កីឡា

អ្នកពូកែ៤នាក់បានឡើងវគ្គពាក់កណ្តាលផ្តាច់ព្រ័ត្រ Frenzy Freestyle

បានផុស

៣ ថ្ងៃ មុន

នៅ

ថ្ងៃចន្ទ ៣ កុម្ភៈ ២០២៥

ដោយ

កម្មវិធីប្រកួតបាល់ទាត់ Frenzy Freestyle រកឃើញអ្នកខ្លាំងឡើងវគ្គពាក់កណ្តាលផ្តាច់ព្រ័ត្រហើយ បន្ទាប់ពីធ្វើការប្រកួតក្នុងវគ្គ៨នាក់ចុងក្រោយកាលពីថ្ងៃអាទិត្យ ទី២ ខែកុម្ភៈ ឆ្នាំ២០២៥ នៅទូរទស្សន៍បាយ័នបឹងស្នោរ។

ការប្រកួតវគ្គ៨នាក់ចុងក្រោយពិតជាស្វិតស្វាយខ្លាំងមែនទែន និងទទួលបានការផ្តល់ពិន្ទុយ៉ាងសុក្រឹតពីគណៈកម្មការវាយតម្លៃ។ យុវជនលេចធ្លោគួរឲ្យចាប់អារម្មណ៍ លន់ ឆៃយ៉ា បានឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីយកឈ្នះបេក្ខនារី ឌី គឹមយាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេក្ខជម នួន វណ្ណា បានយកឈ្នះដៃគូ ចាន់ណាក់ វរៈបុត្រ ដើម្បីទទួលបានឱកាសឡើងទៅវគ្គដែលមានប្រាក់រង្វាន់ក្នុងដៃស្រាប់ ហើយបេក្ខជន ស៊ុំ សាន បានទម្លាក់ដៃគូ ខុន ខេមរៈបុត្ត ដើម្បីឡើងទៅវគ្គបន្ត។ បេក្ខនារី យ៉ែម នារតី អស់ឱកាសឡើងទៅវគ្គ៤នាក់ចុងក្រោយ បន្ទាប់ពីចាញ់បេក្ខជន ផ្លម ធិញហួយ។

បេក្ខនារី២នាក់គត់ដែលបានចុះឈ្មោះចូលរួមប្រកួតក្នុងកម្មវិធី Frenzy Freestyle លើកដំបូងនៅកម្ពុជាបានអស់ឱកាសត្រឹមនេះហើយ។ ទោះបីជាយ៉ាងណា តាមរយៈបទសម្ភាសជាមួយសារព័ត៌មាន«កម្ពុជាថ្មី» បេក្ខនារីទាំងពីរនាក់ពិតជាមានមោទនភាពចំពោះខ្លួនឯងដែលទទួលបានឱកាសបង្ហាញសមត្ថភាពដើម្បីប្រកួតប្រជែងជាមួយនឹងបុរសៗ។

បេក្ខជនទាំង៤នាក់ដែលឈានដល់វគ្គពាក់កណ្តាលផ្តាច់ព្រ័ត្រគឺមានប្រាក់រង្វាន់ដៃហើយ ដោយគ្រាន់តែត្រូវប្រជែងគ្នាដើម្បីយកចំណាត់ថ្នាក់ និងប្រាក់រង្វាន់ខុសៗគ្នាប៉ុណ្ណោះ។

ការប្រកួតបាល់ហ្វ្រីស្តាយល៍ ដំបូងនៅកម្ពុជា បានដំណើរការដ៏អស្ចារ្យមួយ រហូតមកដល់ពេលនេះ ដោយបេក្ខជន ដែលមានទេពកោសល្យនៅក្នុងប្រទេសកម្ពុជាបានប្រកួតគ្នា ដើម្បីមានឱកាសឈានទៅវគ្គបន្តមួយទៀតក្នុងចំណោមជើងខ្លាំងទាំង៤នាក់។

កម្មវិធីដ៏អស្ចារ្យនេះបានឆក់យកបេះដូងទស្សនិកជន និងអ្នកចូលរួមដែលមិនធ្លាប់ស្គាល់ថា បាល់ហ្វ្រីស្តាយល៍ជាអ្វី។ ពួកគេបានបង្ហាញនូវសមត្ថភាព និងសិល្បៈផ្ទាល់ខ្លួនក្នុងការបង្កើតក្បាច់ថ្មីប្លែកៗ។ ចាប់ពីពេលនេះទៅមានរយៈជាង១០ថ្ងៃទៀតទើបឈានដល់វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ដូច្នេះជឿជាក់ថា បេក្ខភាពទាំង៤នាក់នឹងមានក្បាច់ពិសេស ប្លែក គួរឲ្យចាប់អារម្មណ៍ និងទាក់ទាញគណៈកម្មការវាយតម្លៃ នៅថ្ងៃទី១៦ ខែកុម្ភៈ ឆ្នាំ២០២៥៕

អត្ថបទ៖ វីរបុត្រ

Related Topics:កីឡាបាល់ទាត់