មកស្គាល់យន្តហោះនិងឧទ្ធម្ភាគចក្រ ដែលបុកគ្នានៅ វ៉ាស៊ីនតោន

ហេតុការណ៍យន្តហោះបុកជាមួយឧទ្ធម្ភាគចក្រនៅប្រទេសមហាអំណាចសហរដ្ឋអាមេរិក ធ្វើឲ្យពិភពលោកតក់ស្លុត ខណៈគិតត្រឹមថ្ងៃព្រហស្បតិ៍ទី៣០ខែមករាឆ្នាំ២០២៥ មនុស្សចំនួន១៩នាក់ ត្រូវបានគេរកឃើញស្លាប់។

តាមការចុះផ្សាយរបស់ CNN, យន្តហោះដឹកអ្នកដំណើររបស់ក្រុមហ៊ុន American Airlines បានបុកជាមួយឧទ្ធម្ភាគចក្រ Black Hawk ធ្លាក់ចូលទន្លេ Potomac នៅទីក្រុងវ៉ាស៊ីនតោន។

យន្តហោះដែលដឹកអ្នកដំណើរ៦០នាក់និងអាកាសយានិក៤នាក់នោះគឺជាប្រភេទ CRJ700 ផលិតដោយក្រុមហ៊ុន Bombardier នៅប្រទេសកាណាដា។ វាមានសមត្ថភាពដាក់មនុស្សបានចន្លោះ ៦៨ទៅ៧៨នាក់។

CRJ700 មាន​ម៉ាស៊ីនពីរ​ដែល​បំពាក់​នៅ​ផ្នែកខាង​ក្រោយ។ ស៊េរី CRJ-700 នេះគឺចាប់ផ្តើមហោះហើរលើកដំបូងក្នុងឆ្នាំ១៩៩៩ ប៉ុន្តែយន្តហោះដែលជួបគ្រោះអកុសលនៅអាមេរិក គឺមានលេខកន្ទុយ N709PS ផលិតឡើងក្នុងឆ្នាំ២០០៤។

ចំណែកឧទ្ធម្ភាគចក្រដែលបុកជាមួយយន្តហោះនេះ គឺជាឧទ្ធម្ភាគចក្រយោធាអាមេរិកប្រភេទ UH-60 Black Hawk ផលិតដោយក្រុមហ៊ុន Sikorsky Aircraft ដែលជាសម្ព័ន្ធរបស់ Lockheed Martin។

វាត្រូវបានបំពាក់ដោយម៉ាស៊ីនទួរប៊ីនភ្លោះ និងអាចផ្ទុកទាហានរហូតដល់១២នាក់ នៅក្នុងបេសកកម្មប្រយុទ្ធ។ យោងតាម Lockheed Martin, មានឧទ្ធម្ភាគចក្រ Black Hawks ជាង ៥ ០០០គ្រឿង កំពុងធ្វើប្រតិបត្តិការនៅទូទាំងអង្គភាពយោធាអាមេរិក និងជាមួយប្រទេសចំនួន ៣៥ ផ្សេងទៀតនៅជុំវិញពិភពលោក៕

អត្ថបទ៖ សុខ សុវណ្ណ

ចុចអាន៖ រកឃើញមនុស្សស្លាប់១៨នាក់ហើយ ក្នុងហេតុការណ៍យន្តហោះបុកជាមួយឧទ្ធម្ភាគចក្រ នៅ វ៉ាស៊ីនតោន