ព័ត៌មានអន្ដរជាតិ

រដ្ឋាភិបាលអាល់បានីនឹងបិទ TikTok ចាប់ពីឆ្នំា២០២៥ ដើម្បីតាមដានការអប់រំកុមារ

បានផុស

៥ ថ្ងៃ មុន

នៅ

ថ្ងៃអាទិត្យ ២២ ធ្នូ ២០២៤

ដោយ

នាយករដ្ឋមន្ត្រីអាល់បានី លោក Edi Rama កាលពីថ្ងៃទី ២១ខែធ្នូ បាននិយាយថា រដ្ឋាភិបាលរបស់លោកនឹងបិទបណ្តាញទំនាក់ទំនងសង្គម TikTok យ៉ាងហោចណាស់មួយឆ្នាំចាប់ពីឆ្នាំ២០២៥ ដែលជាផ្នែកនៃការលើកកម្ពស់ការតាមដានសកម្មភាពកុមារ។

លោក បានប្រាប់ការប្រជុំជាមួយគ្រូបង្រៀនជនជាតិអាល់បានី ឪពុកម្តាយ និងអ្នកចិត្តសាស្រ្តនៅរដ្ឋធានី Tirana ថា ៖«យើងនឹងកាត់ផ្តាច់វាចេញពីប្រទេសរបស់យើងសម្រាប់រយៈពេលមួយឆ្នាំ»។

នាយករដ្ឋមន្ត្រីអាល់បានី លោក Edi Rama។ FB of Edi Rama

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្លាស់ប្តូរនេះគឺជាផ្នែកមួយនៃផែនការគាំទ្រដ៏ទូលំទូលាយដើម្បីធ្វើឱ្យសាលារៀនមានសុវត្ថិភាពជាងមុន។ នេះបើតាមការរាយការណ៍របស់ Reuters ។

នាយករដ្ឋមន្ត្រីនៃប្រទេសនៅតំបន់អឹរ៉ុបខាងកើតនេះ បានបន្ថែមថា រដ្ឋាភិបាលនឹងចាប់ផ្តើមកម្មវិធីដើម្បី «បម្រើការអប់រំរបស់សិស្ស និងជួយមាតាបិតាតាមដានដំណើររបស់កូនៗពួកគេ»។

ការបិទបណ្តាញទំនាក់ទំនងសង្គមដ៏ចម្រូងចម្រាសកើតឡើងមិនដល់មួយខែ បន្ទាប់ពីសិស្សអាយុ១៤ឆ្នាំម្នាក់ត្រូវបានសម្លាប់ និងម្នាក់ទៀតរងរបួសនៅក្នុងការវាយតប់គ្នានៅជិតសាលារៀនមួយក្នុងទីក្រុង Tirana ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ឧបទ្ទវហេតុនេះបានកើតឡើងបន្ទាប់ពីមានការឈ្លោះប្រកែកគ្នារវាងក្មេងប្រុសទាំងពីរនៅលើប្រព័ន្ធផ្សព្វផ្សាយសង្គម។ វីដេអូក៏បានផុសនៅលើ TikTok របស់អនីតិជនដែលគាំទ្រការសម្លាប់នេះ។

ឧបទ្ទវហេតុដ៏សាហាវនេះបានបង្កឱ្យមានការជជែកដេញដោលនៅក្នុងប្រទេសក្នុងចំណោមឪពុកម្តាយ អ្នកចិត្តសាស្រ្ត និងស្ថាប័នអប់រំអំពីផលប៉ះពាល់នៃបណ្តាញសង្គមមកលើយុវជន។

លោក Rama បាននិយាយថា៖«នៅក្នុងប្រទេសចិន TikTok ផ្សព្វផ្សាយពីរបៀបដែលសិស្សអាចចូលរៀន របៀបការពារធម្មជាតិ របៀបថែរក្សាប្រពៃណី។ ប៉ុន្តែនៅលើ TikTok នៅខាងក្រៅប្រទេសចិន យើងឃើញតែសុទ្ធតែសំរាម និងភក់ ហេតុអ្វីបានជាយើងត្រូវការវា?»។

ប្រទេសជាច្រើនបានចាប់ផ្តើមការជជែកពិភាក្សាគ្នាអំពីវិធានការប្រឆាំងនឹង TikTok ដែលជាផ្នែកមួយនៃការជជែកវែកញែកកាន់តែទូលំទូលាយលើឥទ្ធិពលនៃប្រព័ន្ធផ្សព្វផ្សាយសង្គមលើក្រុមដែលងាយរងគ្រោះដូចជាកុមារ និងមនុស្សវ័យជំទង់។

នៅក្នុងបទប្បញ្ញត្តិដ៏តឹងតែងបំផុតមួយរបស់ពិភពលោកដែលផ្តោតលើ Big Tech អូស្ត្រាលីបានអនុម័តការហាមឃាត់ប្រព័ន្ធផ្សព្វផ្សាយសង្គមពេញលេញសម្រាប់កុមារអាយុក្រោម ១៦ឆ្នាំកាលពីខែវិច្ឆិកាកន្លងទៅនេះ៕