ឆេះភ្នំនៅថៃ បង្កការភ្ញាក់ផ្អើលនិងភ័យរន្ធត់

កាលពីរាត្រីថ្ងៃពុធទី១៥ខែមករាឆ្នាំ២០២៥ ខេត្តឈុនបុរី នៃប្រទេសថៃ បានកើតមានភ្លើងឆេះភ្នំ យ៉ាងសន្ធោសន្ធៅ ធ្វើឲ្យពលរដ្ឋភ្ញាក់ផ្អើលនិងភ័យរន្ធត់យ៉ាងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Khaosod, ហេតុការណ៍នេះកើតឡើងនៅម៉ោង៩:៣០នាទីយប់ ក្នុងភូមិ៤ នៃឃុំ Pong ស្រុក Bang Lamung ហើយរាលដាលយ៉ាងខ្លាំង គំរាមកំហែងដល់វត្តលើភ្នំផងដែរ។

ភ្លាមៗនោះ ក្រុមពន្លត់អគ្គិភ័យក៏ត្រូវបានបញ្ជូនទៅដើម្បីពន្លត់ភ្លើងផងដែរ ប៉ុន្តែដោយសារវាមានទំហំធំពេក ហើយរាលដាលខ្លាំងដោយសារខ្យល់បក់និងព្រៃស្ងួត ស្ថានការណ៍មិនអាចគ្រប់គ្រងបានឡើយ។

ទោះបីជាយ៉ាងណាក៏ដោយ មិនមានការបញ្ជាឲ្យជម្លៀសពលរដ្ឋនោះទេព្រោះតែទីតាំងឆេះ ហាក់នៅឆ្ងាយពីតំបន់លំនៅដ្ឋានប្រជាជនរស់នៅគួរសម ខណៈភ្លាមៗ ក៏មិនទាន់មានសេចក្តីរាយការណ៍អំពីទំហំនៃការខូចខាតដែរ ប៉ុន្តែគេបារម្ភថា គុណភាពខ្យល់ដែលបណ្តាលមកពីផ្សែងភ្លើង នឹងប៉ះពាល់ដល់សុខភាពមនុស្ស។

គេនៅមិនទាន់ដឹងឡើយថាតើអគ្គិភ័យនេះ បណ្តាលមកពីអ្វី ប៉ុន្តែបើតាមធម្មតា រាល់ឆ្នាំឲ្យតែដល់ខែធ្លាក់ខ្យល់ ប្រទេសថៃ តែងកើតមានភ្លើងឆេះព្រៃជានិច្ច គ្រាន់តែថាឆ្នាំនេះ រដូវភ្លើងឆេះព្រៃ ហាក់កើតឡើងលឿនជាងសព្វមួយដង៕

អត្ថបទ៖ សុខ សុវណ្ណ

ចុចអាន៖ ទិន្នន័យសំខាន់ៗ​​ក្នុងហេតុការណ៍​ភ្លើង​ឆេះ​ព្រៃ​​នៅ LA រយៈពេល​១ស​ប្តាហ៍​ដល់​ថ្ងៃ​​អង្គារ​នេះ​​