កេសរកូលព្រៃជាង ៥០០ប្រភេទ កំពុងលើកស្ទួយមុខមាត់កម្ពុជា

ប្រទេសកម្ពុជាសំបូរទៅដោយធនធានធម្មជាតិព្រៃឈើ និងសត្វព្រៃ រួមទាំងរុក្ខជាតិគ្រប់ប្រភេទ។ សម្បត្តិធម្មជាតិទាំងនេះ មិនត្រឹមតែបានផ្តល់នូវសោភ័ណភាពស្រស់ត្រកាលប៉ុណ្ណោះទេ តែវាថែម​ទាំង​បានរួមចំណែកទ្រទ្រង់សេដ្ឋកិច្ច សង្គម និងបរិស្ថាន ផងដែរ។

រដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ យកចិត្តទុកដាក់ខ្ពស់លើការ​ស្រាវជ្រាវ​វិទ្យាសាស្ត្រទៅលើប្រភេទរុក្ខជាតិ រួមទាំងកេសរកូលព្រៃ អស់រយៈពេលជាច្រើនទសវត្ស​មកហើយ ដោយមានការសហការជាមួយដៃគូអភិវឌ្ឍនានា។ បច្ចុប្បន្ននេះ រដ្ឋបាលព្រៃឈើ​បានស្រាវ​ជ្រាវរកឃើញកេសរកូលព្រៃជាង ៥០០ប្រភេទ ដែលមានវត្តមាន​នៅក្នុងប្រទេសកម្ពុជា ហើយការសិក្សាស្រាវជ្រាវនេះនៅតែបន្តស្វែងរកប្រភេទថ្មីៗបន្ថែមទៀត។

ការសិក្សាស្រាវជ្រាវ ប្រមូលសំណាកកេសរកូលព្រៃ គឺវិភាគទានដ៏សំខាន់មួយសម្រាប់សិស្ស និស្សិត មន្ត្រីរាជការ និងដៃគូអភិវឌ្ឍន៍នានា ប្រើប្រាស់ជាមគ្គុទេសក៍ក្នុងការស្រាវជ្រាវ និងអភិវឌ្ឍ។

ការងារនេះ ក៏កំពុងលើកស្ទួយមុខមាត់របស់ប្រទេសកម្ពុជា ដែលមានឆន្ទៈមុត​ស្រួចក្នុងការការពារ ថែរក្សា ស្រាវជ្រាវ និងយកចិត្តទុកដាក់ខ្ពស់ ចំពោះប្រភេទកេសរកូល​ព្រៃទាំងនេះ ដែលខ្លះមានរក​ឃើញ​វត្តមានតែនៅក្នុងប្រទេសកម្ពុជាប៉ុណ្ណោះ។

កញ្ញា ណៃ ស៊ីខឿន អនុប្រធានការិយាល័យ នៃរដ្ឋបាលព្រៃឈើ បានប្រាប់ថា ជាលទ្ធផលនៃការស្រាវជ្រាវ រកឃើញ កេសរកូលព្រៃ ជាច្រើនប្រភេទ ដែលគេគិតថា វាមិនមានវត្តមាននៅក្នុងស្រុកខ្មែរទេ ប៉ុន្តែ កញ្ញាបាន​យកមកដាក់នៅទី​តាំងមួយ​នៅកណ្ដាលរាជធានីភ្នំពេញ។

កិច្ចការស្រាវជ្រាវបានចាប់ផ្ដើមនៅឆ្នាំ ២០១៣ ក្រុមការងារបានចុះទៅខេត្តកោះកុង ដើម្បីចុះទៅសិក្សាអំពីជីវៈចម្រុះ ហើយគាត់បានប្រមូលសំណាក សិក្សាបង្ហាញឈ្មោះ ថាប្រភេទណា មាននៅក្នុងប្រទេស។

រហូតមកដល់បច្ចុប្បន្ន ក្រុមការងារក្រសួងកសិកម្ម នៅតែបន្តចុះស្រាវជ្រាវគ្រប់ខេត្តទាំងអស់នៅកម្ពុជា ខណៈប្រមូលបាន ៣០០០ សំណាក និងបានកំណត់អត្តសញ្ញាណឈ្មោះ ៣០០ ប្រភេទ។

កញ្ញា ណៃ ស៊ីខឿន បញ្ជាក់ថា៖ «ផ្កាកុលាប មានស្រទាប់ច្រើន តែកេសរកូលអត់ពិបាកចំណាំទេ ដោយសារត្របករបស់វាមាន ៣ ហើយស្រទាប់មាន ២ ហើយវាបានបម្លែងខ្លួនទៅជាអណ្តាត»៕