កីឡា

លោកប្រធានកីឡាកាយសម្ព័ន្ធ ផ្តល់គន្លឹះ៥ចំណុចដើម្បីជោគជ័យស៊ីហ្គេម២០២៥

បានផុស

៤ នាទីutes មុន

នៅ

ថ្ងៃសៅរ៍ ២៨ ធ្នូ ២០២៤

ដោយ

លោកទេសរដ្ឋមន្ត្រី ថោង ខុន ប្រធានសហព័ន្ធកីឡាកាយសម្ព័ន្ធកម្ពុជាបានផ្តល់អនុសាសន៍៥ចំណុចដល់គណៈកម្មការប្រតិបត្តិដើម្បីត្រៀមខ្លួនធ្វើយ៉ាងណាឆ្ពោះទៅភាពជោគជ័យក្នុងព្រឹត្តិការណ៍កីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ និងកីឡាយុវជនអាស៊ី ឆ្នាំ២០២៩ នៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្តល់អនុសាសន៍របស់លោកទេសរដ្ឋមន្ត្រីទទួលបន្ទុកជំរុញអភិវឌ្ឍកីឡាកើតមានឡើង ក្នុងឱកាសដែលលោកបានអញ្ជើញជាអធិបតីក្នុងពិធីបិទការប្រកួតកីឡាកាយសម្ព័ន្ធជើងឯកថ្នាក់ជាតិ និងពានរង្វាន់លោកបណ្ឌិត ថោង ខុន លើកទី៨ កាលពីថ្ងៃទី២៧ ខែធ្នូ ឆ្នាំ២០២៤។ លោកបានលើកឡើងថា ការប្រកួតកីឡាកាយសម្ព័ន្ធជើងឯកថ្នាក់ជាតិទទួលបានលទ្ធផលល្អប្រសើរគឺជាការវាស់ស្ទង់ សមត្ថភាព បច្ចេកទេស ទេពកោសល្យ ដែលកីឡាករ កីឡាការិនីម្នាក់ៗបានប្រឹងប្រែងហាត់ហ្វឹកហ្វឺនកន្លងមក។

លទ្ធផលរបស់កីឡាករ កីឡាការិនី ដែលទទួលជ័យលាភីនាពេលនេះពិតជាបានមកពីការខិតខំហ្វឹកហាត់ជាប្រចាំ មានការតស៊ូព្យាយាម គោរពវិន័យបានល្អយកចិត្តទុកដាក់ស្តាប់ការពន្យល់ការបង្ហាត់បង្រៀនរបស់គ្រូបង្វឹក ជាមួយការយកចិត្តទុកដាក់ពីថ្នាក់ដឹកនាំគណៈកម្មាធិការជាតិអូឡាំពិកកម្ពុជា ក្រសួងអប់រំ យុវជន និងកីឡា និងជាពិសេសថ្នាក់ដឹកនាំសហព័ន្ធកីឡាកាយសម្ព័ន្ធកម្ពុជា។

ទន្ទឹមជាមួយគ្នានេះ លោក ថោង ខុន បានសង្កត់ធ្ងន់ថា កីឡាស៊ីហ្គេម លើកទី៣៣ ឆ្នាំ២០២៥ នៅថៃ មានពេល១ឆ្នាំទៀត។ កីឡាយុវជនអាស៊ី ឆ្នាំ២០២៩ ដែលកម្ពុជាធ្វើម្ចាស់ផ្ទះមានពេល៥ឆ្នាំទៀត។ សម្រាប់កីឡាកាយសម្ព័ន្ធកម្ពុជាបានរីកចម្រើនគួរឲ្យកត់សំគាល់ទាំងបរិមាណ និងគុណភាព ដូច្នេះដើម្បីជាការត្រៀមឲ្យបានល្អសម្រាប់ការប្រកួតព្រឹត្តិការណ៍ទាំងពីរនេះ លោកបានផ្តល់នូវអនុសាសន៍៥ចំណុច។

បណ្តុះបណ្តាលកីឡាករ កីឡាការិនីថ្នាលតាមកំរិតអាយុ និងបញ្ជូនទៅហាត់ហ្វឹកហ្វឺននៅក្រៅប្រទេស ក្នុងន័យបង្កើនទាំងបរិមាណ និងគុណភាពបច្ចេកទេសកម្រិតខ្ពស់។
ពង្រឹងសមត្ថភាព ចៅក្រម មន្រ្តីបច្ចេកទេស គ្រូបង្វឹក គ្រូជំនួយឱ្យកាន់តែល្អប្រសើទាំងបរិមាណ និងគុណភាព។
ជំរុញឱ្យមានការរៀបចំការប្រកួតឱ្យបានច្រើន ការហ្វឹកហាត់ជាប្រចាំ នៅតាមបណ្តាក្លិប សមាគម។
ពង្រឹងរចនាសម្ព័ន្ធគ្រប់គ្រងសហព័ន្ធ ក្លិប សមាគមដែលមានរួចមកហើយឱ្យបានរឹងមាំ និងស្វែងរកដៃគូរអភិវឌ្ឍបន្ថែមទៀត។
ជម្រុញឱ្យមានការចូលរួមប្រកួតជាលក្ខណៈអន្តរជាតិឱ្យបានច្រើនជារៀងរាល់ឆ្នាំ។

ការប្រកួតកីឡាកាយសម្ព័ន្ធជើងឯកថ្នាក់ជាតិ ឆ្នាំ២០២៤ មានក្លិបកីឡាកាយសម្ព័ន្ធចំនួន៨ដោយមានកីឡាករ កីឡាការិនី៦៤នាក់ ថ្នាក់ដឹកនាំ-មន្ត្រីបច្ចេកទេស និងចៅក្រម៣៣នាក់ ព្រមទាំងមានមន្ត្រីស្ម័គ្រចិត្ត១៣នាក់។ ដំណាក់កាលទី១គឺជាការហ្វឹកហាត់ទាំងកីឡាករ កីឡាការិនី និងក្រុមការងារលើគ្រប់ប្រភេទវិញ្ញាសាចាប់ពីថ្ងៃទី២២ ដល់ទី២៤ ខែធ្នូ ឆ្នាំ២០២៤។ បន្ទាប់មកគឺជាដំណាក់កាលប្រកួតពីថ្ងៃទី២៥ ដល់ទី២៧ ខែធ្នូ ឆ្នាំ២០២៤។

ជាលទ្ធផល ក្រុមកីឡាកាយសម្ព័ន្ធក្រសួងមហាផ្ទៃ ឈរលេខ១ដោយបានឈ្នះមេដាយមាស៥ និងប្រាក់៧។ ក្រុមកីឡាក្រសួងការពារជាតិស្ថិតនៅលេខ២ដោយឈ្នះមេដាយមាស៣ ប្រាក់៣ និងសំរិទ្ធ២ ខណៈក្រុមកីឡាខេត្តកំពង់ឆ្នាំងស្ថិតនៅលេខ៣ដោយឈ្នះមេដាយមាស៣ ប្រាក់១ និងសំរិទ្ធ៥ ហើយក្រុមកីឡាខេត្តក្រចេះស្ថិតនៅលេខ៤ដោយបានឈ្នះមេដាយមាស២ ប្រាក់២ និងសំរិទ្ធ៦៕