រដ្ឋបាលថ្មី​របស់​ស៊ីរីប្តឹង​តុលាការ​អន្តរជាតិ​ទាមទារសំណង​៣០០​ពាន់លានដុល្លារពីអ៊ីរ៉ង់

រដ្ឋបាលថ្មីរបស់ប្រទេសស៊ីរីកំពុងរៀបចំអនុស្សរណៈមួយដើម្បីដាក់ជូនតុលាការអន្តរជាតិ ដែលឯកសារនេះត្រូវបានគេរាយការណ៍ថា ស៊ីរី​បាន​ដាក់​​ការ​ទាមទារសំណងចំនួន៣០០ពាន់លានដុល្លារពីប្រទេសអ៊ីរ៉ង់ចំពោះការខូចខាតដែលបានបង្កឡើងលើប្រជាជនស៊ីរី និងហេដ្ឋារចនាសម្ព័ន្ធក្នុងអំឡុងជម្លោះរបស់ប្រទេសទាំងពីរ។

សំណើរសំណងនេះផ្ដោតលើការខូតខាតក្នុងអំឡុងពេល​ជម្លោះ​យោធា និងនយោបាយរបស់អ៊ីរ៉ង់ទាក់ទងនឹងប្រធានាធិបតីស៊ីរី​លោក Bashar al-Assad ដែលត្រូវបានបណ្ដេញចេញពីដំណែង។ លើសពីនេះ ស៊ីរី​ក៏បាន​ដាក់​សកម្មភាព​របស់​អ៊ីរ៉ង់​ «ជា​ឧក្រិដ្ឋកម្ម​ និង​ធ្វើ​តាម​អំពើ​ចិត្ត» ហើយ​បាន​គូសបញ្ជាក់​ពី​ចេតនា​របស់​រដ្ឋបាល​​ថ្មី​ក្នុង​ការ​ទាមទារ​​ឲ្យ​ក្រុង​តេអេរ៉ង់​ទទួល​ខុស​ត្រូវ​ទង្វើ​របស់​ខ្លួន​ក្នុង​ជម្លោះ​ស៊ីរី។

ជាមួយគ្នានេះប្រភពជិតស្និទ្ធនឹងរដ្ឋបាលនយោបាយថ្មីរបស់ប្រទេសស៊ីរីក៏បានបដិសេធការប្រាស្រ័យទាក់ទងគ្នារវាងរដ្ឋបាលថ្មី​និងអ៊ីរ៉ង់ រួមទាំងការពិភាក្សាទាក់ទងនឹងការបើកស្ថានទូតឡើងវិញនៅទីក្រុងដាម៉ាស (Damascus) និង តេអេរ៉ង់ (Tehran)។ ប្រទេសស៊ីរី បានបដិសេធដោយផ្ទាល់នូវ​កំណត់ទូត​​ដែលបានធ្វើឡើងដោយអ្នកនាំពាក្យរដ្ឋាភិបាលអ៊ីរ៉ង់លោកស្រី Fatemeh Mohajerani ពីមុន ទាក់ទងនឹងកិច្ចចរចាការទូតដែលកំពុងបន្ត។

ភាគី​ស៊ីរីថា ការប្រាស្រ័យទាក់ទងជាមួយអ៊ីរ៉ង់ត្រូវបានកាត់ផ្តាច់ទាំងស្រុង ដោយបដិសេធការអះអាងរបស់លោកស្រី Mohajerani អំពីការផ្លាស់ប្តូរការទូតនិងបានបញ្ជាក់ផងដែរថា រដ្ឋបាលស៊ីរីមិនមានផែនការភ្លាមៗដើម្បីចូលរួមជាមួយអ៊ីរ៉ង់ ទាក់ទងនឹងការបើកដំណើរការ​​​ឡើង​វិញ​នូវស្ថានទូតអ៊ីរ៉ង់នៅទីក្រុងដាម៉ាស​ ឬស្ថានកុងស៊ុលស៊ីរីនៅទីក្រុង Aleppo នោះទេ៕

អត្ថបទ៖ ប៊ុន សុភាព