ព័ត៌មានអន្ដរជាតិ

ប្រទេសធំៗ ពង្រឹងវិធានការសន្តិសុខ មុនបុណ្យណូអែល

បានផុស

១ ខែ មុន

នៅ

ថ្ងៃអង្គារ ២៤ ធ្នូ ២០២៤

ដោយ

បន្ទាប់ពីសោកនាដកម្មនៅផ្សារបុណ្យណូអែលក្នុងទីក្រុង Magdeburg នៃប្រទេសអាល្លឺម៉ង់ បណ្តាលឲ្យមានមនុស្សស្លាប់ចំនួន៥នាក់ និងជាង២០០នាក់ទៀតរងរបួស, ពិភពលោកកំពុងបង្កើនវិធានការសន្តិសុខដើម្បីការពារការវាយប្រហារណាមួយ ដែលអាចកើតឡើងក្នុងអំឡុងរដូវកាលពិធីបុណ្យនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាល្លឺម៉ង់

អាជ្ញាធរអាល្លឺម៉ង់ កំពុងវាយតម្លៃអំពីសន្តិសុខនៅតាមទីផ្សារបុណ្យណូអែលទូទាំងប្រទេស។ រដ្ឋមន្ត្រីមហាផ្ទៃអ្នកស្រី Nancy Faeser បានជំរុញឲ្យមានការដាក់ច្បាប់សន្តិសុខផ្ទៃក្នុងកាន់តែតឹងរ៉ឹង រួមទាំងការពង្រឹងការឃ្លាំមើល និងពង្រឹងកម្លាំងប៉ូលិសផងដែរ។ អ្នកស្រី គោលបំណងផ្តល់អំណាចនិងធនធានដល់ភ្នាក់ងារសន្តិសុខ ដើម្បីទប់ស្កាត់ឧប្បត្តិហេតុដដែលៗនាពេលអនាគត។

បារាំង

ឆ្លើយតបទៅនឹងការវាយប្រហារនៅ Magdeburg ប្រទេសបារាំងបានពង្រឹងសន្តិសុខនៅផ្សារ គ្រីស្មាស់ធំបំផុតរបស់ខ្លួនក្នុងទីក្រុង Strasbourg ខណៈរដ្ឋាភិបាល ចាត់វិធានការប្រុងប្រៀបខ្លួនដើម្បីធានាសុវត្ថិភាពភ្ញៀវទេសចរក្នុងរដូវបុណ្យទាន។

ចក្រភពអង់គ្លេស

ប៉ូលិសអង់គ្លេសបានចេញការព្រមានអំពីភេរវកម្ម ដោយបង្ហាញពីក្តីបារម្ភចំពោះការវាយប្រហារស្រដៀងទៅនឹងឧប្បត្តិហេតុក្នុងប្រទេសអាល្លឺម៉ង់។ កងកម្លាំងជំរុញឲ្យសាធារណជនប្រុងប្រយ័ត្ន និងរាយការណ៍ពីសកម្មភាពសង្ស័យនានា ជាពិសេសនៅកន្លែងដែលមានមនុស្សច្រើនកកកុញ ដូចជាទីផ្សារបុណ្យណូអែល និងផ្សារទំនើបជាដើម។

សហរដ្ឋអាមេរិក

ប៉ូលិសក្រុងញូវយ៉ក បានដាក់ពង្រាយកម្លាំងយ៉ាងច្រើននៅតាមផ្សារបុណ្យណូអែល ទូទាំងទីក្រុង ដើម្បីធានាសុវត្ថិភាពមនុស្សក្នុងរដូវកាលបុណ្យនេះ ត្បិតតែមិនមានការគំរាមខ្លាំងក្លាណាមួយក៏ដោយ។

ក្រៅពីប្រទេសធំទាំងប៉ុន្មានខាងលើនេះ ប្រទេសនៅអាស៊ីដូចជាឥណ្ឌូណេស៊ីនិងអារ៉ាប៊ីសាអ៊ូឌីត ក៏ចាត់វិធានការដើម្បីពង្រឹងសន្តិសុខផងដែរ៕

អត្ថបទ៖ សុខ សុវណ្ណ

ចុចអាន៖ រថយន្តបុករះនៅផ្សារបុណ្យណូអែលអាល្លឺម៉ង់ ស្លាប់និងរបួសមនុស្សច្រើននាក់ សង្ស័យជាអំពើភេរវកម្ម