ព័ត៌មានអន្ដរជាតិ

ចិនប្រតិកម្មប្រឆាំងដាច់ខាតចំពោះការជំនួយយោធាអាមេរិកដល់តៃវ៉ាន់

បានផុស

៤ សប្តាហ៍ មុន

នៅ

ថ្ងៃអាទិត្យ ២២ ធ្នូ ២០២៤

ដោយ

បន្ទាប់ពីរដ្ឋបាលប្រធានាធិបតីជិតផុតអាណត្តិរបស់សហរដ្ឋអាមេរិកបានប្រកាសពីកញ្ចប់ជំនួយយោធាដល់តៃវ៉ាន់ដែលជាសម្ព័ន្ធមិត្តខ្លួននៅសមុទ្ទចិនខាងត្បូង ប្រទេសចិនបាននិយាយថា ខ្លួនបានជំទាស់យ៉ាងដាច់អហង្ការចំពោះទង្វើរបស់សហរដ្ឋអាមេរិក។

សកម្មភាពយោធាថៃវ៉ាន់ក្នុងលំហាត់សមយុទ្ធកាលពីខែកក្ដដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអាមេរិកលោក Joe Biden បានបញ្ចេញការជំនួយផ្នែកការពារជាតិចំនួន ៥៧១,៣ លានដុល្លារអាមេរិកដល់កោះតៃវ៉ាន់ដែលហ៊ុំព័ទ្ធដោយការគំរាមកំហែងពីមហាយក្សចិនក្នុងការក្រសោបយកដោយអាវុធ។

សេតវិមានបាននិយាយនៅថ្ងៃទី២០ខែធ្នូថា លោក Biden បានអនុញ្ញាតទាញយកប្រាក់រហូតដល់៥៧១លានដុល្លារអាមេរិកពីកម្មវិធីការពារជាតិនៃក្រសួងការពារជាតិនិងការអប់រំនិងការបណ្តុះបណ្តាលយោធាដើម្បីផ្តល់ជំនួយដល់តៃវ៉ាន់ ។

សេចក្តីថ្លែងការណ៍របស់សេតវិមានមិនបានផ្តល់ព័ត៌មានលម្អិតនៃកញ្ចប់ជំនួយយោធា ដែលកើតឡើងតិចជាងបីខែ បន្ទាប់ពីការអនុម័តកញ្ចប់ជំនួយមួយកាលពីលើកមុនមានតម្លៃ ៥៦៧លានដុល្លារអាមេរិក។

ក្រសួងការបរទេសរបស់ទីក្រុងប៉េកាំងបាននិយាយនៅក្នុងសេចក្តីថ្លែងការណ៍មួយនៅថ្ងៃទី ២២ខែធ្នូនេះថា៖«ទង្វើនេះរំលោភយ៉ាងធ្ងន់ធ្ងរទៅលើអធិបតេយ្យភាព និងផលប្រយោជន៍សន្តិសុខរបស់ប្រទេសចិន» ដោយបន្ថែមថា ខ្លួន«ប្រឆាំងយ៉ាងដាច់ខាតចំពោះសកម្មភាពនេះ»។

សហរដ្ឋអាមេរិកមិនទទួលស្គាល់តៃវ៉ាន់ជាផ្លូវការតាមការទូតទេ ប៉ុន្តែវាជាសម្ព័ន្ធមិត្តយុទ្ធសាស្ត្ររបស់កោះនេះដែលគ្រប់គ្រងដោយខ្លួនឯង និងជាអ្នកផ្គត់ផ្គង់សព្វាវុធធំជាងគេ។

ប្រទេសចិនដែលបានបង្កើនសម្ពាធផ្នែកនយោបាយ និងយោធាលើកោះតៃវ៉ាន់ក្នុងរយៈពេលប៉ុន្មានឆ្នាំចុងក្រោយនេះ បានអំពាវនាវម្តងហើយម្តងទៀតឱ្យទីក្រុងវ៉ាស៊ីនតោនបញ្ឈប់ការបញ្ជូនអាវុធ និងជំនួយទៅកាន់កោះនេះ ដែលខ្លួនអះអាងថាជាផ្នែកនៃទឹកដីរបស់ខ្លួន។

តៃវ៉ាន់កាលពីដើមសប្តាហ៍នេះបានទទួលរថក្រោះប្រយុទ្ធ Abrams កម្រិតខ្ពស់ចំនួន៣៨ ពីសហរដ្ឋអាមេរិក ដែលតាមសេចក្តីរាយការណ៍ថា រថក្រោះថ្មីរបស់ខ្លួនជាលើកដំបូងក្នុងរយៈពេល៣០ឆ្នាំ៕