រដ្ឋបាលខណ្ឌពោធិ៍សែនជ័យ ផ្តល់សេវាបញ្ជាក់វិញ្ញាបនបត្របណ្ដោះអាសន្នជូនសិស្សានុសិស្សថ្នាក់៩ និងទី១២

កាលពីរសៀលថ្ងៃទី១០ ខែមករា ឆ្នាំ២០២៥ លោក សំ សារ៉ាវុធ អភិបាលរងខណ្ឌពោធិ៍សែនជ័យ លោក ឈួន ឆាយារិទ្ធ នាយករដ្ឋបាលសាលាខណ្ឌ រួមជាមួយក្រុមការងារ បានសម្រួលលើការងារបញ្ជាក់វិញ្ញាបនបត្របណ្តោះអាសន្ន ជូនសិស្សានុសិស្ស ដែលមកស្នើសុំសេវានៅការិយាល័យច្រកចេញចូលតែមួយ ទាំង២ វិញ្ញាបនបត្រ (ថ្នាក់ទី៩ និងថ្នាក់ទី១២) សម្រាប់ឆ្នាំ២០២៤។

លោក ញឹម រស្មី ប្រធានការិយាល័យប្រជាពលរដ្ឋបានប្រាប់ កម្ពុជាថ្មី ថា ការរៀបចំសម្រួលលើការងារបញ្ជាក់វិញ្ញាបនបត្របណ្តោះអាសន្នជូនសិស្សានុសិស្សនេះ ដោយទទួលបានការណែនាំពីលោក សក់ ច័ន្ទកញ្ញារិទ្ធ អភិបាលខណ្ឌ បានចាត់ឱ្យក្រុមការងាររៀបចំទទួលផ្តល់សេវារដ្ឋបាលជូនដល់សិស្សានុសិស្ស ដែលមកបញ្ជាក់វិញ្ញាបនបត្របណ្តោះអាស្ននទាំង២ ក្នុងនោះមាន វិញ្ញាបនបត្របណ្តោះអាស្នន មធ្យមសិក្សាបឋមភូមិ និងវិញ្ញាបនបត្របណ្តោះ​អាស្ននមធ្យមសិក្សា ទុតិយភូមិ ដោយឯកសារទាំងអស់ទទួលភ្លាម រង់ចាំយកទៅវិញភ្លាម។

ជាមួយការទទួលយកសេវាបញ្ជាក់ វិញ្ញាបនបត្របណ្តោះអាសន្ននេះ សិស្សានុសិស្ស បានសម្តែងនូវសេចក្តីសប្បាយរីករាយ ប្រកបដោយស្នាមញញឹម ខណៈថ្នាក់ដឹកនាំ មន្ត្រី ដែលផ្តល់នៅច្រកចេញចូលតែមួយរបស់រដ្ឋបាលខណ្ឌពោធិ៍សែនជ័យ បម្រើប្រជាពលរដ្ឋដោយយកចិត្តទុកដាក់ ប្រកបដោយសុជីវធម៌។

សូមរំលឹកថា រដ្ឋបាលខណ្ឌពោធិ៍សែនជ័យ កាលពីថ្ងៃទី៣១ ខែតុលា ឆ្នាំ ២០២៤ បានចេញដីកាស្តីពីការលើកលែងការបង់តម្លៃសេវាលើការបញ្ជាក់វិញ្ញាបនបត្របណ្តោះអាសន្ន មធ្យមសិក្សាបឋមភូមិ វិញ្ញាបនបត្របណ្តោះអាសន្នមធ្យមសិក្សាទុតិយភូមិ សម្រាប់ឆ្នាំ២០២៤៕

អត្ថបទ៖ សំណាង