ព័ត៌មានអន្ដរជាតិ

រុស្ស៊ី និងអ៊ីរ៉ង់ ត្រៀមចុះហត្ថលេខាសន្ធិសញ្ញា «ភាពជាដៃគូយុទ្ធសាស្ត្រគ្រប់ជ្រុងជ្រោយ»

បានផុស

១ សប្តាហ៍ មុន

នៅ

ថ្ងៃសុក្រ ១៧ មករា ២០២៥

ដោយ

Chheang

រុស្ស៊ី និងអ៊ីរ៉ង់ នឹងចុះហត្ថលេខាលើសន្ធិសញ្ញា «ភាពជាដៃគូយុទ្ធសាស្ត្រគ្រប់ជ្រុងជ្រោយ» នៅថ្ងៃសុក្រទី១៧ខែមករាឆ្នាំ២០២៥នេះ ដើម្បីពង្រឹងទំនាក់ទំនងរវាងសម្ព័ន្ធមិត្តទាំងពីរដែលជាប្រទេសរងទណ្ឌកម្មខ្លាំងបំផុតរបស់ពិភពលោក។

លោក Masoud Pezeshkian ប្រធានាធិបតីអ៊ីរ៉ង់ និងលោក Vladimir Putin ប្រធានាធិបតីរុស្ស៊ី (រូបភាព៖ ការិយាល័យរដ្ឋាភិបាលរុស្ស៊ី)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សន្ធិសញ្ញានេះ ធ្វើឡើងក្នុងអំឡុងដំណើរទស្សនកិច្ចទៅកាន់ទីក្រុងមូស្គូរបស់ប្រធានាធិបតីអ៊ីរ៉ង់ លោក Masoud Pezeshkian ហើយត្រូវបានធ្វើឡើងត្រឹមតែបីថ្ងៃប៉ុណ្ណោះ មុនពេលដែលលោក ដូណាល់ ត្រាំ ចូលកាន់តំណែងផ្លូវការជាប្រធានាធិបតីអាមេរិក និងខណៈដែលទីក្រុងមូស្គូ និងក្រុងតេហេរ៉ង់ស្វែងរកទំនាក់ទំនងរបស់ពួកគេជាផ្លូវការបន្ទាប់ពីកិច្ចសហប្រតិបត្តិការកាន់តែស៊ីជម្រៅអស់ជាច្រើនឆ្នាំ។

យោងតាមមន្ត្រីអ៊ុយក្រែន និងលោកខាងលិច ប្រទេសអ៊ីរ៉ង់បានផ្គត់ផ្គង់រុស្ស៊ីនូវដ្រូនអត្តឃាត «Shahed» ដែលទីក្រុងមូស្គូបានប្រើនៅក្នុងសង្គ្រាមឈ្លានពានអ៊ុយក្រែន។ បន្ថែមពីនេះ ប្រទេសទាំងពីរបានបង្កើនទំហំពាណិជ្ជកម្មចំពេលមានទណ្ឌកម្មរបស់លោកខាងលិច។

វិមានក្រឹមឡាំង បានប្រកាសកាលពីថ្ងៃពុធថា សន្ធិសញ្ញាថ្មីនឹងពង្រឹងទំនាក់ទំនង «យោធា-នយោបាយ និងសេដ្ឋកិច្ច» របស់ទីក្រុងតេហេរ៉ង់ និងទីក្រុងមូស្គូ ដោយមិនបានផ្តល់ព័ត៌មានលម្អិតបន្ថែមនោះទេ។

ទីក្រុងតេហេរ៉ង់ បានផ្តល់ព័ត៌មានតិចតួចអំពីសន្ធិសញ្ញានៅថ្ងៃសុក្រនេះ ប៉ុន្តែបានច្រានចោលឃ្លា «ការពារគ្នាទៅវិញទៅមក» ដូចអ្វីដែលបានរួមបញ្ចូលនៅក្នុងសន្ធិសញ្ញារបស់រុស្ស៊ីជាមួយកូរ៉េខាងជើងកាលពីឆ្នាំមុន។

ចំណែកឯរុស្ស៊ីនិយាយថា សន្ធិសញ្ញានាពេលខាងមុខរបស់ខ្លួនជាមួយអ៊ីរ៉ង់ និងសន្ធិសញ្ញាដែលបានចុះហត្ថលេខារួចហើយជាមួយក្រុងព្យុងយ៉ាង គឺ «មិនមានទិសដៅប្រឆាំងនឹងប្រទេសណាមួយឡើយ»៕

ដោយ៖ ឈាង