ព័ត៌មានអន្ដរជាតិ

ថៃព្យាយាមចរចា ក្រោយចិនហាមឃាត់ការនាំចូលទឹកស្ករអំពៅជុំវិញកង្វល់អនាម័យ

បានផុស

២៣ វិនាទី មុន

នៅ

ថ្ងៃព្រហស្បតិ៍ ១៦ មករា ២០២៥

ដោយ

អាជ្ញាធរថៃបានឱ្យដឹងថា ខ្លួនស្វែងរកការចរចាជាមួយភាគីចិន ដែលហាមឃាត់ការនាំចូលទឹកស្ករអំពៅ និងម្សៅលាយផ្អែម ជុំវិញកង្វក់អនាម័យពីរោងចក្រថៃ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុលេខាអចិន្ត្រៃយ៍នៃក្រសួងឧស្សាហកម្ម លោក Virit Viseshsindh បានថ្លែងថា អាជ្ញាធរចិនបានស្នើឱ្យប្រទេសថៃត្រួតពិនិត្យរោងចក្រប្រមាណ ៧៨ មុនពេលបើកការចរចា ដើម្បីលុបចោលការហាមឃាត់កាលពីខែមុន លើការនាំចូលទៅចិននូវទឹកស្ករអំពៅ និងម្សៅលាយផ្អែមពីប្រទេសថៃ។ លោកអះអាងថា អាជ្ញាធរថៃកំពុងអនុវត្តតាមការទាមទារនេះ។

លោក Virit បាននិយាយដោយសំដៅទៅរដ្ឋបាលទូទៅនៃគយចិនថា៖ « GACC ចង់ឲ្យការត្រួតពិនិត្យស្តង់ដាររបស់យើងកាន់តែតឹងរុឹង»។

គួរសបញ្ជាក់ថា ថៃ គឺជាប្រទេសនាំចេញស្ករសធំជាងគេទី២របស់ពិភពលោក និងជាអ្នកផ្គត់ផ្គង់ទឹកស្ករដ៏សំខាន់សម្រាប់ចិនជាមួយនឹងការនាំចេញទៅកាន់ប្រទេសនេះជាង ១,២ លានតោន កាលពីឆ្នាំមុន។ នេះបើយោងតាមទិន្នន័យពីក្រុមហ៊ុនផ្គត់ផ្គង់ខ្សែសង្វាក់ផ្គត់ផ្គង់ Czarnikow ។

អគ្គនាយកនៃនាយកដ្ឋានពាណិជ្ជកម្មបរទេសថៃ លោកស្រី Arada Fuangtong បាននិយាយថា កាលពីខែធ្នូ ប្រទេសចិនបានផ្អាកការនាំចូលទឹកស្ករថៃ និងម្សៅលាយផ្អែម ដោយសារតែការព្រួយបារម្ភអំពីអនាម័យរបស់រោងចក្រថៃ។ លោកស្រីបន្តថា៖ «អាជ្ញាធរថៃចង់ចរចាបញ្ចប់ការផ្អាកនេះ»។

យោងតាមអ្នកវិភាគពីក្រុមហ៊ុន Citi លោក Arkady Gevorkyan ការហាមប្រាមរបស់ចិន ធ្វើឱ្យទឹកស្ករ និងម្សៅលាយផ្អែម តម្លៃប្រហែល ៤០០ លានបាត ជាប់គាំងលើកប៉ាល់នាពេលបច្ចុប្បន្ន។

ប្រភពក្នុងឧស្សាហកម្មមួយរូប បានប្រាប់រ៉យទ័រថា អាជ្ញាធរក្នុងប្រទេសថៃបានព្រួយបារម្ភកាន់តែខ្លាំងពីបំរាមរបស់ចិន ដោយអាចប៉ះពាល់ដល់តម្លៃដែលកសិករអំពៅថៃទទួលបាន៕