ព័ត៌មានអន្ដរជាតិ

ប្រមុខអង្គការណាតូ ប្រាប់ឲ្យសមាជិកខ្លួន រៀនសូត្រតាមរុស្ស៊ី

បានផុស

១ សប្តាហ៍ មុន

នៅ

ថ្ងៃអង្គារ ១៤ មករា ២០២៥

ដោយ

ឆ្លើយតបទៅនឹងសំណួរនៅចុងកិច្ចប្រជុំរួមរបស់គណៈកម្មាធិការកិច្ចការបរទេសសភាអឺរ៉ុប (AFET) និងអនុគណៈកម្មាធិការសន្តិសុខនិងការពារជាតិ (SEDE) កាលពីថ្ងៃចន្ទទី១៣ខែមករាឆ្នាំ២០២៥ ប្រមុខអង្គការណាតូ លោក ម៉ាក រូតេ (Mark Rutte) បានប្រាប់ឲ្យសមាជិកខ្លួនទាំងអស់ ត្រូវរៀនសូត្រតាមប្រទេសរុស្ស៊ី រឿងបង្កើនការចំណាយផ្នែកយោធារបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអះអាងថា «ត្បិតថាឥឡូវសមាជិករបស់យើង២ភាគ៣ បានបំពេញតាមគោលដៅចំណាយ២%នៃ GDP របស់ពួកគេក៏ពិតមែន ប៉ុន្តែវាមិនគ្រប់គ្រាន់ឡើយដើម្បីការពារខ្លួនពីទីក្រុងមូស្គូ។ ឥឡូវយើងមានសុវត្ថិភាពមែន ប៉ុន្តែ៤-៥ឆ្នាំខាងមុខ មើលមិនឃើញទេ។ ខ្ញុំគ្រាន់តែចង់ឲ្យអ្នកចំណាយប្រាក់បន្ថែមទៀតប៉ុណ្ណោះ មិនមែនខ្ញុំថា២%មិនគ្រប់គ្រាន់ ហើយកំណត់គោលដៅថ្មីលើសនេះទេ»។

លោកសង្កត់ធ្ងន់ថា «ណាតូត្រូវការពេលមួយឆ្នាំឯណោះដើម្បីផលិតអាវុធនិងគ្រាប់កាំភ្លើង ឲ្យបានស្មើនឹងបរិមាណដែលរុស្ស៊ីផលិតដោយចាយពេលត្រឹម៣ខែ។ សូមមើលរុស្ស៊ីទៅ! ពួកគេកំពុងចំណាយរហូតដល់ ៩% នៃ GDP របស់ខ្លួនលើវិស័យយោធា»។

ជុំវិញការបង្កើនថ្លៃចំណាយរបស់ណាតូនេះដែរ កាលពីសប្តាហ៍មុន ប្រធានាធិបតីជាប់ឆ្នោតអាមេរិក លោក ដូណាល់ ត្រាំ បានជំរុញឲ្យសមាជិកអង្គការនេះទាំងអស់ ត្រូវបង្កើនការចំណាយលើវិស័យការពារជាតិដល់ ៥% នៃ GDP។

លោកប្រាប់អ្នកសារព័ត៌មានកាលពីថ្ងៃទី៧ខែមករាឆ្នាំ២០២៥ថា សមាជិកណាតូទាំងអស់ អាចមានលទ្ធភាពក្នុងការបង្កើនថវិកាការការពារជាតិរបស់ពួកគេឲ្យដល់ ៥% មិនមែន ២% ដូចពេលបច្ចុប្បន្ននេះឡើយ។

លោក ត្រាំ បានរិះគន់ជាយូរណាស់មកហើយទៅលើអង្គការណាតូ ហើយកាលពីខែធ្នូឆ្នាំ២០២៤ លោកបានគំរាមជាថ្មីម្ដងទៀតថា អាមេរិកនឹងដកខ្លួនចេញពីសម្ព័ន្ធភាពយោធាមួយនេះ បើសមាជិកនីមួយៗមិនព្រមបង្កើនការចំណាយការការពារជាតិរបស់ខ្លួនទេនោះ។

សូមបញ្ជាក់ថា បច្ចុប្បន្ន គ្រាន់តែអាមេរិកអាឯង បានរួមចំណែកដល់ទៅ ៦០% ឯណោះលើថ្លៃចំណាយយោធារបស់ណាតូ។ ដូច្នេះបើគ្មានទីក្រុងវ៉ាស៊ីនតោនទេនោះ សមាជិកណាតូអឺរ៉ុប នឹងត្រូវបង្កើនការចំណាយរហូតដល់ ១០% នៃ GDP របស់ពួកគេ៕

អត្ថបទ៖ សុខ សុវណ្ណ

ចុចអាន៖ លោក ត្រាំ៖ សមាជិកណាតូ គួរបង្កើនប្រាក់ការពារជាតិឲ្យដល់ ៥% នៃ GDP