ព័ត៌មានជាតិ

ផ្លូវជាតិលេខ ៥ ក្នុងខេត្តបាត់ដំបង កំពុងពង្រីកឲ្យស្របតាមលក្ខណៈស្តង់ដារ

បានផុស

២ សប្តាហ៍ មុន

នៅ

ថ្ងៃចន្ទ ៦ មករា ២០២៥

ដោយ

កំណាត់ផ្លូវមួយចំនួនដែលស្ថិតនៅលើផ្លូវជាតិលេខ ៥ ក្នុងខេត្តបាត់ដំបង កំពុងធ្វើការពង្រីកឲ្យធំទូលាយដើម្បីឲ្យមានភាពងាយស្រួលក្នុងការធ្វើដំណើរ និងស្របទៅតាមលក្ខណៈស្តង់ដារសំដៅបញ្ជៀសការកកស្ទះ និងកាត់បន្ថយគ្រោះថ្នាក់ចរាចរណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង នាថ្ងៃទី០៥ ខែមករាឆ្នាំ២០២៥ ម្សិលមិញនេះ បានមានប្រសាសន៍ថា កំណត់ផ្លូវជាលេខ ៥ ចាប់ពីចំណុចរង្វង់មូលរូបសំណាកយាយទេព ទៅទល់នឹងផ្លូវបំបែកហាយវេ (ផ្លូវវាងក្រុង) គឺជាគម្រោងរបស់មន្ទីរ ម្យ៉ាងដោយសារតែកំណត់ផ្លូវជាតិនេះមានសភាពតូចចង្អៀតហើយកោងខ្លាំង ដែលកន្លងមកតែងតែប្រឈមនឹងគ្រោះថ្នាក់ចរាចរណ៍ជាញឹកញាប់ ដូច្នេះទើបលោកបានចាត់ក្រុមការងារ ឲ្យចុះធ្វើការវាស់វែង និងឈូសឆាយ ដោយពង្រីកទៅតាមលក្ខណៈស្តង់ដារ។

លោកប្រធានមន្ទីរបានសង្កត់ធ្ងន់ថា កន្លងមកផ្លូវនេះគឺទទឹងត្រឹមតែ ១០ម៉ែត្រ ប៉ុណ្ណោះ ដូច្នេះហើយទើបលោកកំណត់បន្ថែមដោយតម្រូវឲ្យក្រុមការងារ ឈូសឆាយពង្រីកទាំងសងខាងផ្លូវ គឺម្ខាង ៥ ម៉ែត្របន្ថែមទៀត ដូច្នេះទទឹងផ្លូវសរុប និងមានប្រវែង ២០ ម៉ែត្រ ដែលទំហំនេះ អាចធ្វើឱ្យផ្លូវធំទូលាយ និងងាយស្រួលដល់ប្រជាពលរដ្ឋនៅក្នុងការធ្វើដំណើរ។

ជាចុងក្រោយលោកបានបន្ថែមថា កន្លងមកផ្លូវនេះមន្ទីរបានស្ថាបនារួចរាល់ ប្រមាណ ៣០% ហើយ ដូច្នេះនៅឆ្នាំថ្មីនេះ មន្ទីរនឹងធ្វើបន្តទៅមុខទៀត យ៉ាងហោចណាស់ក៏តម្រូវឲ្យបាន ១.៥០០ ម៉ែត្របន្ថែមទៀតដែរ នេះដោយសារតែគម្រោងមានកំណត់ ហើយមន្ទីរក៏នឹងព្យាយាមធ្វើយ៉ាងណាឲ្យការពង្រីកផ្លូវនេះបានទៅដល់គោលដៅ ១០០% ដែរ៕

អត្ថបទ : សោ និយមរ័ត្ន