះបាយកុមារចំនួន២លើកក្នុងមួយឆ្នាំ លើកទីមួយ គឺនៅថ្ងៃទី០១ ខែមិថុនា ទិវាសិទ្ធិកុមារអន្តរជាតិ និងលើកទី២ គឺថ្ងៃបុណ្យណូអែល៕​