សុខភាព

អ្វីជាការវះកាត់រលាកខ្នែងពោះវៀនដោយវិធីចោះ!

បានផុស

៤ years មុន

នៅ

ថ្ងៃសុក្រ ១៩ មីនា ២០២១

ដោយ

ខ្នែងពោះវៀន គឺជាបំពង់តូចមួយដែលចុងបិទជិតស្ថិតនៅផ្នែកទីមួយនៃពោះវៀនធំក្បែរចំណុចប្រសព្វនៃពោះវៀនធំនិងពោះវៀនតូច។ ជាធម្មតាវាស្ថិតនៅផ្នែកខាងស្តាំ ក្រោមផ្ចិតមានប្រវែងប្រហែលជា៥-៧សង់ទីម៉ែត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរលាកខ្នែងពោះវៀនត្រូវព្យាបាលដោយវះកាត់យកចេញដោយវិធីវះបើក និងវះចោះ។

ក) គុណសម្បត្តិៈនៃការវះកាត់រលាកខ្នែងពោះវៀនដោយវិធីចោះ

– ការឈឺចាប់តិចក្រោយវះកាត់

– សម្រាកពេទ្យរយៈពេលខ្លី

– ចលនាពោះវៀនមានឡើងវិញលឿន

– អាចធ្វើការងារបានវិញឆាប់រហ័ស

– ស្លាកស្នាមតូចក្រោយវះកាត់

* លទ្ធផលនៃការវះកាត់អាស្រ័យទៅនឹងកត្តារបស់អ្នកជំងឺផងដែរ ។

ខ) អ្នកជំងឺណាខ្លះដែលអាចវះកាត់ដោយចោះបាន ?

គេអាចធ្វើការវះចោះបានក្នុងគ្រប់ករណី(ទាំងជំងឺរោគស្ត្រី) អាស្រ័យទៅលើភាពស្ទាត់ជំនាញរបស់គ្រូពេទ្យ និងមានឧបករណ៍គ្រប់គ្រាន់ទៅតាមតម្រូវការ។

គ) តើការវះកាត់ដោយចោះត្រូវធ្វើដូចម្តេច ?

ពាក្យថាវះចោះ និងវះបើកគឺជាពាក្យបច្ចេកទេសដែលវេជ្ជបណ្ឌិតវះកាត់ប្រើប្រាស់សម្រាប់ធ្វើការវះកាត់ ។ ការវះកាត់ដោយចោះ ដោយមើលតាមកាមេរ៉ាវីដេអូ ដែលមានស្នាមប្រហោងវះបីតូចៗគឺ៖

– ទី១ នៅលើផ្ចិត

– ទី២ នៅផ្នែកក្រោមផ្ចិតខាងឆ្វេង

– ទី៣ នៅលើថ្ងាសពោះផ្នែកខាងក្រោមផ្ចិត ។

ឃ) តើធ្វើដូចម្តេច ប្រសិនបើការវះកាត់ដោយចោះពុំអាចធ្វើទៅបាន ?

មួយចំនួនតូចនៃអ្នកជំងឺ ប្រសិនបើមិនអាចធ្វើការវះកាត់ដោយចោះបាន ដោយសារតែយើងមិនអាចមើលឃើញខ្នែងច្បាស់ ហើយវារលាកខ្លាំងពុំអាចបេះបាន។ ដូច្នេះដើម្បីឲ្យងាយស្រួលយើងត្រូវប្តូរពីការវះកាត់ដោយចោះ មកវះកាត់ដោយបើកវិញ។ កត្តាដែលអាចប្តូរពីការវះកាត់ដោយចោះទៅការវះកាត់ដោយបើក៖

– ការបង្ករោគរាលដាលខ្លាំង និងអាប់សែ

– ខ្នែងពោះវៀនបែក ហើយស្អិតខ្លាំង

– ធ្លាប់មានការវះកាត់ពីមុនមក

– មានបញ្ហាហូរឈាមអត់ឈប់ពេលវះកាត់។

ង) ផលវិបាកអ្វីខ្លះដែលអាចកើតមានក្រោយការវះចោះ?

– ការហូរឈាមអត់ឈប់

– ការបង្ករោគ

– ធ្លាយលាមកក្នុងពោះតាមគល់ខ្នែងពោះវៀនដែលយើងកាត់

– អាចធ្លាយពោះវៀន ឬប៉ះពាល់ដល់ផ្នែកផ្សេងៗ នៃសរីរាង្គក្នុងពោះ

ច) រោគសញ្ញាអ្វីខ្លះដែលត្រូវទៅពេទ្យក្រោយវះចោះ?

– ក្តៅខ្លួនខ្លាំងលើសពី ៣៩អង្សាសេជាប់រហូត

– ឈឺពោះលេបថ្នាំមិនបាត់

– ចង្អោរ និងក្អួត

– ស្រាវស្រាញ

– ក្អករហូត និងហត់

– មានខ្ទុះនៅតាមកន្លែងវះ

– មានចេញក្រហមស្បែកនៅតាមរន្ធវះកាត់

– មិនអាចហូប និងផឹកបាន

“ប្រសិនបើលោកអ្នកមានបញ្ហាដែលទាក់ទងទៅនឹងពោះវៀន សូមមេត្តាប្រញាប់មកពិគ្រោះជាមួយក្រុមសាស្ត្រាចារ្យ វេជ្ជបណ្ឌិតឯកទេសនៃមន្ទីរពេទ្យកាល់ម៉ែត ដើម្បីទទួលបាននូវរោគវិនិច្ឆ័យ និងវិធីសាស្ត្រព្យាបាល ទាន់ពេលវេលា និងប្រកបដោយប្រសិទ្ធភាពខ្ពស់”៕

អត្ថបទ៖ រស្មី

សូមចុចអាន៖ គេងមិនលក់កម្រិតណា ទើបត្រូវប្រើថ្នាំងងុយ?

Related Topics:សុខភាព