មនុស្ស ៦០ នាក់ ស្លាប់ក្នុងអំពើហិង្សារបស់ក្រុមឧទ្ទាមនៅប្រទេស កូឡុំប៊ី

ចំនួនមនុស្សស្លាប់ក្នុងការវាយប្រហារដោយក្រុមឧទ្ទាម ELN នៅតំបន់ Catatumbo ជិតព្រំដែនប្រទេសកូឡុំប៊ី ជាមួយវេណេស៊ុយអេឡា បានកើនឡើងដល់៦០នាក់ហើយ។ នេះបើយោងតាមការចេញផ្សាយរបស់សារប័ត៌មាន​ Bangkok Post កាលពីថ្ងៃអាទិត្យទី១៩ខែមករាឆ្នាំ២០២៥។

ការប្រយុទ្ធគ្នានៅប៉ុន្មានថ្ងៃថ្មីៗនេះ គឺរវាងពួកឧទ្ទាមមកពីកងទ័ពរំដោះជាតិឆ្វេងនិយម (ELN) ដែលជាក្រុមប្រដាប់អាវុធដ៏ធំបំផុតក្នុងប្រទេសកូឡុំប៊ី ជាមួយកងកម្លាំងប្រដាប់អាវុធបដិវត្តន៍កូឡុំប៊ី (FARC) ស្របពេល ELN ក៏ប៉ះទង្គិចជាមួយក្រុម Clan del Golfo ដែលជាកងកម្លាំងប្រដាប់អាវុធស្តាំនិយម និងក្រុមជួញដូរកូកាអ៊ីនដ៏ធំបំផុតរបស់ប្រទេសនេះផងដែរ។

ឧត្តមសេនីយ៍ Luis Emilio Cardozo មេបញ្ជាការយោធាបាននិយាយកាលពីថ្ងៃសៅរ៍ថា «ស្ថានការណ៍ក្នុងតំបន់បានឈានដល់កម្រិតធ្ងន់ធ្ងរ។ ELN បានចាប់មនុស្សចេញពីផ្ទះយកទៅសម្លាប់ ហើយនេះគឺជាអំពើរំលោភសិទ្ធិមនុស្ស។

គួរបញ្ជាក់ថាបន្ទាប់ពីជាប់ឆ្នោតនៅឆ្នាំ២០២២ ប្រធានាធិបតី Gustavo Petro បានចាប់ផ្តើមការចរចាជាមួយ ELN និងក្រុមប្រដាប់អាវុធផ្សេងទៀតដែលនៅតែគ្រប់គ្រងផ្នែកខ្លះនៃប្រទេសកូឡុំប៊ី ដើម្បីស្វែងរកសន្តិភាពឲ្យបានពេញលេញ ប៉ុន្តែ​លោក​បាន​ផ្អាក​ដំណើរ​ការ​នេះក្នុង​អំឡុង​ពេលមានភាព​ចលាចល​ថ្មី និង​ចោទ​ប្រកាន់​ក្រុម​នេះ​ថា​បាន​ប្រព្រឹត្ត​ឧក្រិដ្ឋកម្ម​សង្គ្រាម។

ជាមួយនឹងយុទ្ធជនប្រហែល ៥ ៨០០ នាក់, ELN គឺជាក្រុមប្រដាប់អាវុធដ៏ធំមួយ ដែលកំពុងសកម្មនៅក្នុងប្រទេសកូឡុំប៊ី។ ក្រុមនេះបានចូលរួមខ្លាំងបំផុតក្នុងការជួញដូរគ្រឿងញៀន ហើយបានក្លាយជាក្រុមឧក្រិដ្ឋកម្មដែលមានឥទ្ធិពលជាងគេនៅក្នុងតំបន់។

ជាមួយគ្នានេះ នៅទូទាំងព្រំដែន វេណេស៊ុយអេឡា ក៏បានប្រកាសចាប់ផ្តើមប្រតិបត្តិការពិសេសមួយ ដើម្បីជួយដល់ជនស៊ីវិលដែលផ្លាស់ទីលំនៅពីប្រទេសកូឡុំប៊ី រាប់រយគ្រួសារឱ្យជ្រកកោននៅប្រទេសនេះបណ្ដោះអាសន្នផងដែរ៕

អត្ថបទ៖ ប៊ុន សុភាព

.