អ្នកសិល្បៈ និងអ្នកមានធនធាន ស្រាក់ដៃគ្នាជួយប្រមូលទិញស្រូវពីកសិករ

ក្រោយរាជរដ្ឋាភិបាលទម្លាក់ថវិកា ដើម្បីអន្តរាគមន៍ទិញស្រូវដែលកំពុងធ្លាក់ថ្លៃពីកសិករ សិល្បករ និងអ្នកមានធនធានមួយចំនួន ក៏បានចេញមុខជួយទិញទិន្នផលស្រូវពូជ OM ដែលកំពុងធ្លាក់ថ្លៃខ្លាំងនេះផងដែរ ដេីម្បីចូលរួមរក្សាស្ថិរភាពតម្លៃស្រូវអង្ករ និងសន្តិសុខស្បៀងរបស់កម្ពុជា។ ក្នុងនោះរួមមានកំពូលតារាចម្រៀង ឧកញ៉ា ព្រាប សុវត្ថិ; ឧកញ៉ា ខេមរៈ សិរីមន្ត; លោក ខាន់ ជេមស៌ ជំទាវឧកញ៉ា សុខ រស្មី ក៏ដូចជាអ្នកមានធនធានមួយចំនួនទៀត។

គួរជម្រាបថា ដើម្បីរួមចំណែករក្សាស្ថិរភាពតម្លៃស្រូវអង្ករ និងសន្តិសុខស្បៀងរបស់កម្ពុជា កាលពី​រសៀល​ថ្ងៃ​ទី ១៥ ខែ​មករា ម្សិលមិញនេះ កំពូលតារាចម្រៀង ឧកញ៉ា ព្រាប សុវត្ថិ និងឧកញ៉ា ខេមរៈ សិរីមន្ត បានប្រកាសជួយទិញស្រូវពីប្រជាកសិករចំនួន ៥០តោន ពីប្រជាពលរដ្ឋ​ដែល​កំពុង​មាន​ជីវភាព​ខ្វះខាត។

ដោយឡែក លោក ខាន់ ជេមស៌ ក៏បានប្រកាសជួយទិញស្រូវពីប្រជាកសិករចំនួន ២០ តោន ដោយយល់ឃើញថា ការរួមចំណែកជួយទិញស្រូវពីកសិករ ជាយុទ្ធសាស្ត្រដ៏ល្អមួយ។

ក្រៅពីសិល្បករទាំង ៣រូប ក៏នៅមានអ្នកធនធានមួយចំនួនទៀត ប្រកាសប្រមូលទិញស្រូវពីប្រជាកសិករផងដែរ។ ខណៈជំទាវឧកញ៉ា សុខ រស្មី ដែលមហាជនតែងស្គាល់តាមរយៈសកម្មភាពកម្សាន្តផ្សព្វផ្សាយពីការប្រកបរបររបស់ប្រជាពលរដ្ឋនោះ ក៏បានទៅកាន់ទឹកដីខេត្តបាត់ដំបងហើយ នៅព្រឹកថ្ងៃទី១៦ មករានេះ ដោយបានប្រមូលទិញស្រូវចំនួន ១០តោន​ ពីបងប្អូនប្រជាកសិករខ្មែរនៅទីនោះ ដើម្បីត្រៀមចែកជូនអ្នកដែលខ្វះខាត។ ក្នុងនោះ ក៏នៅមានក្រុមហ៊ុន និងឃ្លាំងស្រូវអង្ករ ជួយប្រមូលទិញស្រូវអង្ករពីប្រជាកសិករផងដែរ៕