ដុតទៀនធូបសែនចូលឆ្នាំចិន ចាក់សោរទុកចោលក្លាយជាអគ្គិភ័យឆេះផ្អើលអ្នកជិតខាង

អគ្គិភ័យបានឆាបឆេះបន្ទប់ជួល១បន្ទប់រងការខូចខាតរួមនឹងសម្ភារៈមួយចំនួនទៀត ខណៈម្ចាស់ដុតធូបសែនចូលឆ្នាំចិនទុចោល។

អគ្គិភ័យនេះបង្កឲ្យមានការភ្ញាក់ផ្អើលកាលពីវេលាម៉ោង១០និង៥០នាទីព្រឹក ថ្ងៃទី២៨ ខែមករា ឆ្នាំ២០២៥ ដែលថ្ងៃសែនចូលឆ្នាំចិន វៀតណាម ថ្ងៃទី១ នៅចំណុចផ្ទះជួលមួយកន្លែង ស្ថិតនៅតាមផ្លូវលេខ ១៥៦z ភូមិ១២ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។

ប្រភពព័ត៌មានពីអ្នកក្បែរខាងបានអោយដឹងថា មុនពេលកើតហេតុ គេបានឃើញម្ចាស់ផ្ទះដុតទៀនធូបសែនចូលឆ្នាំចិន-វៀតណាម រួចក៏ចាក់សោរចេញទៅក្រៅផ្ទះបាត់។ លុះមួយសន្ទុះក្រោយមក ក៏ស្រាប់តែភ្លើងបានឆាប់ឆេះផ្សែងហុយ លាយលំអណ្តាតភ្លើង បង្កឲ្យមានការភ្ញាក់ផ្អើលដល់អ្នកជិតខាង និងប្រជាពលរដ្ឋនាំគ្នាជួយពន្លត់ និងទាក់ទងហៅរថយន្តពន្លត់អគ្គិភ័យជាច្រើនគ្រឿងទៅអន្តរាគមន៍បាញ់ពន្លត់។

អគ្គិភ័យនេះបានឆាបឆេះសម្ភារៈក្នុងបន្ទប់ជួលអស់មួយបន្ទប់ រងការខូចខាតអស់ទាំងស្រុង និងបានប្រើប្រាស់រថយន្តពន្លត់អគ្គិភ័យរបស់ស្នងការរាជធានីភ្នំពេញ ចំនួន៦គ្រឿង បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចបានសន្និដ្ឋានថា បណ្តាលមកពីដុតទៀនធូបសែនចូលឆ្នាំចិនទុកចោល៕

អត្ថបទ៖ រដ្ឋា