គាំទ្រភ្លូកទឹកភ្លូកដី! សំបុត្រទស្សនាទស្សនីយភាព «ល្ខោនបាមោជ្ជទ័យ» រឿងកុលាបប៉ៃលិន ទាំង ៤ថ្ងៃ លក់អស់ហើយ

ត្រឹមប៉ុន្មានម៉ោងប៉ុណ្ណោះ បន្ទាប់ពីនាយកដ្ឋានសិល្បៈទស្សនីយភាព ប្រកាសពីការអស់សំបុត្រទស្សនាសិល្បៈទស្សនីយភាព «ល្ខោនបាមោជ្ជទ័យ» រឿង កុលាបប៉ៃលិន ថ្ងៃទី២៣ និង ២៥ មុននេះ កម្ពុជាថ្មី ទទួលបានដំណឹងថា សំបុត្រទស្សនាសិល្បៈទស្សនីយភាពនេះ គឺអស់ទាំង ៤ថ្ងៃតែម្តង។

សកម្មភាពនៃការគាំទ្រនេះ បានបង្ហាញយ៉ាងច្បាស់ពីការឱ្យតម្លៃដល់សិល្បៈវប្បធម៌របស់ជាតិ ក៏ដូចជាសិល្បករបុរាណ ខណៈពួកលោកបានខិតខំប្រឹងប្រែងយ៉ាងដុតដៃដុតជើង ហាត់សមសម្តែងប៉ុន្មានខែមកហើយ ដើម្បីតែត្រៀមសម្តែងជូនមហាជនទស្សនាវេលានេះ។

សូមជម្រាបថា «ល្ខោនបាមោជ្ជទ័យ» ជាទម្រង់សិល្បៈបុរាណខ្មែរបែបកម្សាន្ត ដែលបូករួមទាំងការសម្តែង និងការច្រៀង តាមរយៈបទភ្លេងរាប់រយបទ តាមទម្រង់ខ្មែរលាយបច្ចឹមប្រទេស ដែលបាត់វត្តមាន ៣៧ឆ្នាំទៅហើយលើឆាកសម្តែង និងមានបទចម្រៀងសរុបប្រមាណជាជាង ៥០០បទ ។

យ៉ាងណា ក្រោយបាត់វត្តមានជិត ៤០ឆ្នាំ លើឆាកសម្តែង លោកគ្រូអ្នកគ្រូដែលជាសាស្ត្រាចារ្យជំនាញ ក៏បានចងក្រងឱ្យរស់រានឡើងវិញតាមរយៈស្នាដៃរឿង “កុលាបប៉ៃលិន” ដោយមានការចូលរួមពីសំណាក់លោកគ្រូអ្នកគ្រូ និងសិល្បករសិល្បការិនីទម្រង់សិល្បៈបុរាណជាច្រើនរូបទៀត។

តួយ៉ាង ផ្ទាំងទស្សនីយភាពនៃទម្រង់សិល្បៈបុរាណនេះ បានចាប់ផ្តើមសម្តែងទស្សនាជាលើកដំបូង ចាប់ពីល្ងាចថ្ងៃព្រហស្បតិ៍នេះ វេលាម៉ោង៥:៣០នាទី ដល់ថ្ងៃអាទិត្យទី២៦ ខាងមុខនេះ ពោលគឺមានរយៈពេល ៤ថ្ងៃ ខណៈសំបុត្រទស្សនាទាំង ៤ថ្ងៃ លក់អស់ទៅហើយ។

គួររម្លឹកថា ទម្រាំចេញជារូបរាង «ល្ខោនបាមោជ្ជទ័យ» មួយរឿងនេះឡើងបាន គឺមានការរួមបញ្ចូលអ្នកសិល្បៈបុរាណច្រើនទម្រង់ ទាំងអ្នកល្ខោននិយាយ អ្នកល្ខោនបាសាក់ យីកេ អ្នករបាំ ក៏ដូជាគ្រូភ្លេងជាច្រើនរូប ដើម្បីញុាំងឱ្យទម្រង់សិល្បៈបុរាណមួយនេះ មានភាពរស់រវើក៕ អត្ថបទ៖ សុធាវី