ព័ត៌មានអន្ដរជាតិ

អាល្លឺម៉ង់បានប្រែក្លាយវិបត្តិថាមពលពឹងផ្អែកពីរុស្ស៊ី ងាកទៅលើកទឹកចិត្តការសាងសង់របងដោយប្រើបន្ទះសូឡាដ៏គួរឲ្យទាក់ទាញ

បានផុស

១ សប្តាហ៍ មុន

នៅ

ថ្ងៃអង្គារ ២៨ មករា ២០២៥

ដោយ

ចាប់តាំងពីវិបត្តិសង្គ្រាមរុស្ស៊ី-អ៊ុយក្រែនបានផ្ទុះឡើយ វិបត្តិថាមពលនៅអឺរ៉ុបជាពិសេសប្រទេសអាល្លឹម៉ង់ដែលនាំចូលថាមពលឧស្ម័នច្រើនពីរុស្ស៊ី ក៏ទទួលរងនូវវិបត្តិនេះយ៉ាងខ្លាំង។ ប៉ុន្តែអាល្លឺម៉ង់តែងតែសន្យារិះរកថាមពលជំនួស និងកាត់បន្ថយការពឹងផ្អែកលើថាមពលពីរុស្ស៊ី ទោះបីវាមានតម្លៃថោកក៏ដោយ។

នៅមុនសង្គ្រាមកើតឡើង យោងតាមស្ថិតិ អាល្លឺម៉ង់ពឹងផ្អែកខ្លាំងណាស់នូវប្រភពថាមពលពីរុស្ស៊ី។ នៅឆ្នាំ២០២១ អាល្លឹម៉ងនាំចូលឧស្ម័នធមុ្មជាតិ៥៥%នៃការប្រើប្រាស់សរុបក្នុងប្រទេស សម្រាប់ប្រើប្រាស់តាមផ្ទះ តាមឧស្សាហកម្មនិងបង្កើតអគ្គិសនី។ ចំណែកប្រេងឥន្ធនៈវិញ អាល្លឺម៉ង់នាំចូលប្រហែល៣៥%នៃការប្រើប្រាស់សរុប ហើយធ្យូងថ្មគឺអាល្លឺម៉ងនាំចូល៥០%ពីប្រទេសរុស្ស៊ី។ រហូតដល់ពេលនេះ អាល្លឺម៉ង់បានប្រែប្រួលច្រើនណាស់ទៅរកប្រភពថាមពលដែលមាននិរន្តរភាព និងឯករាជ្យភាពថាមពល។

ថ្មីៗនេះប្រទេសអាល្លឺម៉ង់ បានចាប់ផ្ដើមប្រើប្រាស់បន្ទះសូឡាចូលទៅក្នុងការសាងសង់ផ្សេងៗគួរឲ្យចាប់អារម្មណ៍ ខណៈប្រទេសនេះគឺជាអ្នកនាំមុខគេជាយូរមកហើយក្នុងការទទួលយកបច្ចេកវិទ្យាប្រកបដោយនិរន្តរភាព និងសន្សំសំចៃថាមពល។ បើយោងតាមការចេញផ្សាយរបស់ Engineerine កាលពីថ្ងៃទី២៦ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការច្នៃប្រឌិតថ្មីមួយដែលទទួលបានការចាប់អារម្មណ៍គឺការប្រើប្រាស់បន្ទះសូឡាក្នុងការសាងសង់របងជញ្ជាំង។ បន្ទះសូឡាទាំងនេះកំពុងបង្ហាញថាមិនត្រឹមតែមានប្រសិទ្ធភាពជាង ឈើ និងឥដ្ឋប៉ុណ្ណោះទេ ប៉ុន្តែវាក៏ជាមធ្យោបាយដ៏ប៉ិនប្រសប់ក្នុងការបញ្ចូលដំណោះស្រាយថាមពលកកើតឡើងវិញទៅក្នុងហេដ្ឋារចនាសម្ព័ន្ធប្រចាំថ្ងៃផងដែរ។

ខាងក្រោមនេះគឺជា ហេតុផលដែលនៅពីក្រោយវិធីសាស្រ្តដ៏វិសេសវិសាលរបស់ប្រទេសអាល្លឺម៉ង់នេះ ដូចជាផលប៉ះពាល់ផ្នែកសេដ្ឋកិច្ច និងបរិស្ថាន ការច្នៃប្រឌិតក្នុងការប្រើបន្ទះសូឡា និងរបៀបដែលបន្ទះសូឡាផ្ដល់សារប្រយោជន៍ដល់ប្រទេសផ្សេងទៀតដែលមានបំណងចង់ធ្វើការសាងសង់ប្រកបដោយនិរន្តរភាព។

ហេតុអ្វីបានជាការសាងសង់ជញ្ជាំងប្រើបន្ទះសូឡា?

គោលគំនិតនៃការប្រើប្រាស់បន្ទះសូឡា ជំនួសឱ្យសម្ភារសំណង់ធម្មតាកើតចេញពីកត្តាចម្បងពីរគឺ ប្រសិទ្ធភាពចំណាយ និងនិរន្តរភាព។ នៅប្រទេសអាល្លឺម៉ង់ តម្លៃបន្ទះសូឡា បានធ្លាក់ចុះជាង ៨០% ក្នុងទសវត្សរ៍ចុងក្រោយនេះ ដែលធ្វើឲ្យពួកវាក្លាយជាជម្រើសដែលមានតម្លៃសមរម្យសម្រាប់គម្រោងខ្នាតធំ។ ម៉្យាងវិញទៀត ឈើនិងឥដ្ឋកាន់តែមានតម្លៃថ្លៃ ដោយសារមានបញ្ហាប្រឈមខ្សែសង្វាក់ផ្គត់ផ្គង់ ការព្រួយបារម្ភអំពីការកាប់បំផ្លាញព្រៃឈើ និងតម្រូវការកើនឡើងនៅក្នុងទីផ្សារសំណង់។

លើសពីនេះទៅទៀត បន្ទះសូឡាមានអត្ថប្រយោជន៍ពីរ គឺ ទី១៖ផលិតកម្មថាមពលដោយជញ្ជាំងទាំងនេះមិនគ្រាន់តែឈរការពារនោះទេ តែពួកវាបង្កើតអគ្គិសនីផងដែរ និង ទី២៖ និរន្តរភាព ព្រោះប្រទេសអាល្លឺម៉ង់គឺជាប្រទេសឈានមុខគេលើសកលលោកខាងថាមពលកកើតឡើងវិញ ហើយការប្រើប្រាស់បន្ទះសូឡាស្របគ្នានឹងគោលដៅអាកាសធាតុដ៏មានមហិច្ឆតារបស់ប្រទេសនេះផងដែរ។

អត្ថប្រយោជន៍ផ្នែកសេដ្ឋកិច្ចពីបន្ទះសូឡា

អត្ថប្រយោជន៍ដ៏សំខាន់បំផុតមួយពីការប្រើប្រាស់បន្ទះសូឡាក្នុងការសាងសង់ជញ្ជាំងគឺការជួយសន្សំសេដ្ឋកិច្ចរយៈពេលវែង។ ថ្វីបើថ្លៃដើមនៃការដំឡើងហាក់ដូចជាខ្ពស់ជាងសម្ភារៈផ្សេងក៏ដោយ ប៉ុន្តែថាមពលពួកវា បានបង្កើតនឹងកាត់បន្ថយការចំណាយលើប្រើប្រាស់អគ្គិសនីបង់ប្រាក់។

បន្ថែមពីលើនេះការចំណាយលើការថែទាំបន្ទះសូឡាមានតិចតួចបើប្រៀបធៀបទៅនឹងការជួសជុលជំនួសឈើ ឬឥដ្ឋ។ លើសពីនេះរដ្ឋាភិបាលប្រទេសនេះជារឿយៗផ្តល់ការឧបត្ថម្ភធន និងអត្ថប្រយោជន៍ពន្ធសម្រាប់គម្រោងថាមពលពន្លឺព្រះអាទិត្យ ដោយកាត់បន្ថយការចំណាយសរុបសម្រាប់ការផ្តួចផ្តើមគំនិតច្នៃប្រឌិតបែបនេះ។

កាត់បន្ថយផលប៉ះពាល់ដល់បរិស្ថាន

អត្ថប្រយោជន៍បរិស្ថានដោយប្រើប្រាស់វិធីសាស្រ្តនេះគឺធំធេងណាស់។ ដោយសារយើងមិនចាំបាច់ប្រើឈើដែលរួមចំណែកដល់ការកាប់បំផ្លាញព្រៃឈើ និងប្រើឥដ្ឋដែលមានកាបូនខ្ពស់ ដូចនេះបន្ទះសូឡាគឺជាជម្រើសបរិស្ថានស្អាត និងពណ៌បៃតងជាងគេ។ តាមរយៈការរួមបញ្ចូលបច្ចេកវិទ្យាថាមពលព្រះអាទិត្យទៅក្នុងហេដ្ឋារចនាសម្ព័ន្ធ អាល្លឺម៉ង់កាត់បន្ថយការពឹងផ្អែកលើឥន្ធនៈហ្វូស៊ីលប្រកបដោយប្រសិទ្ធភាព ខណៈពេលដែលកំពុងដោះស្រាយការប្រែប្រួលអាកាសធាតុផងនោះ។

បន្ថែមពីលើការកាត់បន្ថយការពឹងផ្អែកលើឥន្ធនៈហ្វូស៊ីល បន្ទះសូឡា ក៏ផ្តល់អត្ថប្រយោជន៍សេដ្ឋកិច្ចរយៈពេលវែងផងដែរ។ ការដំឡើងបច្ចេកវិជ្ជាថាមពលព្រះអាទិត្យអាចកាត់បន្ថយការចំណាយថាមពលយ៉ាងខ្លាំងក្នុងរយៈពេលមួយ ដែលធ្វើឱ្យវាក្លាយជាការវិនិយោគប្រកបដោយនិរន្តរភាពសម្រាប់ទាំងវិស័យសាធារណៈ និងឯកជន។

ជាងនេះទៅទៀត ការរីកចម្រើននៃឧស្សាហកម្មថាមពលព្រះអាទិត្យបាននាំឱ្យមានការបង្កើតការងារ ជំរុញសេដ្ឋកិច្ចបន្ថែមទៀត។ តាមរយៈការរួមបញ្ចូលបន្ទះសូឡា ទៅក្នុងហេដ្ឋារចនាសម្ព័ន្ធ អាល្លឺម៉ង់ដោះស្រាយបញ្ហាបរិស្ថាន ដោយប្រទេសនេះចង់បង្កើតខ្លួនជាអ្នកដឹកនាំផ្នែកថាមពលកកើតឡើងវិញ ជំរុញអនាគតប្រកបដោយនិរន្តរភាព។

ការច្នៃប្រឌិតក្នុងការប្រើបន្ទះសូឡា

ការរួមបញ្ចូលបន្ទះសូឡា ទៅក្នុងការសាងសង់គឺជាឧទាហរណ៍នៃការច្នៃប្រឌិតស្ថាបត្យកម្ម និងការរីកចំរើនផ្នែកបច្ចេកវិទ្យា។ រចនាសម្ព័ន្ធទាំងនេះគឺមិនមែនគ្រាន់តែមានមុខងារនោះទេ ពួកវាគួរតែមានសោភ័ណភាពទាក់ទាញ និងអនាគត។ វិធីសាស្រ្តប្រកបដោយភាពច្នៃប្រឌិតរបស់អាល្លឺម៉ង់ក៏បានជំរុញឱ្យមានចំណាប់អារម្មណ៍ទូទាំងពិភពលោកផងដែរ ដោយប្រទេសជាច្រើនកំពុងស្វែងរកដំណោះស្រាយស្រដៀងគ្នាសម្រាប់គម្រោងសំណង់ដែលមានប្រសិទ្ធភាពថាមពល។

តាមពិតទៅឧស្សាហកម្មសំណង់អាចធ្វើប្រើប្រាស់បន្ទះសូឡាជា ជញ្ជាំង ដំបូល និងសូម្បីតែដាក់តាមចិញ្ចើមផ្លូវដើម្បីបង្កើតថាមពលជួយបំភ្លឺផ្លូវពេលយប់។ ប្រទេសកំពុងអភិវឌ្ឍន៍នានាអាចប្រើវិធីសាស្រ្តនេះដើម្បីលោតផ្លោះចេញពីប្រព័ន្ធថាមពលហួសសម័យ និងកសាងទីក្រុងប្រកបដោយនិរន្តរភាព ។

បញ្ហាប្រឈម និងដែនកំណត់

ទោះបីជាប្រើបន្ទះសូឡាទទួលបានអត្ថប្រយោជន៍ច្រើនពិតមែន ប៉ុន្តែវាក៏មានដែនកំណត់ដូចជាភាពជាប់បានយូរ ព្រោះបន្ទះស្រូបពន្លឺព្រះអាទិត្យអាចមិនមានអាយុកាលយូរដូចឥដ្ឋទេ បើទោះបីជាភាពជឿនលឿននៃសម្ភារៈកំពុងដោះស្រាយបញ្ហានេះក៏ដោយ។ មួយវិញទៀតគឺអាស្រ័យលើអាកាសធាតុដោយប្រសិទ្ធភាពនៃបន្ទះសូឡា ត្រូវបានជះឥទ្ធិពលដោយលក្ខខណ្ឌអាកាសធាតុ ដែលអាចប៉ះពាល់ដល់ដំណើរការរបស់ពួកវា នៅក្នុងតំបន់ដែលមានពន្លឺថ្ងៃតិច។

យ៉ាងណាមិញការបង្កើតថ្មីរបស់ប្រទេសអាល្លឺម៉ង់ដើរតួជាប្លង់មេសម្រាប់ប្រទេសផ្សេងទៀតក្នុងគោលបំណងធ្វើឱ្យមានតុល្យភាពកំណើនសេដ្ឋកិច្ចជាមួយនឹងការទទួលខុសត្រូវផ្នែកបរិស្ថាន។

សរុបមក ការប្រើប្រាស់បន្ទះសូឡា របស់ប្រទេសអាល្លឺម៉ង់ក្នុងការសាងសង់ គឺជាសក្ខីភាពមួយចំពោះការប្តេជ្ញាចិត្តរបស់ប្រទេសនេះចំពោះនិរន្តរភាព ការច្នៃប្រឌិត និងប្រសិទ្ធភាពនៃការចំណាយ។ តាមរយៈការរួមបញ្ចូលថាមពលកកើតឡើងវិញជាមួយនឹងហេដ្ឋារចនាសម្ព័ន្ធ អាល្លឺម៉ង់មិនត្រឹមតែដោះស្រាយការកើនឡើងតម្លៃសំណង់ប៉ុណ្ណោះទេ ប៉ុន្តែថែមទាំងកំណត់ស្តង់ដារថ្មីសម្រាប់ការអភិវឌ្ឍន៍ទីក្រុងដែលមិនប៉ះពាល់ដល់បរិស្ថានផងដែរ។

ការផ្លាស់ប្តូរជាសាកលនេះឆ្ពោះនឹងទៅរកការបញ្ចូលបច្ចេកវិទ្យាថាមពលកកើតឡើងវិញទៅក្នុងការរចនាអគារឆ្លុះបញ្ចាំងពីការប្តេជ្ញាចិត្តកាន់តែខ្លាំងឡើងចំពោះនិរន្តរភាព និងកាត់បន្ថយការបញ្ចេញកាបូន។ ប្រសិនបើប្រទេសកាន់តែច្រើនទទួលយកការអនុវត្តទាំងនេះ សក្ដានុពលនៃផលប៉ះពាល់បរិស្ថានកាន់តែកាត់បន្ថយ ដែលជួយពន្លឿនការផ្លាស់ប្តូរទៅជាហេដ្ឋារចនាសម្ព័ន្ធថាមពលដែលមានប្រសិទ្ធភាព និងបៃតងជាងមុននៅទូទាំងពិភពលោក៕