ព័ត៌មានអន្ដរជាតិ

វៀតណាមបង្រ្កាបករណីលាងលុយកខ្វក់ ១,២ ប៊ីលានដុល្លារ នៅក្រុងដាណាង

បានផុស

២ សប្តាហ៍ មុន

នៅ

ថ្ងៃសុក្រ ២៤ មករា ២០២៥

ដោយ

អង្គភាពនគរបាលប្រឆាំងបទល្មើសសេដ្ឋកិច្ច ដែលចំណុះឱ្យនាយកដ្ឋានសន្តិសុខសាធារណៈ បានបង្ក្រាបទៅលើក្រុមជើងកាងលាងលុយកខ្វក់នៅទីក្រុងដាណាង ដោយរកឃើញថា ប្រាក់ជាង ៣០ ទ្រីលានដុង (១,២ ប៊ីលានដុល្លារ) ត្រូវបានផ្ទេរដោយខុសច្បាប់តាមរយៈគណនីធនាគារចំនួន ៦០០ នៅក្នុងប្រទេសវៀតណាម។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានសន្តិសុខសាធារណៈ បាននិយាយថា ជនសង្ស័យទាំង ៥ នាក់កំពុងស្ថិតក្រោមការឃុំខ្លួន ខណៈត្រា និងឯកសារក្លែងក្លាយស្តីពីការបង្កើតក្រុមហ៊ុន Shell (ក្រុមហ៊ុនមានតែឈ្មោះដើម្បីគ្រប់គ្រងទ្រព្យសម្បត្តិ ប៉ុន្តែគ្មានប្រតិបត្តិការ) ចំនួន ១៨៧ កាតបញ្ជាក់អត្តសញ្ញាណ និងលិខិតបញ្ជាក់អាជីវកម្មក្លែងក្លាយ ត្រូវបានរឹបអូស។

នាយកដ្ឋានបានបន្តថា ក្រុមជើងកាងបានប្រើកាតបញ្ជាក់អត្តសញ្ញាណក្លែងក្លាយ ដើម្បីបង្កើតក្រុមហ៊ុនជាច្រើន និងឯកសារ ក៏ដូចជាត្រាធនាគារក្លែងក្លាយ ដែលអនុញ្ញាតឱ្យពួកគេបើកគណនីធនាគារចំនួន ៦០០ ។

ភ្នាក់ងារស៊ើបអង្កេតរបស់ប៉ូលិស បានរាយការណ៍ថា ក្រុមជើងកាងបានជួយផ្ញើប្រាក់ចំនួន ១,២ ប៊ីលានដុល្លារ ពីប្រភពឧក្រិដ្ឋកម្មបរទេសចូលទៅក្នុងប្រទេសវៀតណាម រួមមកគេប្រើគណនីធនាគារដើម្បីលាងលុយកខ្វក់ ដោយផ្ទេរប្រាក់ទាំងនោះចន្លោះឆ្នាំ ២០២២-២៤។ នេះគឺជាករណីលាងលុយកខ្វក់ធំបំផុតនៅដាណាង។

គួរគូសបញ្ជាក់ថា ការក្លែងបន្លំទ្រព្យសម្បត្តិហិរញ្ញវត្ថុដើម្បីឱ្យឧក្រិដ្ឋជនអាចប្រើប្រាស់ដោយមិនឱ្យគេចាប់បានពីសកម្មភាពខុសច្បាប់នេះ មិនមែនជាឧក្រិដ្ឋកម្មធំក្នុងប្រទេសវៀតណាមនោះទេ ប៉ុន្តែជារឿយៗ គេឃើញមានការចាប់ខ្លួនឧក្រិដ្ឋជន ដែលប្រើសាច់ប្រាក់ដើម្បីទិញទ្រព្យសម្បត្តិ រថយន្ត គ្រឿងអលង្ការ និងទ្រព្យសម្បត្តិដ៏មានតម្លៃក្រោមឈ្មោះអ្នកដទៃក្នុងប្រទេស៕