ករណីបាក់ស្ពាននៅស្រុកស្អាង÷ ពលរដ្ឋអាចធ្វើចរាចរចេញ-ចូល តាមខ្លោងទ្វារវត្តពាមប្រជុំ ជាប់ផ្លូវជាតិលេខ២១

អ្នកនាំពាក្យ ក្រសួងសាធារណការ លោក ផន រឹម បានឱ្យដឹងថាក្រុមការងារក្រសួងសាធារណការ និងដឹកជញ្ជូន បានចុះជាប់ និងសហការជាមួយអាជ្ញាធរមូលដ្ឋានស្រុកស្អាង ករណីរថយន្តធុនធ្ងន់ដឹកគ្រឿងចក្រអេស្កាវ៉ាទ័រ បណ្តាលឲ្យបាក់ស្ពានដែកបេឡេ ស្រុតចុះដល់បាតព្រែកអំបិល ស្ថិតក្នុងភូមិព្រែកអំបិល ឃុំព្រែកអំបិល ស្រុកស្អាង ខេត្តកណ្តាល នៅវេលាម៉ោង១០:៤០នាទីព្រឹក ថ្ងៃទី២៥ ខែមករា ឆ្នាំ២០២៥ ។

ក្រុមការងារចម្រុះបានចុះពិនិត្យស្ថានភាពកំហូចជាក់ស្តែងរបស់ស្ពានឃើញថា ស្ពានបេឡេ(Compact100 ) ទទឹង៤ម៉ែត្រ បណ្តោយ៦០ម៉ែត្រ រងការខូចខាតដូចខាងក្រោម៖សរសរកណ្តាលទ្រស្ពាន ខូច២ដើមទាំងស្រុង,កម្រាលស្ពានខូច៦ផ្ទាំង,ធ្នឹមបណ្ដោយ (ប៉ាណូ) ខូច១១ផ្ទាំង,ធ្នឹមទទឹង កោង ៨ដើម និងខូចខាតសម្ភារៈភ្ជាប់ ម៉ាណូ + ប៊ូឡុង។

ដំណោះស្រាយបណ្ដោះអាសន្ន ប្រជាពលរដ្ឋរស់នៅក្នុង ភូមិពាមប្រជុំ ភូមិព្រែកក្រាញ់ និងភូមិព្រែកថ្មី អាចធ្វើចរាចរចេញ-ចូល តាមផ្លូវបេតុងខ្លោទ្វារវត្តពាមប្រជុំ ជាប់ផ្លូវជាតិលេខ២១។

ក្រុមការងារបច្ចេកទេសបន្តពិនិត្យលទ្ធភាពស្តារឡើងវិញស្ពានដែលបាក់ខូចខាតនេះ ដើម្បីឲ្យប្រជាពលរដ្ឋបានឆ្លងកាត់ជាប្រក្រតីឡើងវិញ។ រីឯរថយន្តសណ្តោងស្លាកលេខ (ភ្នំពេញ 3A-3138) និងអិចស្កាវាទ័រម៉ាក CAT(320C) បានបញ្ជូនទៅមន្ទីសាធារណការ និងដឹកជញ្ជូនខេត្តកណ្តាល ដើម្បីដោះស្រាយតាមនីតិវិធី៕