ក្រសួងសាធារណការព្រមានចាត់វិធានការផ្លូវច្បាប់លើអ្នកក្លែងបន្លំជាអ្នកផ្ដល់សេវារបស់ក្រសួង

ក្រសួងសាធារណការ និងដឹកជញ្ជូននឹងបន្តសហការជាមួយសមត្ថកិច្ចចាត់វិធានការផ្លូវច្បាប់លើអ្នកដែលក្លែងបន្លំជាអ្នកបម្រើសេវាសាធារណៈរបស់ក្រសួង បន្ទាប់ពីឃើញមានការផ្សាយខ្លឹមសារក្នុងន័យជាអ្នកផ្ដល់សេវាសាធារណៈរបស់ក្រសួងក្នុងបណ្ដាញសង្គម។

ក្នុងសេចក្ដីជូនដំណឹងកាលពីថ្ងៃទី១០ ខែមករា ក្រសួងសាធារណការឱ្យដឹងថារាល់ការផ្សាយពីការរត់ការធ្វើឯកសារយានយន្ត និងលិខិតអនុញ្ញាតផ្សេងដែលបានផ្សព្វផ្សាយដោយហ្វេសបុកផេក តិកតុ តេឡេក្រាម និងប្រព័ន្ធបណ្ដាញសង្គមនានា ជាព័ត៌មានមិនពិត បង្កឱ្យសាធារណជនមានការភ័ន្តច្រលំ និងប៉ះពាល់ដល់កិត្តិយសសេចក្ដីថ្លៃថ្នូររបស់ក្រសួង។

ជាការឆ្លើយតបក្រសួងបាន​សហការជាមួយសមត្ថកិច្ចចាត់វិធានការលើបណ្ដាញសង្គមទាំងនោះហើយ និងបន្តសហការចាត់វិធានការតាមផ្លូវច្បាប់ផងដែរ។

ក្រសួងបានអំពាវនាវដល់សាធារណជនជៀសវាងការប្រើប្រាស់សេវាសាធារណៈក្រៅផ្លូវការ ដែលនាំឱ្យខាតបង់ពេលវេលា ព្រមទាំងថវិកា និងសូមមកទទួលសេវាសាធារណៈ នៅតាមមណ្ឌលផ្តល់សេវារបស់ក្រសួងសាធារណការ និងដឹកជញ្ជូន។

បើតាមសេចក្ដីប្រកាសនោះ ការក្លែងបន្លំជាអ្នកផ្ដល់សេវាសាធារណៈទាំងនោះមានដូចជា ការផ្តល់សេវាសាធារណៈចុះបញ្ជីយានយន្ត ត្រួតពិនិត្យលក្ខណៈបច្ចេកទេសយានជំនិះ លិខិតអនុញ្ញាតឱ្យយានយន្តធ្វើអាជីវកម្មដឹកជញ្ជូនផ្លូវគោកក្នុងប្រទេស បណ្ណបើកបរយានយន្ត និងបណ្ណអនុញ្ញាតបើកបរអន្តរជាតិជាដើម៕

អត្ថបទដោយ ហ៊ុន សិរីវឌ្ឍន៍