ព័ត៌មានជាតិ

ផ្លូវបេតុង ២ ខ្សែ ដែលអាជ្ញាធរសង្កាត់ភ្លើងឆេះរទេះស្ថាបនាព្រមគ្នា ពេលនេះរួចរាល់ហើយ

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ២ មករា ២០២៥

ដោយ

ផ្លូវបេតុង ២ ខ្សែ ដែលអាជ្ញាធរសង្កាត់ភ្លើងឆេះរទេះស្ថាបនាព្រមគ្នា ពេលនេះរួចរាល់ហើយ ដើម្បីឲ្យប្រជាពលរដ្ឋក្នុងមូលដ្ឋានងាយស្រួលធ្វើដំណើរ ប្រកបរបរប្រចាំថ្ងៃ និងបញ្ចៀសការជន់លិចនារដូវវស្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ិន វុទ្ធី ចៅសង្កាត់ភ្លើងឆេះរទេះ បានឲ្យដឹងថា នាចុងឆ្នាំ ២០២៤ កន្លងមកនេះ រដ្ឋបាលសង្កាត់ បានចុះពិនិត្យរៀបចំប្រព័ន្ធលូថ្មី និងចាក់ផ្លូវបេតុងចំនួន ២ ខ្សែ ព្រមគ្នា ក្នុងមូលដ្ឋានភូមិភ្លើងឆេះរទេះលិច សង្កាត់ភ្លើងឆេះរទេះ ខណ្ឌកំបូល ដែលមានទទឹង ៥ ម៉ែត្រ បណ្ដោយ ៤ ០៣២ ម៉ែត្រ ដើម្បីដាក់ឲ្យប្រជាពលរដ្ឋងាយស្រួលធ្វើដំណើរ និងប្រកបរបរផ្សេងៗ។

លោកចៅសង្កាត់ បន្ថែមថា ការស្ថាបនាផ្លូវបេតុងឆ្អឹងដែក ក្នុងមូលដ្ឋានភូមិភ្លើងឆេះរទេះលិច នៅឆ្នាំ ២០២៤ មានចំនួន ៦ ខ្សែ សរុបស្មើ ១ ០០០ ម៉ែត្រ ដែលជាគម្រោងមូលនិធិអភិវឌ្ឍន៍សង្កាត់ក្នុងឆ្នាំ ២០២៤។ ការស្ថាបនា និងអភិវឌ្ឍន៍ក្នុងមូលដ្ឋាន ដោយសារតែឃើញពីទុក្ខលំបាករបស់ប្រជាពលរដ្ឋក្នុងការប្រកបរបរចិញ្ចឹមជីវភាពប្រចាំថ្ងៃ និងជន់លិចនារដូវវស្សា។ ផ្លូវបេតុងខាងលើស្ថាបនារួចរាល់ និងត្រូវបានអាជ្ញាធរដាក់ឲ្យពលរដ្ឋធ្វើដំណើរខ្លះៗ ហើយ ដោយចំណុចខ្លះមិនទាន់ដាក់ឲ្យប្រើប្រាស់ទេ រង់ចាំបេតុងរឹងមាំសិន។

ជាមួយគ្នានោះ អាជ្ញាធរ បានសំណូមពរដល់ប្រជាពលរដ្ឋទាំងអស់ក្នុងមូលដ្ឋាន សូមមេត្តាជួយថែរក្សា ទុកដាក់សំរាម និងវេចខ្ចប់ឲ្យបានត្រឹមត្រូវ ជៀសវាងបោះចោលគ្មានសណ្ដាប់ធ្នាប់ បង្កផលប៉ះពាល់ដល់បរិស្ថាន ហើរចូលប្រព័ន្ធលូ បង្កការកកស្ទះចរន្តទឹក៕

អត្ថបទ ៖ សុខា