នយោបាយ

សម្ដេចតេជោ៖ អ៊ីរ៉ង់អាចជួយកម្ពុជាពង្រឹងសន្ដិសុខថាមពលរបស់ខ្លួន

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ១៦ មករា ២០២៥

ដោយ

ប្រធានព្រឹទ្ធសភា សម្ដេចតេជោ ហ៊ុន សែន បានថ្លែងកោតសរសើលើសមត្ថភាពខ្ពស់របស់អ៊ីរ៉ង់ក្នុងវិស័យបច្ចេកវិទ្យានិងថាមពល ដោយថាប្រទេសនេះអាចគាំទ្រដល់កម្ពុជាក្នុងការពង្រឹសន្ដិសុខថាមពលរដ្ឋរបស់ខ្លួន។

ជំនួបរវាងលោក Nazari និងសម្ដេចតេជោ ហ៊ុន សែន នៅវិមានព្រឹទ្ធសភាថ្ងៃទី១៦ ខែមករា ឆ្នាំ២០២៥

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងជំនួបជាមួយឯកអគ្ករដ្ឋទូតសាធារណរដ្ឋអ៊ីស្លាមអ៊ីរ៉ង់ប្រចាំកម្ពុជា មាននិវេសនដ្ឋាននៅទីក្រុងហាណូយលោក អាលី អាកបារ ណាហ្សារី (Ali Akbar Nazari) នៅវិមានព្រឹទ្ធសភាកម្ពុជាព្រឹកថ្ងៃទី១៦ ខែមករា ឆ្នាំ២០២៤ សម្ដេចតេជោ ហ៊ុន សែន បានរំលឹកពីការធ្វើដំណើរទៅចូលរួមកិច្ចប្រជុំកំពូលចលនាមិនចូលបក្សសម្ព័ន្ធនៅទីក្រុងតេអេរ៉ង់កាលពីឆ្នាំ២០១២ ដោយបានសង្កេតឃើញនូវសក្ដានុពលរបស់ប្រទេសអ៊ីរ៉ង់។ សម្ដេចបានផ្ដល់អនុសាសន៍គាំទ្រដល់ប្រទេសនេះក្នុងការលើកកម្ពស់ភាពជាដៃគូសេដ្ឋកិច្ច ពាណិជ្ជកម្ម តាមរយៈការជំរុញស្នូលទៅលើការបង្កើតគណៈកម្មការចម្រុះសេដ្ឋកិច្ច-ពាណិជ្ជកម្ម ដែលនឹងក្លាយជាយន្តការផ្លាស់ប្តូរការពិភាក្សាគ្នាទៅលើវិស័យទាំងនេះ ក៏ដូចជាវិស័យដទៃទៀត។

សម្ដេចតេជោប្រទេសអ៊ីរ៉ង់ក៏អាចជួយគាំទ្រកម្ពុជាក្នុងការពង្រឹងសន្ដិសុខថាមពលរបស់ខ្លួនផងដែរ។

ឯកអគ្គរដ្ឋទូតអ៊ីរ៉ង់លោក Nazari បានលើកឡើងថាទំនាក់ទំនងកម្ពុជា-អ៊ីរ៉ង់គឺជាទំនាក់ទំនងមិត្តភាព និងស្ថាបនា ដើម្បីពង្រឹងសន្ទុះទំនាក់ទំនងរវាងប្រទេសទាំងពីរលោកបានស្នើជំរុញឱ្យមានការផ្លាស់ប្ដូរទស្សនកិច្ចរវាងប្រទេសទាំងពីរឱ្យបានញឹកញ៉ាប់ផងដែរ។

លោកបន្ថែមថាអ៊ីរ៉ង់គាំទ្រកម្ពុជាក្នុងការអភិវឌ្ឍ និងធ្វើទំនើបកម្មវិស័យសុខភាពសាធារណៈ ក៏ដូចជាការពង្រឹងកិច្ចសហប្រតិបត្តិការលើវិស័យបច្ចេកវិទ្យា វិស្វកម្ម ឧស្សាហកម្ម និងវិស័យដទៃទៀត ដូចជាទេសចរណ៍ជាដើម។

អ្នកវិភាគភូមិសាស្រ្តនយោបាយ និងសន្ដិសុខ លោក ថុង ម៉េងដាវិត យល់ថាកម្ពុជាអាចទាញប្រយោជន៍បានពីទំនាក់ទំនងជាមួយរដ្ឋអ៊ីស្លាមអ៊ីរ៉ង់ក្នុងពេលដែលប្រទេសនេះមានសក្ដានុពលខ្លាំងទាក់ទងនឹងវិស័យថាមពល។ កម្ពុជាដែលមានជំហរអព្យាក្រឹតក្នុងភូមិសាស្ត្រនយោបាយពិភពលោកអាចជាដៃគូដ៏ល្អរបស់អ៊ីរ៉ង់។

លោកថា៖ «មូលដ្ឋានឧស្សាហកម្មដ៏រឹងមាំរបស់អ៊ីរ៉ង់ក្នុងការផលិតថាមពល អាចជួយបំពេញតម្រូវការថាមពលរបស់ប្រទេសកម្ពុជា ជាពិសេសជាមួយនឹងតម្រូវការអគ្គិសនី និងប្រេងឥន្ធនៈដែលកំពុងកើនឡើង»។

ទោះជាយ៉ាងណាលោកយល់ថាទំនាក់ទំនងនេះក៏ត្រូវទទួលស្គាល់ពីហានិភ័យដែលអាចកើតមានទាក់ទងនឹងជំហរអន្តរជាតិរបស់អ៊ីរ៉ង់ផងដែរជាពិសេសទាក់ទងនឹងការដាក់ទណ្ឌកម្ម និងអស្ថិរភាពក្នុងតំបន់។

ទំនាក់ទំនងការទូតរវាងកម្ពុជានិងអ៊ីរ៉ង់បង្កើតឡើងកាលពីឆ្នាំ១៩៩២ រហូតមកដល់ពេលនេះមានរយៈពេល៣៣ឆ្នាំហើយ៕

អត្ថបទដោយ ហ៊ុន សិរីវឌ្ឍន៍