ព័ត៌មានអន្ដរជាតិ

ឥណ្ឌូណេស៊ីគ្រោងនាំចូលគោ-ក្របី៤០ម៉ឺនក្បាលនៅឆ្នាំ២០២៥ ដើម្បីជួយកម្មវិធីផ្ដល់អាហារឥតគិតថ្លៃ

បានផុស

២ សប្តាហ៍ មុន

នៅ

ថ្ងៃពុធ ៨ មករា ២០២៥

ដោយ

រដ្ឋាភិបាលប្រទេសឥណ្ឌូណេស៊ីកំពុងលើកទឹកចិត្តអ្នកចិញ្ចឹមគោ-ក្របីក្នុងស្រុកឱ្យនាំចូលគោ-ក្របី បង្កាត់ពូជ ដោយកំណត់គោលដៅចំនួន៤០ម៉ឹនក្បាលនៅឆ្នាំ២០២៥ ដើម្បីផ្គត់ផ្គង់សាច់ និងទឹកដោះគោសម្រាប់កម្មវិធីផ្ដល់អាហារឲ្យសាលារៀនដោយឥតគិតថ្លៃរបស់រដ្ឋាភិបាល។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuter។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញឲ្យមានការនាំចូលគោក្របីបន្ថែមនេះគឺស្របពេលជាមួយនឹងកម្មវិធីរបស់ប្រទេសឥណ្ឌូណេស៊ីក្នុងការផ្តល់អាហារដោយឥតគិតថ្លៃដល់កុមារ និងស្ត្រីមានផ្ទៃពោះដែលបានចាប់ផ្តើមនៅសប្តាហ៍នេះជាមួយនឹងអាហារចំនួន៥៧០០០០កញ្ចប់ចែកចាយដល់សាលារៀនទូទាំងប្រទេស។

រដ្ឋាភិបាលបាននិយាយថា កម្មវិធីនឹងត្រូវបានពង្រីកបន្ថែមទៀត ជាមួយនឹងគោលដៅនៃការផ្តល់អាហារដល់កុមារជាង៨០លាននាក់ និងម្តាយដែលមានផ្ទៃពោះ ខណៈដែលការចំណាយសរុបប្រមាណ២៨ពាន់លានដុល្លារអាមេរិក ។

បើតាមអនុរដ្ឋមន្ត្រីក្រសួងកសិកម្មលោក Sudaryono បាននិយាយនៅក្នុងសេចក្តីថ្លែងការណ៍មួយថា ក្នុងចំណោមគោ ៤០០០០០ក្បាលដែលគាត់សង្ឃឹមថាអ្នកចិញ្ចឹមនឹងនាំចូលនៅឆ្នាំនេះពាក់កណ្តាលគួរតែជាគោទឹកដោះគោ។

លោក បានឲ្យដឹងថា ក្នុងរយៈពេលប្រាំឆ្នាំខាងមុខ ទីក្រុងហ្សាកាតាកំណត់គោលដៅនាំចូលគោពូជចំនួន ២លានក្បាល ដូច្នេះតម្រូវការសាច់គោ និងទឹកដោះគោសម្រាប់កម្មវិធីអាហារសម្រាប់សាលារៀនអាចឆ្លើយតបនឹងការផ្គត់ផ្គង់ក្នុងស្រុកបានហើយ។ ទោះយ៉ាងណាក្រសួងមិនបាននិយាយថា តើរដ្ឋាភិបាលនឹងផ្តល់ការលើកទឹកចិត្តជាអ្វីដល់អ្នកចិញ្ចឹមសត្វសម្រាប់ការនាំចូលនេះទេ។

គួរបញ្ជាក់ថា ប្រទេសឥណ្ឌូណេស៊ី ជាធម្មតានាំចូលគោពីប្រទេសអូស្ត្រាលី ហើយប្រភពទឹកដោះគោជាចម្បងរបស់ប្រទេសនេះគឺមកពីនូវែលសេឡង់។ លើសពីនេះអាជ្ញាធរប្រទេសនេះក៏កំពុងពិនិត្យមើលការអនុញ្ញាតឱ្យនាំចូលគោពីប្រទេសប្រេស៊ីលផងដែរ៕