ព័ត៌មានអន្ដរជាតិ

អ៊ុយក្រែន ទទួលបានជំនួយ១ពាន់លានដុល្លារទៀត ដែលទាញចេញពីទ្រព្យបង្កករបស់រុស្ស៊ី

បានផុស

៤ សប្តាហ៍ មុន

នៅ

ថ្ងៃពុធ ២៥ ធ្នូ ២០២៤

ដោយ

Chheang

ប្រទេសអ៊ុយក្រែន បានទទួលជំនួយហិរញ្ញវត្ថុចំនួន ១ពាន់លានដុល្លារពីសហរដ្ឋអាមេរិក ដែលទាញចេញពីការបង្កកទ្រព្យសម្បត្តិរបស់រុស្ស៊ី។ នេះបើយោងតាមការលើកឡើងរបស់នាយករដ្ឋមន្ត្រីអ៊ុយក្រែន លោក Denys Shmyhal កាលពីថ្ងៃអង្គារទី២៤ខែធ្នូឆ្នាំ២០២៤។

ទង់ជាតិតំណាងឲ្យប្រទេស G7 (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Shmyhal បាននិយាយនៅក្នុងសារបង្ហោះនៅលើ Telegram ថា៖ «នេះគឺជាទុនដំបូងនៃការគ្រោងទុក ២០ពាន់លានដុល្លារ ដែលអាមេរិករៀបចំដើម្បីបែងចែកតាមរយៈការប្រើប្រាស់ទ្រព្យសម្បត្តិរបស់រុស្ស៊ីដែលត្រូវបានបង្កក។ យើងមានអំណរគុណចំពោះដៃគូសហរដ្ឋអាមេរិក និងធនាគារពិភពលោកសម្រាប់ជំហានដ៏សំខាន់នេះឆ្ពោះទៅរកយុត្តិធម៌»។

ជំនួយរបស់អាមេរិក គឺជាផ្នែកមួយនៃការប្តេជ្ញាចិត្តយ៉ាងមុតមាំ ដែលធ្វើឡើងដោយក្រុមប្រទេស G7 ស្ដីពីកញ្ចប់ជំនួយចំនួន ៥០ពាន់លានដុល្លារ សម្រាប់អ៊ុយក្រែន ដោយប្រើប្រាស់ប្រាក់ចំណូលពីទ្រព្យសម្បត្តិបង្កករបស់រុស្ស៊ី។

ក្រុមប្រទេស G7 ដែលមានដូចជា ចក្រភពអង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន និងសហរដ្ឋអាមេរិក បានបង្កកទ្រព្យសម្បត្តិរុស្ស៊ីប្រហែល ៣០០ពាន់លានដុល្លារ បន្ទាប់ពីការផ្ទុះឡើងនៃសង្គ្រាមឈ្លានពានរបស់រុស្ស៊ីទៅលើអ៊ុយក្រែន។

សូមបញ្ជាក់ថា នៅក្នុងខែធ្នូនេះ ស្ថានទូតរុស្ស៊ីនៅទីក្រុងឡុងដ៍ បានថ្កោលទោសផែនការស្រដៀងគ្នារបស់ចក្រភពអង់គ្លេស ក្នុងការបង្វិលប្រាក់ជាង ២,៥ពាន់លានដុល្លារ ទៅឲ្យអ៊ុយក្រែន ដោយប្រើទ្រព្យសម្បត្តិបង្កករុស្ស៊ី ហើយហៅផែនការនេះថាជា «គម្រោងទុច្ចរិត»៕

ដោយ៖ ឈាង