អគ្គិភ័យឆេះសណ្ឋាគារសាហាវបំផុតក្នុងប្រវត្តិសាស្រ្តតួកគី, មនុស្សស្លាប់កើនដល់ ៧៦នាក់ 

គិតត្រឹមព្រឹកថ្ងៃពុធទី២២ខែមករាឆ្នាំ២០២៥ (ពេលវេលានៅកម្ពុជា), តួលេខមនុស្សស្លាប់ដោយសារគ្រោះអគ្គិភ័យដ៏រន្ធត់ឆាបឆេះសណ្ឋាគារ Grand Kartal នៅប្រទេស តួកគី បានកើនឡើងដល់ ៧៦នាក់ហើយ ខណៈ៥១នាក់ រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គិភ័យត្រូវគេរាយការណ៍ថា បានឆាបឆេះចេញពីភោជនីយដ្ឋានមួយនៅជាន់ទី៤ រួចក៏រាលដាលពាសពេញសណ្ឋាគារតែម្តង ដែលមានទីតាំងស្ថិតនៅក្នុងទីក្រុងទេសចរ Kartalkaya នៃខេត្ត Bolu ភាគពាយព្យប្រទេស។

ក្រុមពន្លត់អគ្គិភ័យត្រូវចំណាយពេល១២ម៉ោង ដើម្បីគ្រប់គ្រងភ្លើងបានទាំងស្រុង ហើយក្រោយមក រដ្ឋមន្ត្រីក្រសួងយុត្ថិធម៌លោក Yilmaz Tunc ក៏ប្រាប់ទៅអ្នកសារព័ត៌មានថា មានមនុស្សចំនួន៩នាក់ត្រូវបានចាប់ខ្លួន ពាក់ព័ន្ធហេតុការណ៍នេះ ក្នុងនោះក៏រួមមានទាំងម្ចាស់សណ្ឋាគារផងដែរ។

លោក Yilmaz Tunc និយាយថា រដ្ឋអាជ្ញាបានបើកការស៊ើបអង្កេតករណីអគ្គិភ័យនេះហើយ។ ​សណ្ឋាគារនេះ បានឆ្លងកាត់ការត្រួតពិនិត្យចុងក្រោយក្នុងឆ្នាំ២០២៤ ហើយកាលនោះ រដ្ឋមន្ត្រីទេស​ចរណ៍អះអាងថា គ្មានអ្វីត្រូវបារម្ភឡើយចំពោះបញ្ហាសុវត្ថិភាព ព្រោះគ្រប់ប្រព័ន្ធរៀបចំបានល្អហើយ។

សូមបញ្ជាក់ថា អគ្គិភ័យឆេះសណ្ឋាគារ Grand Kartal នេះ គឺជាគ្រោះអគ្គិភ័យ ដែលសម្លាប់មនុស្សច្រើនបំផុតក្នុងប្រវត្តិសាស្រ្តប្រទេសតួកគី៕

អត្ថបទ៖ សុខ សុវណ្ណ

ចុចអាន៖ អគ្គីភ័យឆេះផ្ទះប្រជាពលរដ្ឋ ២ ខ្នងនៅស្រុកស្ទឹងត្រង់ ព្រោះប្អូនម្ចាស់ផ្ទះជាអ្នកដុត