ព័ត៌មានអន្ដរជាតិ

តម្លៃប្រេងធ្លាក់ចុះក្នុងអត្រាប្រចាំសប្ដាហ៍ ជុំវិញគោលនយោបាយថាមពល ត្រាំ

បានផុស

២ សប្តាហ៍ មុន

នៅ

ថ្ងៃសៅរ៍ ២៥ មករា ២០២៥

ដោយ

តម្លៃប្រេងបានកើនឡើងតិចតួចពេលបញ្ចប់ការជួញដូរកាលពីថ្ងៃសុក្រ ប៉ុន្តែបានធ្លាក់ចុះនៅក្នុងអត្រាប្រចាំសប្ដាហ៍ ក្រោយពេលលោកប្រធានាធិបតី ដូណាល់ ត្រាំ ប្រកាសពីគម្រោងជំរុញផលិតកម្មក្នុងស្រុក និងទាមទារឱ្យអង្គការនៃប្រទេសនាំចេញប្រេងកាត (OPEC) ទម្លាក់តម្លៃប្រេង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានកើនឡើង ២១ សេន ឬ ០,២៧ ភាគរយ ដោយបញ្ចប់ការជួញដូរនៅតម្លៃ ៧៨,៥០ ដុល្លារ/បារ៉ែល។ ចំណែកឯប្រេងឆៅម៉ាក ប្រេងឆៅអាមេរិក ម៉ាក West Texas Intermediate (WTI) វិញ បានកើនឡើង ៤ សេន ឬ ០,០៥ ភាគរយ ដោយបញ្ចប់ការជួញដូរនៅតម្លៃ ៧៤,៦៦ ដុល្លារ/បារ៉ែល។

យ៉ាងណាមិញ តម្លៃប្រេងម៉ាក Brent បានធ្លាក់ចុះ ២,៨ ភាគរយ ខណៈតម្លៃ WTI ធ្លាក់ចុះ ៤,១ ភាគរយ នៅសប្ដាហ៍នេះ។

នៅពេលស្បថចូលកាន់តំណែងកាលពីដើមសប្ដាហ៍ លោក ត្រាំ បានប្រកាសពី «អាសន្នថាមពល» និងដកហូតគោលនយោបាយបៃតង ដែលដាក់ចេញដោយរដ្ឋបាលរបស់អតីតប្រធានាធិបតី ចូ បៃដិន ផ្សេងៗ។ នេះគឺជាការបោះជំហានក្នុងការឆ្ពោះទៅរកការបង្កើនផលិតកម្មប្រេងក្នុងស្រុកអាមេរិក ដែលធ្វើប្រេងធ្លាក់ចុះ ជុំវិញក្ដីបារម្ភពីការផ្គត់ផ្គង់លើសតម្រូវការ។

ទន្ទឹមនឹងនេះ នៅពេលថ្លែងទៅកាន់កិច្ចប្រជុំនៅវេទិកាសេដ្ឋកិច្ចពិភពលោកកាលពីថ្ងៃសុក្រ លោក ត្រាំ បានទាមទារឱ្យ OPEC ក៏ដូចជាអារ៉ាប៊ីសាអ៊ូឌីត ដែលជាប្រទេសផ្គត់ផ្គង់ប្រេងដ៏ធំមួយរបស់ពិភពលោក ទម្លាក់តម្លៃប្រេងឆៅ។

ទោះបីជាយ៉ាងណាក៏ដោយ អ្នកវិភាគលើកឡើងថា ការធ្លាក់ចុះនៃតម្លៃប្រេងនៅតែមានកម្រិត ដោយសារតែទណ្ឌកម្មរបស់អាមេរិកលើវិស័យប្រេងរុស្ស៊ី ដែលជាអ្នកផ្គត់ផ្គង់ប្រេងដ៏ធំមួយទៀត៕