សម្ដេចតេជោ នឹងបំពេញទស្សនកិច្ចនៅឡាវ២ថ្ងៃ ដើម្បីផ្ដល់សន្ទុះបន្ថែមដល់ទំនាក់ទំនងប្រទេសទាំងពីរ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា នឹងអញ្ជើញទស្សនកិច្ចផ្លូវការទៅកាន់ប្រទេសឡាវរយៈពេល២ថ្ងៃ ចាប់ពីថ្ងៃទី០៦ ដល់ថ្ងៃទី០៧ ខែកុម្ភៈ ឆ្នាំ២០២៥។ ដំណើរទស្សនកិច្ចនេះ គឺតបតាមការអញ្ជើញរបស់ លោក សាយសំផន កុមវិហាន ប្រធានរដ្ឋសភាឡាវ។

ព្រឹទ្ធសភា វាយតម្លៃថា ទស្សនកិច្ចរបស់សម្តេចអគ្គមហាសេនាបតីតេជោ ហ៊ុន សែន ក្នុងនាមជាប្រធានព្រឹទ្ធសភានៃ ព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ទៅកាន់ប្រទេសឡាវ នឹងផ្តល់សន្ទុះថ្មីក្នុងការពង្រឹង និងលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែងរវាងព្រះរាជាណាចក្រកម្ពុជានិងប្រទេសឡាវ ឱ្យកាន់តែរឹងមាំស៊ីជម្រៅ និងប្រកបដោយផ្លែផ្កាបន្ថែមទៀត។

តាមការគ្រោងទុកនៅក្នុងឱកាសទស្សនកិច្ចនេះ សម្តេចតេជោ នឹងមានជំនួបទ្វេភាគីជាមួយ លោកបណ្ឌិត សាយសំផន ភូមវិហាន ប្រធានរដ្ឋសភាឡាវ ជួបពិភាក្សាការងារជាមួយ លោកបណ្ឌិត សនសៃ ស៊ី ផាន់ដន នាយករដ្ឋមន្ត្រីឡាវ និងធ្វើជាសហប្រធានជាមួយ លោក ថងលូន ស៊ីសូលីត ប្រធានរដ្ឋឡាវ និងជាអគ្គលេខាធិការគណបក្សប្រជាជនបដិវត្តន៍ឡាវ ដឹកនាំកិច្ចប្រជុំកំពូលលើកទី១៥ រវាងគណបក្ស ប្រជាជនកម្ពុជានិងគណបក្សប្រជាជនបដិវត្តន៍ឡាវ។

សេចក្ដីប្រកាសព័ត៌មានរបស់ព្រឹទ្ធសភាចេញនៅថ្ងៃទី០៣ ខែកុម្ភៈ ឱ្យដឹងថា សមាសភាពគណៈប្រតិភូអមដំណើរ សម្តេចតេជោ ហ៊ុន សែន  ក្នុងទស្សនកិច្ចរួមមានសម្ដេច អនុប្រធានគណបក្សប្រជាជនកម្ពុជា និងឧត្តមប្រឹក្សាផ្ទាល់ព្រះមហាក្សត្រ ចំនួន ៣រូបដូចជា  សម្តេចក្រឡាហោម ស ខេង, សម្តេចពិជ័យ សេនា ទៀ បាញ់ និងសម្តេចកិត្តិសង្គហបណ្ឌិត ម៉ែន សំអន ព្រមទាំងលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងជាប្រធានគណៈទាក់ទងបរទេសនៃគណបក្សប្រជាជនកម្ពុជា ព្រមទាំងសមាជិកព្រឹទ្ធសភា-រដ្ឋសភា និងថ្នាក់ដឹកនាំសំខាន់ៗនៃស្ថាប័ននីតិប្បញ្ញត្តិកម្ពុជា និងគណបក្សប្រជាជនកម្ពុជា។

ជាការកត់សម្គាល់នេះ គឺដំណើរទស្សនកិច្ចលើកដំបូងបង្អស់ក្នុងឆ្នាំថ្មី ឆ្នាំ២០២៥ ក្នុងឋានៈជាប្រធានព្រឹទ្ធសភារបស់សម្ដេចតេជោ ហ៊ុន សែន បន្ទាប់ពីសម្ដេចបានចូលកាន់តំណែងមួយនេះរយៈពេលជិត១ឆ្នាំ។

គួររម្លឹកជូនថា ក្នុងឆ្នាំ២០២៤ កន្លងទៅ ក្នុងឋានៈជាប្រធានព្រឹទ្ធសភា សម្ដេចតេជោ ហ៊ុន សែន បានចេញទៅបំពេញទស្សនកិច្ចនៅប្រទេសកូរ៉េ  នៅប្រទេសអារ៉ាប៊ីសាអូឌីត នៅកាតា នៅតួកគី និងអេមីរ៉ាត់អារ៉ាប់រួម៕