ក្រសួងអភិវឌ្ឍន៍ជនបទនឹងរៀបចំឱ្យមានភូមិគំរូក្នុង១ឆ្នាំឱ្យបាន៥០ភូមិ

រដ្ឋមន្ត្រីក្រសួងអភិវឌ្ឍន៍ជនបទ លោក ឆាយ ឬទ្ធិសែន ថា នៅឆ្នាំ២០២៥នេះ ក្រសួងនឹងចាប់ផ្ដើមរៀបចំឱ្យមានភូមិគំរូ៥០ភូមិក្នុងឆ្នាំ ដើម្បីជំរុញសេដ្ឋកិច្ច ការអប់រំ ភាពសាមគ្គីគ្នា និងចេះរៀបចំគម្រោងសម្រាប់ពលរដ្ឋក្នុងភូមិទាំងនោះ។

ក្នុងកិច្ចសម្ភាសន៍ស្ដីពីសមិទ្ធផលសំខាន់ៗរបស់រាជរដ្ឋាភិបាល នីតិកាលទី៧ លើវិស័យអភិវឌ្ឍន៍ជនបទលោក ឆាយ ឬទ្ធិសែន បានលើកឡើងថាការរៀបចំភូមិគំរូនេះមានកិច្ចសហការជាមួយទីភ្នាក់ងារកិច្ចសហប្រតិបត្តិការអន្តរជាតិកូរ៉េ Koica និងធ្លាប់អនុវត្តន៍សាកល្បងលើភូមិចំនួន ៣០រួចហើយនៅខេត្តត្បូងឃ្នុំ តាកែវ និងកំពង់ស្ពឺ។ លោកថាការអភិវឌ្ឍន៍ភូមិគំរូនេះគឺផ្ដោតលើសេដ្ឋកិច្ច សង្គមកិច្ច សុខភាពអនាម័យ ការអភិវឌ្ឍន៍ហេដ្ឋារចនាសម្ព័ន្ធ និងអភិបាលកិច្ច។  

លោកថា៖ «លើសពីនេះគឺការអប់រំដែលយើងចង់បានពីគាត់។ ការអប់រំសីលធម៌សង្គម ទាំងបំណិនជីវិតទាំងភាពឧស្សាហ៍ព្យាយាមមនុស្សយើង​តែកាលណាគាត់មានប្រាក់ចំណូលខ្ពស់គាត់មានថវិការចិញ្ចឹមគ្រួសារបានច្រើនគឺគាត់ភ្លេចអស់ហើយរឿងល្បែងអបាយមុខ រឿងអំពើហិង្សាគ្រួសារ មានស្នាមញញឹម គឺជាភូមិមួយដែលរស់នៅដោយសុខដុមរមនា ជាភូមិដែលយើងយកជាគម្រូសម្រាប់ភូមិដទៃផងដែរ»។

លោក ឆាយ ឬទ្ធិសែន ភូមិគំរូមិនត្រឹមតែជួយដល់ភូមិខ្លួនឯងនោះទេវាមានឥទ្ធិពលដល់ភូមិជិតខាងក្នុងការលើកកម្ពស់នូវសេដ្ឋកិច្ច សង្គមកិច្ច និងសេវាផ្សេងទៀតដែរ។

លោកក៏បានឱ្យដឹងផងដែរថាក្រៅពីភូមិគំរូក៏មានគម្រោងភូមិសន្តិភាពផងដែរដែលដាក់អនុវត្តន៍នៅអតីតសមរភូមិនៅផ្នែកពាយ័ព្យនៃប្រទេសដូចជានៅខេត្តបាត់ដំបង និងប៉ៃលិន ទៅជាភូមិមានការអភិវឌ្ឍន៍ និងទទួលបានប្រាក់ចំណូលខ្ពស់៕

អត្ថបទដោយ ហ៊ុន សិរីវឌ្ឍន៍