ព័ត៌មានអន្ដរជាតិ

ចំណាប់ខ្មាំងថៃ៥នាក់ក្នុងចំណោម៨នាក់ក្នុងកណ្តាប់ដៃហាម៉ាសនៅហ្គាហ្សានឹងត្រូវដោះលែងថ្ងៃនេះ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ៣០ មករា ២០២៥

ដោយ

ជនជាតិថៃ៥នាក់ក្នុងចំណោមចំណាប់ខ្មាំងដែលក្រុមប្រដាប់អាវុធហាម៉ាសចាប់ជំរិតក្នុងការវាយប្រហារកាលថ្ងៃទី៧ខែតុលាឆ្នាំ២០២៣ នឹងត្រូវដោះលែងនៅថ្ងៃព្រហស្បតិ៍នេះ រួមជាមួយចំណាប់ខ្មាំងអ៊ីស្រាអែល៣នាក់ផង។

ចំណាប់ខ្មាំងជនជាតិអ៊ីស្រាអែល៣រូបនឹងត្រូវដោះលែងថ្ងៃនេះ រួមជាមួយជនជាតិថៃ៥រូប។ CNN

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពេលកិច្ចព្រមព្រៀងបទឈប់បាញ់ចូលជាធរមានកាលថ្ងៃទី១៩ខែមករា រដ្ឋមន្ត្រីការបរទេសនៃព្រះរាជាណាចក្រថៃស្វាគមន៍កិច្ចព្រមព្រៀងឈប់បាញ់ដោះលែងចំណាប់ខ្មាំង ហើយឆ្លៀតពេលនោះអំពាវនាវឱ្យដោះលែងជនជាតិខ្លួនដែលឃុំខ្លួននៅហ្គាហ្សាប្រមាណ៨នាក់។

តាមការចុះផ្សាយរបស់បណ្តាញសារព័ត៌មាន CNN នៅថ្ងៃព្រហស្បតិ៍នេះ ក្រុមប្រដាប់អាវុធហាម៉ាសនឹងដោះលែងចំណាប់ខ្មាំងចំនួន៨នាក់ ក្នុងនោះមានចំណាប់ខ្មាំងជនជាតិអ៊ីស្រាអែល ៣រូប និងជនជាតិថៃ៥រូប តាមកិច្ចព្រមព្រៀងបទឈប់បាញ់ដោះដូរចំណាប់ខ្មាំងនិងអ្នកទោសប៉ាឡេស្ទីន។

ចំណាប់ខ្មាំងអ៊ីស្រាអែលទាំង៣រូបនោះមាន ស្ត្រីជនជាតិអ៊ីស្រាអែលឈ្មោះ Arbel Yehoud អាយុ ២៩ឆ្នាំ និង ស្រ្តីឈ្មោះAgam Berger អាយុ២០ឆ្នាំ ព្រមទាំងបុរសជនជាតិអ៊ីស្រាអែលអាយុ៨០ឆ្នាំ ឈ្មោះ Gadi Moses។ ដោយឡែកជនជាតិថៃទាំង៥រូប មិនត្រូវបានគេបង្ហាញអត្តសញ្ញាណនៅឡើយទេ។

ប្រទេសថៃត្រូវបានគេរាយការណ៍ថា ជាប្រទេសតែមួយគត់ពីតំបន់អាស៊ាន ដែលមានប្រជាជនត្រូវបានចាប់ជាចំណាប់ខ្មាំងរបស់ក្រុមហាម៉ាសក្នុងហេតុការណ៍វាយឆ្មក់ចូលព្រំដែនអ៊ីស្រាអែលកាលថ្ងៃទី៧ខែតុលាឆ្នាំ២០២៣។ សេចក្តីរាយការណ៍ដំបូងថា ជនជាតិថៃ២៤នាក់ត្រូវចាប់ជាចំណាប់ខ្មាំង ប៉ុន្តែក្រោមមកក៏មានការដោះលែង ហើយបច្ចុប្បន្ននេះ មានជនជាតិថៃ៥រូបត្រៀមដោះលែងនៅថ្ងៃព្រហស្បតិ៍នេះ។

រដ្ឋមន្ត្រីការបរទេសថៃ Maris Sangiampongsa ធ្លាប់អំពាវនាវឲ្យដោះលែងជនជាតិខ្លួន។

នៅថ្ងៃព្រហស្បតិ៍នេះដែរ ជាថ្នូរនឹងការដោះលែងចំណាប់ខ្មាំងទាំងនោះ អ៊ីស្រាអែលនឹងបន្តដោះលែងអ្នកទោសប៉ាឡេស្ទីន១១០នាក់ ដោយ៣២នាក់ក្នុងចំណោមនោះត្រូវបានអ៊ីស្រាអែលកាត់ទោសជាប់ពន្ធនាគារ១ជីវិត ហើយអ្នកទោសផ្សេងៗទៀតមានកុមារ។ នេះយោង CNN ដែលស្រង់ប្រភពដើមពីក្រុមហាម៉ាស។

បទឈប់បាញ់ឈានមកដល់ថ្ងៃទី១១ នៃរយៈពេល៤៥ថ្ងៃ បានមើលឃើញការវិលត្រឡប់របស់ប្រជាជនប៉ាឡេស្ទីនរាប់សិបម៉ឺននាក់ទៅកាន់តំបន់លំនៅឋានរបស់ពួកគេវិញ បន្ទាប់ពីសង្គ្រាមដែលអូសបន្លាយជាង១៥ខែ និងបានសម្លាប់មនុស្សជាង៤ម៉ឺននាក់។

នៅក្នុងដំណាក់កាលដំបូងរយៈពេលប្រាំមួយសប្តាហ៍នៃបទឈប់បាញ់ ចំណាប់ខ្មាំងសរុបចំនួន៣៣នាក់ដែលត្រូវបានចាប់ខ្លួនក្នុងការវាយប្រហារដែលដឹកនាំដោយក្រុមហាម៉ាសនៅថ្ងៃទី៧ ខែតុលា ឆ្នាំ២០២៣ ដែលបានបញ្ឆេះសង្រ្គាមគួរតែត្រូវបានដោះលែង រួមជាមួយនឹងអ្នកទោសប៉ាឡេស្ទីនប្រមាណ២០០០នាក់ផងដែរ៕

ដោយ រ៉ាន់ រើយ