កីឡា

វិសាខា នាំចូលខ្សែប្រយុទ្ធថ្មី Karasausks មានបទពិសោធច្រើន

បានផុស

១ ខែ មុន

នៅ

ថ្ងៃពុធ ៨ មករា ២០២៥

ដោយ

ក្លិបបាល់ទាត់វិសាខាទើបតែបានប្រកាសនាំចូលខ្សែប្រយុទ្ធ Artūrs Karašausks សញ្ជាតិឡាតវីដែលមានបទពិសោធជោកជាំក្នុងរយៈពេលប្រមាណជាង១០ឆ្នាំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Artūrs Karašausks ដែលមានដើមកំណើតនៅថ្ងៃទី២៩ ខែមករា ឆ្នាំ១៩៩២ បានចាប់ផ្តើមបាល់ទាត់ដំបូងជាយុវជនរបស់ក្លិប JFC Skanto ប្រទេសឡាតវី។ រដូវកាល២០០៨-២០០៩ រូបគេលេងឲ្យក្លិប JFK Olimps បាន១៨ប្រកួត រកបាន១០គ្រាប់ ក្នុងលីគឡាតវី។ ឆ្នាំ២០១០-១៦ រូបគេលេងឲ្យក្លិប Skonto Riga ដោយបានបង្ហាញខ្លួន៥៦ប្រកួតរកបាន៣២គ្រាប់ក្នុងលីគឡាតវីជាកន្លែងដែលរូបគេបានឈ្នះជើងឯកលីគ និងស្បែកជើងមាស។

ចន្លោះឆ្នាំ២០១៦-១៧ Artūrs Karašausks បានចូលរួមជាមួយក្លិប FC Wil លីគទី២ប្រទេសស្វីស និងឆ្នាំ២០១៧-១៨ លេងឲ្យក្លិប FK Liepaja បាន២២ប្រកួត រកបាន១០គ្រាប់។ បន្ទាប់មក រូបគេចូលរួមជាមួយក្លិប FC Akzhayik, Pafos FC និង ខ្ចីជើងទៅ Riga FC មុនពេលចូលរួមក្លិប FK Liepaja វិញក្នុងរដូវកាល២០២០-២១ ដែលលេងបាន២៩ប្រកួត រកបាន១៣គ្រាប់។ ឆ្នាំ២០២២ រូបគេចូលរួមជាមួយក្លិប FK Liepaja វិញ បន្ទាប់ពីចូលរួមក្លិប Ethnikos Achna បានរយៈពេលខ្លី។

ចន្លោះឆ្នាំ២០២២ ដល់ឆ្នាំ២០២៤ រូបគេចូលរួមជាមួយក្លិប Ypsonas Krasava លីគទី២ប្រទេសស៊ីប ដោយលេងបាន៥៤ប្រកួតរកបាន២៨គ្រាប់ និងដើមឆ្នាំ២០២៤បានវិលត្រឡប់ចូលក្លិប FK Liepaja វិញដោយលេងបាន៨ប្រកួត រកបាន១គ្រាប់ ហើយចុងក្រោយផ្លាស់មកទឹកដីកម្ពុជាក្នុងជើងទី២។

កីឡាករ Artūrs Karašausks បានឈ្នះពានរង្វាន់៣ផ្សេងគ្នា ជាមួយក្លិប Skonta Riga គឺជើងឯកលីគកំពូលឡាតវី ក្នុងឆ្នាំ២០១០, ឈ្នះជើងឯក Baltic League ឆ្នាំ២០១១ ដែលជាកម្មវិធីប្រកួតក្លិបកំពូលរបស់ប្រទេសអេស្តូនី ឡាតវី និងលីទុយអានី និងឈ្នះជើងឯក Latvian Cup ឆ្នាំ២០១២។

រូបគេបានឈ្នះពានស្បែកជើងមាស២លើកនៅលីគកំពូលឡាតវីគឺនៅឆ្នាំ២០១៣ និងឆ្នាំ២០១៧ ព្រមទាំងធ្លាប់ឈ្នះពានកីឡាករវ័យក្មេងប្រចាំលីគឡាតវីក្នុងឆ្នាំ២០០៩៕