ផ្លូវ ៦០ ម៉ែត្រ ទៀតហើយ! ស្ត្រីម្នាក់ ត្រូវរថយន្តស៊េរីទំនើបបុកពីក្រោយរបួសធ្ងន់

រថយន្ត ១ គ្រឿង បើក​បុក​ម៉ូតូ​ពីក្រោយ រួញ​ម៉ូតូ​ចូល​គ្នា បណ្ដាល​ឲ្យ​ម្ចាស់​ម៉ូតូ​ជា​ស្ត្រី​រង​របួស​ធ្ងន់ ត្រូវ​បាន​បញ្ជូន​ទៅ​កាន់​មន្ទីរពេទ្យ។

ហេតុការណ៍​នេះ​កើត​ឡើង​កាលពី​វេលា​ម៉ោង ៨ ព្រឹក ថ្ងៃ​ទី ៣១ ខែ​មករា ឆ្នាំ ២០២៥ ស្ថិត​នៅ​តាម​បណ្ដោយ​ផ្លូវ ៦០ ម៉ែត្រ សង្កាត់​ចាក់​អង្រែ​ក្រោម ខណ្ឌ​មានជ័យ រាជធានី​ភ្នំពេញ។

តាម​ប្រភព​ពី​អ្នក​ធ្វើដំណើរ​បាន​ឲ្យ​ដឹង​ថា មុន​កើតហេតុ គេ​ឃើញ​បុរស​ម្នាក់ បើក​រថយន្ត​ម៉ាក​ឡិច​ស៊ីស 570 KURO ពណ៌​ខ្មៅ ១ គ្រឿង ពាក់​ស្លាក​លេខ ភ្នំពេញ 2BP-8933 បាន​បើកបរ​តាម​បណ្ដោយ​ផ្លូវ ៦០ ម៉ែត្រ ក្នុង​ល្បឿន​មធ្យម ទិសដៅ​ពី​ជើង​ទៅ​ត្បូង ខណៈ​មក​ដល់​ចំណុច​ច្រក​ចូល​បុរី​ប៉េង​ហួត បាន​ជ្រុល​ទៅ​បុក​ស្ត្រី​ម្នាក់​ពីក្រោយ​ពេញទំហឹង ដែល​កំពុង​ជិះ​ម៉ូតូ​ម៉ាក​ស្តុ​ប​ពី ពណ៌​ស ពាក់​ស្លាក​លេខ ភ្នំពេញ 1CS-7283 ធ្វើដំណើរ​ទិសដៅ​ស្របគ្នា ស៊ីញ៉ូ​បម្រុង​បត់​ឆ្វេង បណ្តាល​ឲ្យ​ស្ត្រី​ជា​ម្ចាស់​ម៉ូតូ​រង់​របួស​ធ្ងន់ធ្ងរ ចំណែក​ម៉ូតូ​រួញ​ចូលគ្នា​តែម្ដង។ ភ្លាមៗ ម្ចាស់​រថយន្ត​មិន​បាន​រត់​គេច​ខ្លួន​នោះ​ឡើយ បាន​នាំ​ស្ត្រី​ខាង​លើ​ទៅកាន់​មន្ទីរពេទ្យ ដើម្បី​សង្គ្រោះ​បន្ទាន់​ផង​ដែរ។

ក្រោយ​កើតហេតុ សមត្ថកិច្ច​ជំនាញ​ចរាចរណ៍ បាន​ចុះ​មក​វាស់វែង​ស្ទូច​យក​រថយន្ត និង​ម៉ូតូ​ទៅ​រក្សាទុក​នៅ​អធិការដ្ឋាន​នគរបាល​ខណ្ឌ​មានជ័យ រង់ចាំ​ដោះស្រាយ​គ្នា​ពេល​ក្រោយ៕

អត្ថបទ ៖ រដ្ឋា