កម្ពុជារកចំណូលបានជិត $៥ ពាន់លាន ពីការនាំចេញកសិកផលក្នុងឆ្នាំ ២០២៤ កើនជិត ៤០%

កម្ពុជាទទួលបានចំណូលជិត ៥ ពាន់លានដុល្លារ (៤,៨) ពីការនាំចេញកសិផលចំនួន ១១,៧ លាន​តោន ទៅក្រៅប្រទេស នៅក្នុងឆ្នាំ ២០២៤ កើនឡើងប្រមាណ ៣៩ ភាគរយ ធៀបនឹងឆ្នាំ ២០២៣ ដែល​មាន​ចំនួន ៨,៤ លានតោន។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។

ផលិតផលកសិកម្មសំខាន់ៗ ដែលនាំចេញពីកម្ពុជារួមមាន ស្រូវ អង្ករ ចេក ដំឡូងមី ស្វាយចន្ទី ផ្លែមៀន ម្រេច និងកសិផលប្រមាណ ១០០ មុខទៀត។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍នៅថ្ងៃទី ២០ ខែមករា ឆ្នាំ ២០​២៥ នេះថា ការនាំចេញកសិកផលរបស់កម្ពុជានៅឆ្នាំ ២០២២ សម្រេចបាន ៨,៦ លាន​តោន ទៅ ៧៤ ប្រទេស ក្នុងនោះមានស្រូវ ៣,៥ លានតោនទៅប្រទេសជិតខាង និងអង្ករ ៦៤ ម៉ឺនតោន ចេញទៅ ៦២ ប្រទេស។

សម្ដេច ហ៊ុន ម៉ាណែត បន្តថា នៅក្នុងឆ្នាំ ២០២៤ កំណើននៃការនាំចេញកសិផលសរុបកើនដល់ ១១,៧ លានតោន ទៅ​ ៩៤ ប្រទេស កើនឡើង ២០ ប្រទេស ក្នុងនោះមានស្រូវជាង ៥ លានតោន (៥១៨០ ១៥៥) និងអង្ករ ៦៥ ម៉ឺនតោន ទៅកាន់ ៧៥ ប្រទេស។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា ការនាំចេញទំនិញ​របស់​​កម្ពុជាមានកំណើន ដោយសារទីផ្សារបញ្ជាទិញ ពោលគឺពាក់ព័ន្ធនឹងអស្ថិរភាពក្នុងតំបន់ ដូច​ជា​អស្ថិរភាព​នយោបាយនៅប្រទេសភូមា បង់​ក្លាដេស បានធ្វើឱ្យរោងចក្រមួយចំនួនរើមកកម្ពុជា ដែល​ធ្វើឱ្យការបញ្ជាទិញមានការកើនឡើងទាំងការវិនិយោគ និងនាំចេញ។

លោកបណ្ឌិត ហុង វណ្ណៈ អ្នកជំនាញ​សេដ្ឋកិច្ច​នៃ​រាជបណ្ឌិត្យសភាកម្ពុជា បានថ្លែងថា ការ​​​​នាំ​​ចេញផលិតផលកសិកម្មមាន​កំណើននៅឆ្នាំ ២០២៤ ខណៈកម្ពុជាមានកិច្ចព្រម​ព្រៀង​​ទីផ្សារសេរីជាមួយបណ្ដាប្រទេសធំៗដែលជាដៃគូ ទាំងទ្វេភាគី និងពហុភាគី ក្នុងនោះមាន​ប្រទេស​ចិន ដែល​​​​​ចិនបានទិញទំនិញកសិផលមួយ​ចំនួនពីកម្ពុជាដូចជា អង្ករ ស្វាយ​កែវរមៀត ចេក​អំបូង​លឿង​ជាដើម ខណៈការនាំចេញកសិផល​របស់កម្ពុជាទៅប្រទេសជិតខាង​ក៏មានកំ​ណើន​​​។

យោងតាមក្រសួងពាណិជ្ជកម្ម ការនាំចេញទំនិញ​​របស់​កម្ពុជាក្នុងឆ្នាំ២០២៤កន្លងទៅនេះ ​​មានទំហំទឹកប្រាក់សរុបជាង ២៦,១៩ ពាន់​លាន​ដុល្លារ កើនឡើង ១៥,៧% ចំណែកឯការនាំទំនិញចូល​មកវិញមាន​ទំហំ​ទឹកប្រាក់ ២៨,៥៤ ពាន់លានដុល្លារ កើន ១៨%។

ទីផ្សារសំខាន់ៗ ដែលកម្ពុជាបាននាំចេញទំនិញទៅរួមមាន៖ ប្រទេសចិន សហរដ្ឋអាមេរិក វៀតណាម ជប៉ុន ថៃរួមនឹងទីផ្សារ​សំខាន់ៗមួយចំនួនទៀត៕

អត្ថបទ៖ ឡេង ដេត