ព័ត៌មានជាតិ

រដ្ឋាភិបាល និងWorld Vision ដាក់អនុវត្តន៍គម្រោងពង្រឹងសមភាពយេនឌ័រ និងអាហារូបត្ថម្ភក្នុងខេត្តក្រចេះ

បានផុស

១ សប្តាហ៍ មុន

នៅ

ថ្ងៃអង្គារ ១៤ មករា ២០២៥

ដោយ

អង្គការទស្សនៈពិភពលោក World Vision ដោយមានកិច្ចសហការជាមួយក្រសួងសុខាភិបាល ក្រសួងកិច្ចការនារី និងក្រសួងអភិវឌ្ឍន៍ជនបទ នឹងចាប់ផ្ដើមអនុវត្តន៍គម្រោងពង្រឹងសមភាពយេនឌ័រ និងអាហារូបត្ថម្ភរបស់ខ្លួនដែលនឹងផ្ដល់អត្ថប្រយោជន៍ដល់ប្រជាជនជាង៣ម៉ឺននាក់នៅក្នុងស្រុកព្រែកប្រសព្វនៃខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីប្រកាសព័ត៌មានអង្គការទស្សនៈពិភពលោកឱ្យដឹងថាគម្រោងខាងលើបានចាប់ផ្ដើមពីថ្ងៃទី៨ ខែមករា ឆ្នាំ២០២៥ រហូតដល់ឆ្នាំ២០២៩ ក្នុងគោលបំណងឱ្យប្រសើរឡើងនូវអាហារូបត្ថម្ភ សិទ្ធិដែលទាក់ទងនឹងអាហារូបត្ថម្ភ និងភាពសមភាពយេនឌ័រ សម្រាប់អ្នកមានជីវភាពក្រីក្រ និងអ្នកដែលត្រូវបានគេរំលង ដោយផ្តោតជាពិសេសលើស្ត្រី ក្មេងស្រីវ័យជំទង់ និងកុមារដែលមានអាយុក្រោម ៥ ឆ្នាំ។

គម្រោងនេះដែលមានតម្លៃ ៤៣៤ ០៧៤ ដុល្លារអាមេរិកនេះនឹងរួមចំណែកដោយផ្ទាល់ទៅនឹងគោលដៅយុទ្ធសាស្រ្តបញ្ចកោណរបស់រដ្ឋាភិបាលកម្ពុជាក្នុងការការអភិវឌ្ឍធនធានមនុស្ស និងការអភិវឌ្ឍដែលមានភាពធន់ ការអភិវឌ្ឍប្រកបដោយចីរភាព និងបរិយាបន្ន។ ព្រមទាំងចូលរួមដល់គោលដៅអភិវឌ្ឍន៍ប្រកបដោយចីរភាពSDG លេខ ២ ការលុបបំបាត់ការអត់ឃ្លាន និងលេខ៥ ភាពសមភាពយេនឌ័ររបស់អង្គការសហប្រជាជាតិ។

ប្រធានគម្រោងលើកកម្ពស់សមភាពយេនឌ័រក្នុងកម្មវិធីអាហារូបត្ថម្ភ ReactsIn នៃអង្គការទស្សនៈពិភពលោកកាណាដា លោកវេជ្ជបណ្ឌិត អាស្រាត តូឡូសូ (Asrat Tolosso) បាននិយាយថា៖ «កុមាររីកចម្រើន និងឈានដល់សក្តានុពលពេញលេញរបស់ពួកគេ នៅពេលពួកគេទទួលបានការថែទាំពីម្ដាយ និងឪពុក។ ទោះបីជាម្តាយជាអ្នកទទួលខុសត្រូវចម្បង ជាពិសេសនៅក្នុងផ្នែកដូចជាការផ្តល់អាហារ ការថែទាំ និងការស្វែងរកសេវាថែទាំសុខភាពក៏ដោយ ក៏ឪពុកមានតួនាទីសំខាន់ក្នុងការអភិវឌ្ឍរបស់កូនៗផងដែរ»។

អភិបាលរងខេត្តក្រចេះលោកស្រី ខាំ សុភាព បាននិយាយក្នុងពេលបើកអនុវត្តគម្រោងថាដោយលើកទឹកចិត្តដល់ភាគីពាក់ព័ន្ធទាំងអស់ចូលរួមក្នុងការអនុវត្តគម្រោងនេះដោយយកចិត្តទុកដាក់ចំពោះការអនុវត្ត និងបើកចំហរទៅនឹងការរៀនសូត្រអ្វីថ្មីៗពីគម្រោង ដើម្បីបម្រើសហគមន៍ឱ្យកាន់តែប្រសើរ និងធ្វើឱ្យសុខភាពកុមារនៅស្រុកព្រែកប្រសព្វកាន់តែប្រសើរ។

គួរឱ្យដឹងដែរថាគម្រោងលើកកម្ពស់សមភាពយេនឌ័រក្នុងកម្មវិធីអាហារូបត្ថម្ភហៅកាត់ជាភាសាអង់គ្លេសថា (ReactsIn) ដែលបានពីមូលនិធិរដ្ឋាភិបាលកាណាដា តាមរយៈកិច្ចការងារអន្តរជាតិកាណាដា (GAC)។ កម្ពុជាគឺជាប្រទេសទីប្រាំដែលចូលរួមក្នុងគម្រោងនេះបន្ទាប់ពីប្រទេស បង់ក្លាដែស កេនយ៉ា សូម៉ាលី និងតង់ហ្សានី ដោយនាំមកនូវវិធីសាស្រ្តពិសេសមួយដើម្បីដោះស្រាយបញ្ហាអាហារូបត្ថម្ភកុមារតាមរយៈការពង្រឹងសមភាពយេនឌ័រ៕