ព័ត៌មានអន្ដរជាតិ

លោក បៃដិន មិនទាន់អនុវត្តការបិទ TikTok ទេ ដោយទុកភារៈនេះឲ្យ ដូណាល់ ត្រាំ

បានផុស

២១ វិនាទី មុន

នៅ

ថ្ងៃសុក្រ ១៧ មករា ២០២៥

ដោយ

Chheang

យោងតាមសារព័ត៌មាន AP ប្រធានាធិបតីអាមេរិក លោក ចូ បៃដិន នឹងមិនអនុវត្តការហាមប្រាមលើបណ្ដាញសង្គម TikTok នៅថ្ងៃទី១៩ខែមករាឆ្នាំ២០២៥ខាងមុខទេ ដោយទុកកិច្ចការនេះឲ្យលោក ដូណាល់ ត្រាំ ដែលជាប្រធានាធិបតីទើបជាប់ឆ្នោត ជាអ្នកសម្រេចវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការហាមប្រាមនេះ ត្រូវបានគេសន្មត់ថានឹងធ្វើឡើងមួយថ្ងៃមុនពេលលោក ត្រាំ ចូលស្បថឡើងកាន់តំណែងជាផ្លូវការនាថ្ងៃទី២០ខែមករា បន្ទាប់ពីបានឈ្នះនៅក្នុងការបោះឆ្នោតកាលពីខែវិច្ឆិកា។

ច្បាប់មួយដែលបានចុះហត្ថលេខាដោយ លោក បៃដិន កាលពីឆ្នាំមុន បានត្រូវសភាអាមេរិកតម្រូវឲ្យ ByteDance ដែលជាក្រុមហ៊ុនមេរបស់ TikTok ហើយមានមូលដ្ឋាននៅប្រទេសចិន លក់បណ្ដាញសង្គមរបស់ខ្លួន ឬក៏ប្រឈមនឹងការហាមប្រាមនៅសហរដ្ឋអាមេរិក ក្រោមហេតុផលសន្ដិសុខជាតិ។

ក្នុងអំឡុងពេលអាណត្តិប្រធានាធិបតីដំបូង លោក ត្រាំ ធ្លាប់បានព្យាយាមបិទ TikTok ម្ដងរួចមកហើយ។ ប៉ុន្តែបន្ទាប់ពីលោកបានចូលរួមជាមួយ TikTok ក្នុងអំឡុងពេលយុទ្ធនាការបោះឆ្នោតឆ្នាំ២០២៤ លោកបាននិយាយថា លោកនឹង «រក្សាទុក TikTok» ខណៈបណ្ដាញសង្គមមួយនេះជួយលោកឲ្យទទួលបានសំឡេងគាំទ្រពីយុវជនកាន់តែច្រើន។

គួរបញ្ជាក់ថា មនុស្សជាង ១៧០លាននាក់នៅអាមេរិក កំពុងប្រើប្រាស់ TikTok ជារៀងរាល់ខែ ប៉ុន្តែបានប្រឈមមុខនឹងការត្រួតពិនិត្យយ៉ាងតឹងរ៉ឹងជុំវិញកង្វល់សន្តិសុខជាតិ ដោយសារតែភាពជិតស្និទ្ធរបស់ក្រុមហ៊ុន ByteDance ជាមួយរដ្ឋាភិបាលចិន ដែលសហរដ្ឋអាមេរិកចាត់ទុកថាជាសត្រូវបរទេស៕

ដោយ៖ ឈាង