សន្តិសុខសង្គម

អាជ្ញាធរខណ្ឌទួលគោក ចាត់វិធានការក្ដៅចំពោះអ្នកយកចិញ្ចើមផ្លូវលក់ដូរ នៅតំបន់ផ្សារនាគមាស តាមផ្លូវលេខ ២៣១

បានផុស

១ ខែ មុន

នៅ

ថ្ងៃពុធ ២៥ ធ្នូ ២០២៤

ដោយ

កម្លាំងគណៈបញ្ជាការឯកភាពខណ្ឌទួលគោក ចុះចាត់វិធានការរដ្ឋបាល និងកំណត់ព្រំឲ្យលក់ដូរ នៅកំណាត់ផ្លូវលេខ ២៣១ ផ្សារនាគមាស កែងនឹងផ្លូវ ២៣០ ដោយមិនអនុញ្ញាតឲ្យយកទ្រូងផ្លូវ ផ្ទេរទំនិញ បង្កការកកស្ទះទៀតឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី ២៥ ខែធ្នូ ឆ្នាំ ២០២៤ នេះ រដ្ឋបាលខណ្ឌទួលគោក លោក ស៊ឹម សុផង់ អភិបាលរងទទួលបន្ទុកបរិស្ថានអនាម័យ សន្តិសុខសណ្ដាប់ធ្នាប់សាធារណៈ បានដឹកនាំកម្លាំងគណៈបញ្ជាការឯកភាពខណ្ឌទួលគោក ចុះចាត់វិធានការ រៀបចំសណ្ដាប់ធ្នាប់ និងបាញ់ថ្នាំកំណាត់ព្រំ នៅកំណាត់ផ្លូវលេខ ២៣១ ជាប់ផ្សារនាគមាស ចាប់ពីចំណុចផ្លូវលេខ ២៣០ ដល់មហាវិថីមុន្នីរ៉េត(២១៧) ចំពោះ រថយន្តដែលយកផ្លូវសាធារណៈជាកន្លែងផ្ទេរទំនិញ និងក្រុមអាជីវករតាំងលក់បន្លែ ផ្លែឈើ លើផ្លូវ បង្កការកកស្ទះចរាចរណ៍ដល់អ្នកធ្វើដំណើរ មិនអាចឆ្លងកាត់បាន។

លោក ស៊ឹម សុផង់ អភិបាលរងខណ្ឌទួលគោក បញ្ជាក់ថា កំណាត់ផ្លូវលេខ ២៣១ ជាប់ផ្សារនាគមាស ចាប់ពីចំណុចផ្លូវលេខ ២៣០ ដល់មហាវិថីមុន្នីរ៉េត(២១៧) អាជ្ញាធរបានណែនាំ និងជូនដំណឹងជាច្រើនលើកច្រើនសាមកហើយ តែក្រុមអាជីវករទាំងនោះហាក់មិនចូលរួមសហការសោះ។ ពេលនេះ អាជ្ញាធរបានចុះលើកយកសម្ភារៈកល់តាំងលក់ មិនអនុញ្ញាតឲ្យបន្តយកផ្លូវតាំងលក់បែបនេះទៀតទេ។

លោកអភិបាលរង បន្តទៀតថា ចំពោះរថយន្តដឹកទំនិញដែលនៅតែបន្តមកចតនៅលើផ្លូវ ២៣១ ដែលជាកន្លែងអាជ្ញាធរហាមឃាត់ ពេលដែលចត កម្លាំងសមត្ថកិច្ចនឹងចុះមកយករថយន្តទៅរក្សាទុកនៅសាលាខណ្ឌជាបណ្ដោះអាសន្ន រង់ចាំដោះស្រាយបន្តពេលក្រោយ។

សូមបញ្ជាក់ថា កាលពីពេលថ្មីៗ មកនេះ អាជ្ញាធរខណ្ឌទួលគោក បានចុះអនុវត្តវិធានការរដ្ឋបាលចំពោះអាជីវករលក់ដូរលើកំណាត់ផ្លូវលេខ ២៣០ ដោយអនុវត្តបានល្អប្រសើរ អាចធ្វើចរាចរណ៍ងាយស្រួលជាង ដោយអាជ្ញាធរអនុញ្ញាតឲ្យក្រុមអាជីវករលក់ពេលយប់បណ្ដោះអាសន្ននៅចិញ្ចើមផ្លូវ តែត្រូវរក្សាសណ្ដាប់ធ្នាប់ ហើយព្រឹកឡើង នៅវេលាម៉ោង ៦ ព្រឹក ត្រូវតែរើចេញឲ្យអស់ បរិស្ថានអនាម័យ ត្រូវតែស្អាត៕

អត្ថបទ ៖ ម៉េង