ព័ត៌មានអន្ដរជាតិ

ត្រាំ៖ អាមេរិកនឹងដាក់ទណ្ឌកម្មរុស្ស៊ីបន្ថែមទៀត បើ ពូទីន មិនព្រមចូលតុចរចាសន្តិភាព

បានផុស

១ ខែ មុន

នៅ

ថ្ងៃពុធ ២២ មករា ២០២៥

ដោយ

Chheang

ប្រធានាធិបតីអាមេរិកលោក ដូណាល់ ត្រាំ បាននិយាយថា ការដាក់ទណ្ឌកម្មបន្ថែមលើរុស្ស៊ីនឹងអាចធ្វើឡើង បើលោកប្រធានាធិបតី វ៉្លាឌឺមៀរ ពូទីន មិនព្រមចូលតុចរចា ដើម្បីបញ្ចប់សង្រ្គាមនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានលើកឡើងកាលពីថ្ងៃទី២២ខែមករាឆ្នាំ២០២៥ថា៖ «សង្រ្គាមមិនគួរចាប់ផ្តើមទេ។ បើអ្នកមានប្រធានាធិបតីដែលមានសមត្ថភាព សង្រ្គាមនឹងមិនកើតឡើងឡើយ។ បើ(ពេលនោះ)ខ្ញុំជាប្រធានាធិបតី សង្គ្រាមនៅអ៊ុយក្រែនមិនអាចកើតឡើងទេ»។ ការថ្លែងបែបនេះរបស់លោក ត្រាំ បានសំដៅរិះគន់ចំៗទៅលើរដ្ឋបាលរបស់លោក ចូ បៃដិន ដែលទើបផុតអាណត្តិកាលពីពេលថ្មីៗ។

មេដឹកនាំថ្មីរបស់អាមេរិករូបនេះ មិនបានផ្តល់ព័ត៌មានលម្អិតអំពីការដាក់ទណ្ឌកម្មបន្ថែមដែលអាចកើតមាននោះទេ។ យ៉ាងណា កន្លងមកអាមេរិកធ្លាប់បានដាក់ទណ្ឌកម្មរុស្ស៊ីយ៉ាងខ្លាំងរួចហើយចំពោះការឈ្លានពានអ៊ុយក្រែនក្នុងខែកុម្ភៈឆ្នាំ២០២២។

លោក ត្រាំ បានបន្ថែមថា រដ្ឋបាលរបស់លោកក៏កំពុងសម្លឹងមើលបញ្ហានៃការបញ្ជូនអាវុធទៅអ៊ុយក្រែនផងដែរ ដោយសង្កត់ធ្ងន់ថា សហភាពអឺរ៉ុបគួរតែធ្វើអ្វីថែមទៀតដើម្បីគាំទ្រអ៊ុយក្រែន។

លោកក៏បាននិយាយដែរថា លោកបានដាក់សម្ពាធលើប្រធានាធិបតីចិន លោក ស៊ី ជីនពីង ក្នុងការអំពាវនាវឲ្យធ្វើអន្តរាគមន៍ដើម្បីបញ្ឈប់សង្គ្រាមអ៊ុយក្រែន ដោយលើកឡើងថា៖ «គាត់មិនបានធ្វើអ្វីច្រើនលើរឿងនេះទេ។ គាត់មានអំណាចច្រើន ដូចដែលយើងមានអំណាចច្រើនអ៊ីចឹងដែរ។ ខ្ញុំបាននិយាយថា អ្នកគួរតែដោះស្រាយវា»៕

ដោយ៖ ឈាង