លោក ជួន ណារិន្ទ៖ ក្រៅពីបញ្ហាអគ្គិភ័យ នគរបាលក៏រឹតបន្តឹងលើអ្នកបើកបរប្រើប្រាស់គ្រឿងស្រវឹងក្នុងឱកាសបុណ្យចូលឆ្នាំចិននេះដែរ

ស្នងការដ្ឋាននគរបាលរាជធានីភ្នំពេញ អំពាវនាវឱ្យប្រជាពលរដ្ឋមានការប្រុងប្រយ័ត្នលើបញ្ហាអគ្គិភ័យ នៅក្នុងឱកាសបុណ្យចូលឆ្នាំចិន វៀតណាមនេះ។ ក្រៅពីត្រៀមកម្លាំងក្នុងការបង្ការទប់ស្កាត់នៃគ្រោះអគ្គិភ័យ កម្លាំងនគរបាលក៏ត្រៀមកម្លាំងទប់ស្កាត់បញ្ហាសន្តិសុខសុវត្ថិភាព អសន្តិសុខផ្សេងៗ ជាពិសេសការអនុវត្តរឹតបន្តឹងច្បាប់ចរាចចរណ៍ផ្លូវគោកលើអ្នកបើកបរប្រើប្រាស់គ្រឿងស្រវឹងផងដែរ។

លោក ជួន ណារិន្ទ អគ្គស្នងការរងនគរបាលជាតិ និងជាស្នងការនៃស្នងការដ្ឋាននគរបាលរាជធានីភ្នំពេញ បានលើកឡើងថា បញ្ហាអគ្គិភ័យ គឺជារឿងចម្បងបំផុតក្នុងរដូវបុណ្យចូលឆ្នាំចិន វៀតណាម នេះ។ លោកបន្ថែមថា ត្បិតកម្លាំងសមត្ថកិច្ចបានត្រៀមលក្ខណៈក្នុងការជួយសង្គ្រោះក៏ពិតមែន ប៉ុន្តែប្រជាពលរដ្ឋ ក៏ត្រូវបង្កើនការប្រុងប្រយ័ត្នឱ្យបានខ្ពស់ទាំងអស់គ្នាផងដែរ។ លោកអំពាវនាវឲ្យប្រជាពលរដ្ឋ មុនចាកចេញពីផ្ទះទៅដំណើរកម្សាន្ដទីជិតទីឆ្ងាយ ត្រូវត្រួតពិនិត្យឲ្យបានត្រឹមត្រូវនៅកុងតាក់ភ្លើង ជៀសវាងបង្កគ្រោះអគ្គិភ័យ។

លោក ជួន ណារិន្ទ សង្កត់ធ្ងន់ថា ក្រៅពីបញ្ហាអគ្គិភ័យ កិច្ចការងារសន្តិសុខ និងការអនុវត្តច្បាប់ចរាចរណ៍លើអ្នកបើកបរប្រើប្រាស់គ្រឿងស្រវឹង ក៏ត្រូវបានរឹតបន្តឹងផងដែរ ដើម្បីធានាសន្តិសុខសុវត្ថិភាពរបៀបរៀបរយជូនប្រជាពលរដ្ឋ។

សូមបញ្ជាក់ថា បុណ្យចូលឆ្នាំប្រពៃណីចិនវៀតណាម នឹងប្រព្រឹត្តទៅរយៈពេល៤ថ្ងៃ គិតពីថ្ងៃទី២៨ ដល់ថ្ងៃទី៣១ ខែមករា ឆ្នាំ២០២៥ ដែលបុណ្យនេះ គឺជាពេលវេលាដែលពលរដ្ឋកម្ពុជា មានឈាមជ័រជាប់ខ្សែស្រឡាយកាត់ចិន ក៏នឹងចូលរួមរៀបចំពិធីសែនជូនដូនតា ដើម្បីសុំសេចក្តីសុខសប្បាយ និងសុំពរជ័យឱ្យរកស៊ីទទួលទានកាន់តែរីកចម្រើន តាមបែបលក្ខណៈគ្រួសាររៀងៗខ្លួន៕

អត្ថបទ៖ សុភា