រាជធានីភ្នំពេញជាប់ចំណាត់ថ្នាក់ជាទីក្រុង​ដែលចំណាយតិចជាងគេសម្រាប់គោលដៅកម្សាន្តឆ្លងឆ្នាំសកល​នៅអាស៊ី

Agoda ដែលជាថ្នាលបច្ចេកវិទ្យា​ស្វែងរកគោលដៅទេចរណ៍ និងកន្លែងស្នាក់នៅលំដាប់ពិភពលោកបានចាត់ថ្នាក់រាជធានីភ្នំពេញជាទីក្រុងដែលមានការចំណាយសមរម្យ​បំផុត​នៅ​អាស៊ីសម្រាប់គោលដៅទេចរណ៍កម្សាន្តឆ្លងឆ្នាំសកលកន្លងមក ដោយឈានមុខទីក្រុងហាណូយរបស់ប្រទេសវៀតណាម និងទីក្រុងហ្សាកាតារបស់ប្រទេសឥណ្ឌូនេស៊ី។

​ការផ្តល់ចំណាត់ថ្នាក់នេះត្រូវបានចេញផ្សាយកាលពីថ្ងៃទី១ខែមករាឆ្នាំ២០២៥កន្លងមកនេះ វា ​បង្ហាញពីការទាក់ទាញនៃទីក្រុងភ្នំពេញ និងជាគោលដៅសម្រាប់ភ្ញៀវទេចរបរទេស​ដែលគិតគូរដល់ការចំណាយ និងអាចយល់ដឹងច្រើនអំពីសម្បត្តិវប្បធ៌មដ៏សម្បូរបែប។ ​

បើយោងតាម Agoda ​៖«ទីក្រុង​ភ្នំពេញ​មិន​មែន​ត្រឹម​តែ​មានភាពទាក់ទាញប៉ុណ្ណោះ​ទេ ប៉ុន្តែទីក្រុងនេះពោរពេញដោយ​ភាពទាក់ទាញជាប្រវត្តិសាស្ត្រ ជាមួយនឹងភាពរស់រវើកដ៏ទំនើប។ អ្នកទស្សនាអាចរីករាយជាមួយ​សកម្មភាពកម្សាន្តប្លែកៗ ដោយមិនចំណាយខ្ពស់។ ពួកគេអាចស្វែងយល់ពីភាពអស្ចារ្យនៃព្រះបរមរាជវាំង និងប្រវត្តិរបស់រមណីយដ្ឋានវត្តភ្នំ​ រហូតដល់ការដើរលេងតាមមាត់ទន្លេដ៏ស្រស់ត្រកាល ដោយរាជធានីភ្នំពេញផ្តល់នូវបទពិសោធន៍ចម្រុះនិងសម្បូរបែប»។

​​​ផ្អែកលើទិន្នន័យរបស់ goda ដែលប្រមូលបានពីការកក់កន្លែងស្នាក់នៅបានបង្ហាញថា អត្រាបន្ទប់ជាមធ្យមក្នុងទីក្រុងភ្នំពេញកាលពីថ្ងៃទី ៣១ ខែធ្នូ ឆ្នាំ ២០២៤ គឺមានតម្លៃ ៦៧ ដុល្លារ ដែលតម្លៃនេះធ្វើឱ្យទីក្រុងក្លាយជាជម្រើសដ៏គួរឱ្យទាក់ទាញសម្រាប់អ្នកធ្វើដំណើរដែលស្វែងរកការប្រារព្ធពិធីឆ្លងឆ្នាំសកលដែលមានតម្លៃសមរម្យ និងមិនអាចបំភ្លេចបាន។

​បន្ទាប់ពីទីក្រុងភ្នំពេញ​គឺទីក្រុងហាណូយ ប្រទេសវៀតណាម និងទីក្រុងហ្សាកាតា ប្រទេសឥណ្ឌូនេស៊ី ជាមួយនឹងអត្រាស្នាក់នៅជាមធ្យម ៧៩ ដុល្លារ និង ៩២ ដុល្លារ រៀងគ្នា។ ​

​លោក Lam Vu នាយកប្រចាំប្រទេសវៀតណាម និងឥណ្ឌូចិនរបស់ Agoda បានលើកឡើងអំពីការចាត់ថ្នាក់នេះថា៖« “ចំពោះ Agoda យើងផ្តល់ភាពងាយស្រួលដល់អ្នកធ្វើដំណើរស្វែងរកគោលដៅដ៏អស្ចារ្យដោយមិនចំណាយខ្ពស់។ ខណៈពេលដែលទីក្រុងនានាដូចជាតូក្យូ និងបាងកកនៅតែពេញនិយមសម្រាប់ថ្ងៃចូលឆ្នាំសកល ទិន្នន័យនេះបង្ហាញថា«រាល់ការចំណាយត្រូវតបស្នងមកវិញនូវគុណតម្លៃដ៏ល្អបំផុតអាចរកបាននៅក្នុងទីក្រុងនានាដូចជាភ្នំពេញ និងហាណូយ ដែល គោលដៅទាំងនេះផ្តល់នូវតម្លៃដ៏អស្ចារ្យលើការចំណាយ ជាមួយនិងការប្រារព្ធពិធីកម្សាន្តដ៏សម្បូរបែប បើទោះបីជាទីក្រុងទាំងនេះមិនមែនជាគោលដៅទេចរណ៍ដំបូងគេដែលភ្ញៀវទេចរណ៍គិតដល់​សម្រាប់ការដើរលេងឆ្លងឆ្នាំថ្មីក៏ដោយ»។

កាលពី​រាត្រី​យប់​ថ្ងៃ​ទី ៣១ ខែ​ធ្នូ ឆ្នាំ ២០២៤ ឈាន​ចូល​ថ្ងៃ​ទី ១ ខែ​មករា ឆ្នាំ ២០២៥ ដែល​ជា​ថ្ងៃ​ឆ្លង​ឆ្នាំ​សកល មាន​ប្រជាពលរដ្ឋ​យ៉ាង​ច្រើន​កុះករ​បំផុត ចូលរួម​ដើរលេង និង​ទស្សនា​កម្សាន្ត ក្នុង​ព្រឹត្តិការណ៍​ដ៏​ធំ​មួយ គឺ «សាទរ​កម្ពុជា» ដែល​ព្រឹត្តិការណ៍​នេះ បាន​ទាក់ទាញ​ភ្ញៀវ​ជាតិ និង​អន្តរជាតិ ទៅ​ចូលរួម រហូតដល់​ពាក់កណ្ដាល​អធ្រាត្រ អម​ជាមួយ​ការ​បាញ់​កាំជ្រួច​យ៉ាង​អធិកអធម ដើម្បី​អបអរសាទរ​ឆ្នាំ​ថ្មី ២០២៥។

លោកស្រី ដោ សម្ផស្ស នាយិការរងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា ពិធីបុណ្យឆ្លងឆ្នាំសកលឆ្នាំថ្មី២០២៤ នេះ នៅរាជធានីភ្នំពេញមានរៀបចំប្រគុំតន្រ្តីខ្នាតធំចំនួន៤ទីតាំង ក្នុងនោះរួមមាន៖ ១. ក្រុមហ៊ុន Naga World រៀបចំឡើងនៅខាងមុខទីតាំងគាត់តែម្តង មានការប្រគុំតន្រ្តី និងបាញ់កំជ្រួញ។ ២. សហភាពសហព័ន្ធយុវជនកម្ពុជា(សសយក) រៀបចំកម្មវិធីសាទរកម្ពុជានៅបរិវេណមុខវាំង និងទីតាំងជិតនោះ ដោយមានបាញ់កាំជ្រួច។ ៣. ក្រុមហ៊ុនហង្សមាស ប្រគុំតន្រ្តីនៅទីធ្លារសួនច្បារវត្តបុទុមវតី ផ្នែកខាងត្បូង។ ៤.ទូរទស្សន៍បាយន្តមានកម្មវិធីប្រគុំតន្រ្តី នៅជាប់រង្វង់មូលនាងមច្ឆា ចាប់ពីថ្ងៃទី ២៩-៣០ និង៣១ ឆ្នូ ២០២៤៕