ព័ត៌មានអន្ដរជាតិ

កុមារធ្វើអត្តឃាតកើនឡើងខ្ពស់បំផុតនៅជប៉ុន ប៉ុន្តែអត្តឃាតមនុស្សធំធ្លាក់ចុះ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ៣០ មករា ២០២៥

ដោយ

ទិន្នន័យបឋមរបស់រដ្ឋាភិបាលជប៉ុន បានបង្ហាញថា កុមារចំនួន៥២៧នាក់ដែលរៀននៅបឋមសិក្សា អនុវិទ្យាល័យ និងវិទ្យាល័យក្នុងប្រទេសជប៉ុនបានស្លាប់ដោយសារការធ្វើអត្តឃាតកាលពីឆ្នាំមុន ដោយកើនឡើង១៤នាក់ធៀបនឹងឆ្នាំ ២០២៣។ យោងសារព័ត៌មាន Bangkok Post ដែលផ្សាយនៅថ្ងៃទី៣០ខែមករានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមសិស្សវិទ្យាល័យសរុបមានចំនួន ៣៤៩នាក់កើនឡើង២នាក់ធៀបនឹងឆ្នាំមុន សិស្សមធ្យមសិក្សាមានចំនួន ១៦៣នាក់ កើនឡើង១០នាក់ និងសិស្សបឋមសិក្សា ១៥នាក់ កើនឡើង ២នាក់។ នេះបើយោងតាមទិន្នន័យរបស់ក្រសួងសុខាភិបាល។ កុមារទាំងនោះមានប្រុស២៣៩នាក់ ថយចុះ២០នាក់ ស្រី២៨៨នាក់កើន៣៤។

មន្ត្រីក្រសួងសុខាភិបាល ក្រសួងការងារ និងសុខុមាលភាពជប៉ុន បានហៅស្ថានភាពនេះថា «ធ្ងន់ធ្ងរ» ហើយបាននិយាយថា ត្រូវការការវិភាគបន្ថែមទៀត ដើម្បីយល់ពីកត្តារួមចំណែកកាត់បន្ថយឲ្យបានកាន់តែប្រសើរ។

ចំនួនមនុស្សសរុបដែលសម្លាប់ខ្លួនឯងនៅក្នុងប្រទេសជប៉ុនបានធ្លាក់ចុះមកនៅត្រឹម ២០២៦៨នាក់ គឺថយចុះ១៥៦៩ នាក់កាលពីឆ្នាំ២០២៣ ដែលជាតួលេខទាបបំផុតទីពីរចាប់តាំងពីកំណត់ត្រាបានចាប់ផ្តើមនៅឆ្នាំ១៩៧៨។

ការធ្វើអត្តឃាតរបស់បុរសបានធ្លាក់ចុះមកត្រឹម១៣៧៦៣នាក់ ថយចុះ ១០៩៩នាក់នាក់ដែលជាការថយចុះជាលើកដំបូងក្នុងរយៈពេល៣ឆ្នាំ ខណៈដែលការធ្វើអត្តឃាតរបស់ស្ត្រីក៏បានថយចុះផងដែរគឺធ្លាក់ចុះពី៦៥០៥ នាក់ទៅ៤៧០ នាក់។ ជាមួយគ្នានេះចំនួនអ្នកធ្វើអត្តឃាតក្នុងប្រទេសជប៉ុនក្នុងចំណោមមនុស្ស ១០ម៉ឺននាក់ មានចំនួន១៦.៣% ធ្លាក់ចុះ ១.៣% ធៀបនឹងឆ្នាំមុន។

បញ្ហាសុខភាពគឺជាមូលហេតុធំបំផុតនៅពីក្រោយការធ្វើអត្តឃាតដែលមានចំនួន១១៩៨៦ករណី បន្ទាប់មកគឺបញ្ហាទាក់ទងនឹងសេដ្ឋកិច្ចនិងបញ្ហាជីវិតចំនួន ៥០៧៥ករណី និងបញ្ហាគ្រួសារចំនួន ៤៣៣៤ករណី។ បញ្ហាទាក់ទងនឹងសាលារៀនមានចំនួន ៥៧៨ករណី ខណៈដែលការធ្វើអត្តឃាតចំនួន ៤២ករណី បានផ្សារភ្ជាប់ជាមួយនឹងបញ្ហាពាក់ព័ន្ធនឹងប្រព័ន្ធផ្សព្វផ្សាយសង្គម ឬអន្តរកម្មតាមអ៊ីនធឺណិត៕