តើថ្លៃភាគហ៊ុនធ្លាក់បញ្ជាក់ពីស្ថានភាពក្រុមហ៊ុនមានបញ្ហាមែនឬទេ?

ជាការពិតណាស់​ហេតុផលមួយក្នុងចំណោមនោះអាចបណ្ដាលមកពីក្រុមហ៊ុនមានការធ្លាក់ចុះខ្លាំងនៃប្រាក់ចំណូល ឬប្រាក់ចំណញ បើប្រៀបធៀបក្នុងរយៈពេលប៉ុន្មានឆ្នាំចុងក្រោយ ឬមានបំណុលខ្ពស់ បញ្ហាការគ្រប់គ្រងក្រុមហ៊ុន លំហូរសាច់ប្រាក់អវិជ្ជមាន​ ការបាត់បង់លទ្ធភាពប្រកួតប្រជែង (competitive advantage) និន្នាការឧស្សាហកម្មបានផ្លាស់ប្តូរ ឬការកំណត់គោលដៅក្រុមហ៊ុនមិនច្បាស់លាស់ ។ល។ ប្រការខាងលើនេះធ្វើអោយវិនិយោគិនបាត់បង់ជំនឿទុកចិត្តលើក្រុមហ៊ុន។ នេះបើយោងតាមការចុះផ្សាយរបស់ផ្សារមូលបត្រកម្ពុជា។

ផ្ទុយទៅវិញ ប្រសិនបើក្រុមហ៊ុនមិនមានបញ្ហាដូចបានរ៉ាយរ៉ាប់ខាងលើ ហើយបែរជាធ្វើបានល្អជាងឬប្រហាក់ប្រហែលឆ្នាំមុនៗ នេះបញ្ជាក់ថាកត្តា​ទំនោរ​ទីផ្សារ (Market Sentiment) ដែលឆ្លុះបញ្ចាំងពីអារម្មណ៍និងចិត្តសាស្ត្ររបស់អ្នកវិនិយោគ​ ជាការធ្វើអោយថ្លៃភាគហ៊ុនធ្លាក់ ជាជាងមូលដ្ឋានគ្រឹះរបស់ក្រុមហ៊ុន ហើយវាពិតជាជះឥទ្ធិពលយ៉ាងខ្លាំងដល់ថ្លៃភាគហ៊ុន។

ករណីសិក្សាលើក្រុមហ៊ុនធំៗលើពិភពលោកដែលដំណើរការក្រុមហ៊ុនមានភាពប្រក្រតី ប៉ុន្តែថ្លៃភាគហ៊ុនបែរជាធ្លាក់ចុះ

1-​ ក្រុមហ៊ុន Apple អំឡុងឆ្នាំ ២០០៨-២០០៩ ថ្លៃភាគហ៊ុនធ្លាក់ចុះ ៦០% ដោយសារវិនិយោគិនព្រួយបារម្ភពីវិបត្តិសេដ្ឋកិច្ចពិភពលោក ខណៈពេលដែលប្រាក់ចំណូលសុទ្ធក្រុមហ៊ុនមានចំនួន៦ដុល្លារពាន់លាន ហើយបន្តកើនឥតឈប់ឈររហូតមកដល់ពេលបច្ចុប្បន្ន។

2- ក្រុមហ៊ុន Netflix ក្នុងឆ្នាំ ២០២២ ថ្លៃភាគហ៊ុនធ្លាក់ជិត ៥០% ស្របពេលដែលក្រុមហ៊ុនរកចំណូលសុទ្ធបានជិត ៤,៥ ពាន់លាន និងមានអតិថិជនច្រើនជាង​ ២៣០ លាននាក់បានប្រើប្រាស់សេវាកម្ម។

3-​ ​ក្រុមហ៊ុន CP ALL ក្នុងឆ្នាំ ២០២៣ ថ្លៃភាគហ៊ុនធ្លាក់ជិត​ ២០% ប៉ុន្តែប្រាក់ចំណូលសុទ្ធកើនឡើង ៤៤% ធៀបហ្នឹងឆ្នាំ ២០២២ទៅវិញ។

4- ក្រុមហ៊ុន Google ក្នុងឆ្នាំ ២០២២ ថ្លៃភាគហ៊ុនធ្លាក់ជិត​ ៤០% នៅពេលសហរដ្ឋអាមេរិកតម្លើងការប្រាក់ ក៏ប៉ុន្តែស្ថានភាពក្រុមហ៊ុនបែរជាមានការរីកចំរើន។

វិនិយោគិនគួរវិភាគអោយបានស៊ីជម្រៅហើយយល់ច្បាស់ពីតម្លៃភាគហ៊ុន (VALUE) និងថ្លៃភាគហ៊ុន (PRICE) នោះវិនិយោគិននឹងឃើញឱកាសក្នុងការវិនិយោគរយៈពេលវែង ជួយវិនិយោគិនរក្សាទំនុកចិត្តក្នុងការវិនិយោគនៅពេលដែលតម្លៃភាគហ៊ុនធ្លាក់ចុះ និងទាញអត្ថប្រយោជន៍និងពង្រីកវិសាលភាពផលចំនេញពីការងើបឡើងវិញ។ បើមិនចាប់ផ្ដើមវិនិយោគទេ ប្រយ័ត្នស្ដាយក្រោយ «ឱកាសមិនមានច្រើន ចាប់មិនឲ្យរបូត»៕