ព័ត៌មានអន្ដរជាតិ

សន្ទស្សន៍ផលិតកម្មថៃ ធ្លាក់ចុះ ១,៧៩ ភាគរយ ក្នុងឆ្នាំ ២០២៤

បានផុស

១ សប្តាហ៍ មុន

នៅ

ថ្ងៃចន្ទ ៣ កុម្ភៈ ២០២៥

ដោយ

ការិយាល័យសេដ្ឋកិច្ចឧស្សាហកម្មថៃ (OIE) បានឱ្យដឹងថា សន្ទស្សន៍ផលិតកម្មរោងចក្រ (MPI) របស់ប្រទេសថៃ បានធ្លាក់ចុះ ១,៧៩ ភាគរយ ឆ្នាំលើឆ្នាំ នៅឆ្នាំ ២០២៤ ដែលចំណែកជាចម្បងដោយការធ្លាក់ចុះនៃឧស្សាហកម្មរថយន្ត និងការនាំចូលខ្ពស់ដែលប៉ះពាល់ដល់ក្រុមហ៊ុនផលិតក្នុងស្រុក។ នេះបើតាមការចុះផ្សាយកាសែតបាងកកប៉ុស្តិ៍ នាថ្ងៃចន្ទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមចុងឆ្នាំ ២០២៤ សន្ទស្សន៍ MPI ថៃ មានត្រឹម ៩៥,៨ ពិន្ទុ ដោយធ្លាក់ចុះ ១,៧៩ ធៀបនឹងឆ្នាំ ២០២៣ ខណៈសន្ទស្សន៍ប្រចាំខែធ្នូ បានធ្លាក់ចុះ ២,១១ ភាគរយ ដល់ ៩០,២ ពិន្ទុ។

ប្រធាន OIE លោក Passakorn Chairat បាននិយាយថា៖ «ដំបូងឡើយយើងជឿថា MPI ឆ្នាំ ២០២៤ នឹងថយចុះ ១,៦ ភាគរយ ប៉ុន្តែវាបានធ្លាក់ចុះច្រើនជាងនេះទៀត»។

លោកបាននិយាយថា ការធ្លាក់ចុះនៃ MPI ឆ្លុះបញ្ចាំងពីកម្សោយនៃផលិតកម្មរថយន្តក្នុងស្រុកថៃ។ កាលពីឆ្នាំមុន សហព័ន្ធឧស្សាហកម្មថៃ (FTI) បានទម្លាក់គោលដៅផលិតកម្មរថយន្តរហូតដល់ទៅ ២ ដង មកត្រឹម ១,៥ លានគ្រឿង ដែលជាគោលដៅទាបបំផុត រាប់តាំងពីឆ្នាំ ២០២១។

ការធ្លាក់ចុះនៃផលិតកម្មរថយន្តថៃ បណ្ដាលមកពីកម្សោយនៃការលក់ដែលបណ្ដាលមកពីការរឹតត្បឹតរបស់ធនាគារលើកម្ចីទិញរថយន្ត និងការធ្លាក់ចុះនៃការនាំចេញចន្លោះពីខែមករា ដល់ខែតុលា។

សម្រាប់ខែធ្នូ ក្រៅតែពីការធ្លាក់ចុះនៃផលិតកម្មរថយន្ត ផលិតកម្មដូងប្រេងថៃ និងការផលិតគ្រឿងអេឡិចត្រូនិក និងបន្ទះសៀគ្វី ក៏ធ្លាក់ចុះផងដែរ។

បើតាមលោក Passakorn ការនាំចូលខ្ពស់ក៏បានរួមចំណែកផងដែរ ដល់ការធ្លាក់ចុះ MPI ប្រចាំឆ្នាំ ២០២៤។ កាលពីឆ្នាំមុន តម្លៃនាំចូលបានកើនឡើង ៦,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលជំរុញដោយកំណើននៃការទិញផលិតផលពីប្រទេសចិន តៃវ៉ាន់ និងវៀតណាម៕