សារភាព​ហើយ! លោក Ismail Haniyeh ពិត​ជា​ស្លាប់​ក្រោម​ថ្វី​ដៃ​​របស់​អ៊ីស្រាអែល​

អ៊ីស្រាអែល បានបញ្ជាក់កាលពីថ្ងៃចន្ទ​ទី​២៣​ខែ​ធ្នូ​ឆ្នាំ​២០២៤​​ថា ខ្លួនពិត​ជា​បានធ្វើឃាត​អតីត​មេដឹកនាំក្រុមហាម៉ាស លោក Ismail Haniyeh និងបានចេញការព្រមានយ៉ាងម៉ឺងម៉ាត់ចំពោះថ្នាក់ដឹកនាំនៃក្រុម​ហ៊ូធី ដែល​មាន​មូលដ្ឋាន​នៅ​ប្រទេសយេម៉ែន នូវ​សកម្មភាពស្រដៀងគ្នានេះ។

ការអត្ថាធិប្បាយរបស់រដ្ឋមន្ត្រីការពារជាតិ លោក Israel Katz ដែលបានចាក់ផ្សាយតាមប្រព័ន្ធផ្សព្វផ្សាយសាធារណៈរបស់អ៊ីស្រាអែល បានធ្វើឡើងបន្ទាប់ពីការវាយប្រហារដោយមីស៊ីល​ប៉ាលិស្ទិក​កាលពី​២​ថ្ងៃមុនដោយក្រុម​ហ៊ូធី ដែលប្រព័ន្ធការពារដែនអាកាសរបស់អ៊ីស្រាអែលបរាជ័យក្នុងការស្ទាក់ចាប់។ មីស៊ីល​​របស់​ហ៊ូធី បានវាយប្រហារទីក្រុង Tel Aviv បណ្តាលឲ្យមនុស្ស ២០នាក់រងរបួស និងបំផ្លាញផ្ទះ​សម្បែង​រាប់សិបខ្នង។

យោងតាមសារព័ត៌មាន Haaretz របស់អ៊ីស្រាអែល នៅ​ល្ងាច​ថ្ងៃ​ដដែល​នោះ ក្រុម​ហ៊ូធី ក៏បានអះអាងទទួលខុសត្រូវចំពោះការវាយប្រហារ​ដោយប្រើយន្តហោះគ្មានមនុស្សបើក លើគោលដៅយោធាចំនួន​២​កន្លែង​​នៅ​តំបន់​ភាគកណ្តាល និងភាគខាងត្បូង​ប្រទេស​អ៊ីស្រាអែល។

លោក Katz បាននិយាយថា៖ «ប៉ុន្មានថ្ងៃនេះ នៅពេលដែលអង្គការភេរវករ ហ៊ូធី កំពុងបាញ់​មីស៊ីល​មកលើអ៊ីស្រាអែល ខ្ញុំចង់ថ្លែងសារច្បាស់លាស់មួយថា យើងនឹង​សងសឹក​យ៉ាង​ចាស់ដៃ​​លើ​អង្គការភេរវករ ហ៊ូធី នៅក្នុងប្រទេសយេម៉ែន ដែលនៅតែជាក្រុម​ភេរវករ​នៅ​សល់​​ចុង​ក្រោយ​គេ»។

ក្រុមហ៊ូធី បាន​បង្ហាញ​​ការ​​គាំទ្រ​ដល់​សម្ព័ន្ធមិត្ត​ក្រុម​សកម្ម​ប្រយុទ្ធ​ហាម៉ាស​នៅ​តំបន់​ហ្គាហ្សា ចាប់តាំងពីថ្ងៃទី៧​ខែតុលាឆ្នាំ២០២៣ ហើយ​បាន​​​កំណត់គោលដៅវាយ​ប្រហារ​ដោយ​មីស៊ីល និងយន្តហោះគ្មានមនុស្សបើក ​លើកប៉ាល់ដឹកទំនិញ​អ៊ីស្រាអែល ឬអ្នកដែលពាក់ព័ន្ធជាមួយទីក្រុង Tel Aviv ក្នុងសមុទ្រក្រហម។ ហ៊ូធី បាន​សម្តែងការប្តេជ្ញាចិត្តក្នុងការបន្តប្រតិបត្តិការ​របស់​ខ្លួន​ រហូតដល់​​ការវាយលុកនៅលើ​តំបន់​ហ្គាហ្សា​ត្រូវ​បាន​បញ្ចប់។

ចាប់តាំងពីដើមឆ្នាំ២០២៤មក ក្រុមចម្រុះដែលដឹកនាំដោយសហរដ្ឋអាមេរិក បាននិងកំពុងធ្វើការវាយប្រហារតាមអាកាស​កំណត់គោលដៅលើទីតាំង​ក្រុមហ៊ូធី នៅក្នុងតំបន់មួយចំនួននៃប្រទេសយេម៉ែន ដើម្បីឆ្លើយតបទៅនឹងការវាយប្រហារដោយក្រុម​សកម្ម​ប្រយុទ្ធ​នេះ​នៅសមុទ្រក្រហម។ ក្រុមហ៊ូធី​​ក៏​បាន​វាយ​បក​ម្តងម្កាល​​ដែរ​ទៅ​លើ​សហរដ្ឋ​អាមេរិក។

រដ្ឋមន្ត្រី​ការពារ​ជាតិ​​អ៊ីស្រាអែល បានព្រមាន ហ៊ូធី ដោយនិយាយថា៖ «យើងនឹងបំផ្លាញហេដ្ឋារចនាសម្ព័ន្ធយុទ្ធសាស្ត្ររបស់ពួកគេ និងលុបបំបាត់មេដឹកនាំរបស់ពួកគេ ដូចដែលយើងបានធ្វើជាមួយ (មេដឹកនាំក្រុមហាម៉ាស) លោក Ismail Haniyeh, លោក Yahya Sinwar និង (មេ​ដឹក​នាំ​ក្រុម​ហេសបូឡា) លោក Hassan Nasrallah។ យើង​នឹង​​ចាត់​ការ​ទីក្រុង Al Hudaydah និង​រដ្ឋធានី Sana’a ដូច​ដែល​យើង​បាន​ធ្វើ​នៅ​ទីក្រុង​តេហេរ៉ង់, ហ្គាហ្សា និង​លីបង់»។

សូម​បញ្ជាក់​ថា អ៊ីស្រាអែល​បាន​សម្លាប់​លោក Nasrallah ក្នុង​ការ​វាយ​ប្រហារ​តាម​អាកាស​កាលពី​ថ្ងៃ​ទី២៧ខែ​កញ្ញា នៅ​ជាយក្រុង​ភាគ​ខាង​ត្បូង​នៃ​រដ្ឋធានី​បេរូត ប្រទេស​លីបង់។ លោក Sinwar ត្រូវបានគេរាយការណ៍ថា​ត្រូវ​បានសម្លាប់នៅទីក្រុង Rafah ភាគខាងត្បូង​តំបន់​ហ្គាហ្សា កាលពីថ្ងៃទី​១៧​ខែតុលា ខណៈដែល​លោក Haniyeh ត្រូវបានគេធ្វើឃាតកាលពីខែកក្កដា ក្នុងអំឡុងពេលទស្សនកិច្ចទៅកាន់រដ្ឋធានី​តេហេរ៉ង់​ក្នុង​​ប្រទេសអ៊ីរ៉ង់៕

ដោយ៖ ឈាង