ស៊ីម៉ាក់កំណត់តំបន់ដែលរងការទម្លាក់គ្រាប់បែកចង្កោមមានជាង២ពាន់កន្លែង

អគ្គនាយកមជ្ឈមណ្ឌលសកម្មភាពកម្ចាត់មីនស៊ីម៉ាក់លោក ហេង រតនា បាន​លើកឡើងថាតាមការស្រាវជ្រាវអង្គភាពលោកបានកំណត់ទីតាំងដែលរងការទម្លាក់គ្រាប់បែកចង្កោម និងគ្រាប់បែកទម្លាក់ពីយន្តហោះក្នុងសម័យសង្គ្រាមនៅកម្ពុជាមានជាង២ពាន់កន្លែង ដែលជាបញ្ហាប្រឈមរយៈពេលយូរនៅកម្ពុជា។

ថ្លែងក្នុងវីដេអូបទសម្ភាសន៍ពីវឌ្ឍនភាពរបស់ស៊ីម៉ាក់លោក ហេង រតនា បាន​លើកឡើងថារហូតមកដល់ពេលនេះកម្លាំងរបស់ស៊ីម៉ាក់បានធ្វើការស្រាវជ្រាវបានជាង១ពាន់ភូមិ និងបានកំណត់តំបន់ដែលរងការទម្លាក់គ្រាប់បែកដែលបានកំណត់ទីតាំងច្បាស់លាស់មានជាង២ពាន់កន្លែងនឹងត្រូវដាក់ទៅក្នុងទន្និន័យស្រាវជ្រាវ AI ដែលមានការគាំទ្រពីជប៉ុន និងអាល្លឺម៉ង់។ 

លោកថា៖ «ខ្ញុំយល់ថាក្រោយពីការស្រាវជ្រាវបានពេញលេញនោះយើងងាយស្រួលក្នុងការរៀបចំផែនការយុទ្ធសាស្ត្រក្នុងរយៈពេលវែងដែលប្រទេសរបស់យើងអាចរស់នៅជាមួយនឹងបញ្ហានេះរយៈពេលយូរតទៅមុខទៀត។ ជាពិសេសជាមួយគ្រាប់បែកចង្កោម​ហើយនឹងគ្រាប់បែកទម្លាក់ពីយន្តហោះដែលនៅពាសពេញប្រទេសកម្ពុជាយើង»។  

ទិន្នន័យដែលស៊ីម៉ាក់ទទួលបានកន្លងមកឱ្យដឹងថាអាមេរិកបានទម្លាក់គ្រាប់បែកគ្រប់ប្រភេទជាង២សែន៣ម៉ឺនទីតាំងនៅទូទាំងប្រទេសកម្ពុជា។ ក្នុងឆ្នាំ២០០១ ស៊ីម៉ាក់បានរកឃើញថាសំណល់យុទ្ធភ័ណ្ឌមិនទាន់ផ្ទុះប្រមាណ ៤ ៤៤៦គីឡូម៉ែត្រក្រឡា ប៉ះពាល់ផ្ទាល់ដល់ជាង៣លានគ្រួសារ ហើយនៅចុងឆ្នាំ២០២៣ ផ្ទៃដីដែលគ្រោះថ្នាក់ទាំងនោះធ្លាក់មកនៅជាង ១ ៧៥០គីឡូម៉ែត្រក្រឡា សល់ការគំរាមកំហែងប្រជាពលរដ្ឋជាង១លានគ្រួសារ៕

អត្ថបទដោយ ហ៊ុន សិរីវឌ្ឍន៍